[ayhamm26]

اول شي بيلفت النظر بالنقاش اللي عم يصير هو ازدواجية المعايير اللي نحني منتهم الغرب فيها و نحني ما في اشطر مننا فيها.

يعني ماحدا بينظر لموضوع احداث الثمانينات الدامية او سنوات الدم متل ما سماها نزار نيوف , على انها مأساة وطنية مو بس بسبب الاعداد الهائلة من السوريين اللي راحوا فيها و اللي يمكن تاريخ سوريا الحديث ما شهد متلها, وانما بسبب الشرخ الطائفي و الاجتماعي اللي سببتو بالمجتمع السوري

انما معظم الشباب براين انو كل القصة انو عصابة الاخوان العميلة متل ما ضلينا نردد من صف الاول للبكلوريا بمدارسنا هي السبب وهي بتتحمل وزر كل اللي صار و المثقفين اللي قتلون الاخوان والسيارات المفخخة وغيرو وبنفس الوقت ما حدا بيقدر يتذكر اكتر من 15 الف شاب اختفوا بالسجون, عشرات الاف الناس اللي ما كان الها علاقة بالاخوان و انقتلت او اعتقلت بناء على الهوية الطائفية اللي شاء القدر انها تطابقت مع الهوية الطائفية اللي ادعوا الاخوان انن بيمثلوها

الاخوان المسلمين مجرمين؟؟....... اكيد وارتكبوا جرائم ما بتنعد يمكن اكبرها برايي انو ما خرجن يشتغلو بالسياسة مشان هيك النظام استفاد كتير من غبائن و لولاهن ما كان قدر حافظ الاسد يفرض سيطرتو المطلقة على المجتمع السوري, بس بنفس الوقت لو حدا قارن جرائمن باداء الدولة الفظيع اثناء الازمة بتطلع متل اللي عم يقارن صواريخ حماس بالاسطول الجوي الاسرائيلي اثناء حرب غزة



عن جد بتمنى لو ينفتح موضوع بيسرد بطريقة موضوعية ومن مصادر متعددة تتابع الاحداث بهديك الفترة .