[jankasanova]

كاتب النص الأصلي : The morning

و ما تعرفني بلادي ..

.. مـقطع من أغـنيه فيـروزيّـه بتذكرني بشكل شخصي بصـباح دمـشقي عم يـبوس جبين الدخنه اللي طالعه من فنـجان الـقهوه بـخجل بيمشي على أصابعي مع النـسمه البارده عم تفركهم سوا ..

و بـعد الحلم ..

لنـرجع للـواقع هلئ .. بعيدا ً عن الأحلام و المـثاليات و الرغبـات و الطموحات .. هل بنقدر كـأشـخاص تربينا في الغربه نـرجع نـعيش بسوريا ؟؟

هل هالخيـار صحـّي ؟؟

في حلـقه قديمه كتير من مسلسل مرايا بتطلع فيه سـلمى المصري بعد وفاه جوزها رجعت مع ولادها التلاته لانو بدها تربيهم بـ " الوطن " و بـعد فـتره شي كم اسـبوع أو كم شـهر بتقرر تـرجع عالمـغترب لأنها لا هي ولا ولادها بيقدرو يتأقلمو مع وضع البلد اللي بكون الجديد عليهم ..

طـيب بهـيك حاله شـو الحل ؟ و هل الحل الـصح أنـّو نترك و نمـشي ؟؟

و

لايمت ؟؟

انا رح احكيلك على تجربتي الشخصية بهالموضوع طبعا ما بقدر عمم عالكل بس مع احتكاكي مع كتير من المغتربين و بسألهم عن الرجعة لسوريا, بيجاوبوني بكلمتين, "مجنون انت؟"

انا كنت عايش فترة بدولة اوروبية و قررت ارجع كمل حياتي بسوريا, مع العلم انو تقريبا كل سنة كنت بنزل مرة على سوريا و كنت عد الايام لارجع على اوروبا.

رجعت و بقلبي خوف من المجتمع و الناس اللي بعرفون, خوف من العادات و التقاليد, بعدين انقلب الخوف لاشمئزاز صرت قارن كل شي من طريقة دفع فواتير المي و الكهربا مرورا بتوقيف تاكسي بالشارع و انتهاء بعلة القلب اللي بتصبر اذا بدك ورقة من شي دائرة رسمية و هذا شي و الحكي و اللت و العجن تبع العالم اللي انا كنت مطنشو. هالمقارنات كلها بلشت تثير عندي اسئلة كتير منها ليش و على شو ومين المنتفع اذا كنت عايش ببلدي و حاسس حالي مغترب اكتر من البلد الغريب اللي احتضني و اعتبرني مواطن متلي متل المواطن الاصلي.
وطلعت باجوبة انو مافي شي بيستاهل ابقا بشانو..

فرجعتي ما طولت ستة اشهر صرت بعدها هون بامريكا, و مستحيل انزل لسوريا الا بسبب الزيارة او بسبب تاني حابب احتفظ فيه حاليا لنفسي و حاليا ما بيحقلي انزل على سوريا غير مرة بالسنة بسبب العسكرية.

ف اللي بيقول ذكريات و شلة و قعدات و هويات و طلعات, اسف بس هالشغلات ما عاد تطعمي خبز هالايام ..

اسف عالاطالة مع انو في كتير حكي بقلبي ما قلتو بخصوص هالموضوع بس ماني عالحشيشة هاليومين, بس الي رجعة عالاغلب..
شكرا الك على الموضوع الرائع