[شب الكوبة]

المزمور الثالث عشر

ـ1ـ
يا عَلي الْـ فَلسفتَكْ قُونِه
بِتْزَيِّنْ صَدْرِ الْمَسْكُونِه
كِيف الأَرْضِ الْـ عايِشْ فِيها
بِقْدر مِنْ نَظْرَه خَلِّيها
بِسْهُولا، بْصَخْرِ رْوابيها
بِبْحُورا، بْرَمْلِ شْواطِيها
تِتْجَمَّع كِلاَّ بِعْيوني؟
ـ2ـ
مْسافاتا.. الْـ أَبْعَدْ مِنْ إيدي
بِقْطَعْها بْأَيّام جْديدِه
بِزْرَعْها، بْتِنْهَدّ كْتافي
بِحْصدْها بْضِحْكاتِ شْفافي
بْأَحْلامْ.. تْخِيَّلْتا بْعِيدِه
ـ3ـ
مْواسِمْها، جْنَايِنْ مَشْرورَه
بِتْغَذِّيها الشَّمْسِ بْنُورَا
بْيِدْلُقْ خِزَّاناتو عْلَيْها
الْغَيْمْ، وْبيغَسِّلْ إِجْرَيْها
وِبْيِرْجَعْ ياخِدْلا صُورَه
ـ4ـ
رَبيعَا بِيجِرّ الصَّيْفْ
وِالصَّيْفِ بْيِسْتَقْبِلْ ضَيْفْ
خِتْيارْ.. مْقَفْقَفْ بِالْبَرْدْ
الْخَريف.. الْـ ما شَافُو بَعْدْ
الْـ خَبَّى الشَّتْوِيِّه بِخْيالُو
سْنِينْ، وْما غَنِّتْ مُوّالو
ـ5ـ
يا عَلِي.. شْرَحْلِي تكْوِينا
هَـ الأَرْضْ.. اللّي عْلَيْها جِينَا
لا فْهِمْناها، وْلا فِهْمِتْنا
كَمْشِه مْنِ تْرابَا عَطْيِتْنا
جِتِّه.. كل ما انْتَهْيُوا سْنِينَا
بْتِرْجَعْ لِتْرَابَا جِتِّتْنَا
**
المزمور الرابع عشر

ـ1ـ
سْأَلْتِ كْتِيرْ.. وْبَدِّي إِسْأَلْ
يا عَلِي بْمَعْرِفْتَكْ قلّلي
كِيفْ الْمَوْجاتِ بْتِتْحَوَّلْ
غَيْماتْ.. مْنِ دْمُوعَا نْمَلِّي؟
ـ2ـ
وْكِيفْ الْبَحْرِ بْيِرْخِي مَدُّو
عَ الشَّطّ.. شْرَاشِفْ مكْوِيِّه
بْيِرْجَعْ جَزْرُو بْيَاخُدْ حَدّو
وْبِينِخّ يْجَمِّعْلُو هِيِّي؟
ـ3ـ
وْكِيفْ اليَومِ بْيِدْبَحْ خَيُّو
وْمِنْ جرْحُو بِيطلّ صْبَاحُو
وْكِيفْ النّجْماتِ بْيِتْفَيُّوا
بْخَيْمِه كْبِيرِه.. صْحَابَا رَاحُوا؟
ـ4ـ
وِالشَّمْس، الْـ ما انْطَفْيِتْ مَرَّه
مِنْ وَيْنِ بْتَاخُدْ مُونِتْهَا ؟
طَلِّتْ.. شِعْلِتْ.. ضَوِّتْ بَرَّا
غَابِتْ.. ما انْسَمْعِتْ أَنِّتْهَا
ـ5ـ
وْكِيفْ التَّلِّه الْـ تِمَّا واسِعْ
مِنْ تِمَّا بْتِنْفُخْ بُرْكانْ
بْيقْدُفْ نِيرَانُو بالطَّالِعْ
وِبْيِرْجَعْ يِخْفِي النِّيرانْ؟
ـ6ـ
وْكِيفْ الطَّيْرِ انْ رَفُّوا جْنَاحُو
بْيِعْلا.. وِبْتِعْلا تْرَاتِيلُو
انْ عَشْعَشْ.. بيضَلُّو عَ سْلاحُو
ما فينا مْنِ العشّ نْشِيلُو؟
ـ7ـ
وْكِيف الرِّيحِ بْتِجْدُلْ حَالا
وْبِتْزَنِّرْ خَصْرِ الْمَعْمُورَه
انْ فِرْحِتْ: بِتْرَيِّحْلا بَالا
انْ زِعْلِتْ: يا وَيْلا مْنِ شْرورَا؟
ـ8ـ
مَهْما تْقِدَّمْنا رَحْ نبقَى
تْلاميذْ.. وْإنْتَ تْعَلِّمْنا
كِيفْ، وْلَيْش، بْيِخْلَقْ وَرْقَه
أَللَّه.. تا يْخَرْطِشْ عَالَمْنا؟