س: ما هي النصيحة التي قدمتها لك فيروز في بداية مشوارك الفني؟
ج: أعطتني نصيحة، وبدك تصدقيني، وياريتني سمعت هالنصيحة، قالتلي "إعمل لك شغلة غير الموسيقا، شفت بيّك شو عمل"... إنه خللي الموسيقا هواية.
س: البروفا في ألبوم "كيفك إنت"، نزلتها حتى تعطينا فكرة كيف بيكون التعامل أثناء التسجيل، بينك وبين فيروز، وهل المقطوعة خضعت لمونتاج؟
ج: هالقطعة مسجلة بدون علم فيروز، لأنه غير هيك، ما كانت قالت ولا كلمة، كان هنالك جهاز تسجيل أخر غير المسجلة اللي عم تسجل عليها فيروز صوتها، مشيناها وصرت اسألها قصدا بعض الأسئلة، لتجاوب عليهن، وما كان خاطر ببالها أبدا إنه عم نعمل هيك أبدا.
س: وقت اللي سمعتها في الألبوم، شو قالت؟
ج: قالت: لو مخبرني كان بيطلع أحسن من هيك!!!. هي عادة ما بتحكي بين المقاطع أثناء البروفا، لأنه بتضل "عتلانة" هم إنه ممكن فيه حدا عم يسجل لها، خاصة إذا فيه مهندس صوت تاني، بس أنا دوّرت المسجلة، وحضرت بعض الأسئلة إنه يفترض تقول هيك إذا بسألها هيك، وبعدين جمعت الأجوبة وعملت لهم مونتاج ونزلوا بالألبوم.
س: أنا غير مقتنعة أن الست فيروز ما بتحكي... أكيد بتحكي ومهضومة، بس ليش ما بترضى تحكي؟
ج: بتصور إنه فيها تحكي وبتحكي منيح، بس فيه عندها انطباع إنه مين الشخص اللي ممكن يسألها الأسئلة المناسبة لتحكي، يعني عملت بعض المرات مقابلات قليلة ، كانت تحكي وتفصّل، بس بتصور إنه لازم الواحد يقنعها إنه تحكي لأنه فيه أشياء ما حدا بيقدر يشرحها عن تجربتها غيرها.
س: ماذا عن عاصي الرحباني الأب، وماهي نصيحته بالبداية غير إنه يسمّعك موسيقاه؟
ج: هو اللي نزعني لأنو كان مش منتبه إنه أنا ما عم روح عالمدرسة، مع إنه هو اللي عم يبعتني، يعني وقت المفروض كون عم أدرس، يناديني ويقل لي شو عم تعمل، قول أنا عم راجع دروسي، فيقول هو بعدين بتراجع دروسك، كان عم يختبرلي إمكانياتي كمان، أنا بشوف هيك منيح، بس أمي كانت تشوف هيك مش منيح.
س: مين محظوظ أكتر برأيك، عاصي الرحباني بإبنه زياد أم زياد بإبنه عاصي ؟
ج: بفتكر أنه أنا المحظوظ أكتر لأنو أنا مكفّي بعد ما أخدت من أبي كل شي تقريبا.
س: نتذكر بعض الأسماء الهامة بالنسبة إلك، سيد درويش... اماذا تحبه إلى هذا الحد؟
ج: أعتقد أنه لو عاش مدة أطول، لكان وصل إلى شيء يشبه أعمال عاصي الرحباني، أو شيء له علاقة بها، بتصور إنه في خط واحد بالموسيقا العربية، اللي هو السهولة الظاهرية في الأغنية لدرجة إنه يمكن أن تسمى طقطوقة، لكن ضرب من الإعجاز أن تعمل شيئا على طريقتها، وأبلغ مثال على ذلك، مثال بسيط وعمومي، اللي هو "زوروني كل سنة مرة"، مركبة موسيقيا تركيبة عجيبة ونادرة حتى أن سيد درويش بنفسه لم يستطع أن يعمل لها "كوبليه"، "زوروني" عبارة عن مقطع واحد فقط...
س: لماذا لا نعرف نحن كمستمعين مثل هذه التفاصيل؟
ج: شو بدنا فيها... ماشي حالنا بلاها!!!
س: وماذا عن جوزيف صقر؟
ج: فيه شي تذكرتو كتير منيح، بس وصلت عالشام، اللي هو جوزيف صقر، عم اتذكر إنه أول اتفاق تم مع جوزيف صقر، لأنه هو كان بالكورس مع الرحابنه، وكنت أنا جايه مساعد أو معاون أكورديون في الفرقة، فأول اتفاق مع جوزيف تم على إنه يجرب يغني شي، وكنت ولد وقتها، شي 17 سنة، وبدي ألف عمل متل الرحابنة، عملت شي اسمه "سهرية" كان نسخة طبق الاصل عن مسرحية غنائية للرحابنه، الاغاني و الحوارات فيها كانت فقط حجة بهدف الترويج للأغاني، ومش مهم الحوار. حصل هذا الاتفاق مع جوزيف هنا في دمشق في فندق الشرق، وبعدها مع بداية الحرب الاهلية ، اصبح اسم جوزيف صقر مرتبطا عندي بدمشق، لان جوزيف في هذا الوقت كان يأتي دائما الى دمشق وهو لم يغنِّ خارج لبنان الا في دمشق، اي ان نشاطه كله كان في دمشق، لم يغنِّ في بيروت بمحلات او ما شابه.
س : هل تبحث بعد غياب جوزيف صقر عن صوت، ام انك تريد الاعتماد على الكورال ؟
ج: والله القصة صعبة كتير، في الفترة الاولى لوفاة الراحل جوزيف صقر لم أكن أدرك حجم غيابه، انا اعلم ان لديه شي مميز بشخصيته يحبه الناس اكثر من الشيء الذي في صوته، بعبارة أخرى أنه الشخصية مبينه بالصوت، وبالرغم من كثرة المغنين، لم نستطع اكتشاف أحد كجوزيف صقر وهذه مشكلة فعلية، الكورال لا يستطيع ان يحل محل الغناء المنفرد، هل تعلمين انه لولا وجود انطباع لدي من قبل عن الوصف والجمهور و كيفيه استعداداته لما استطعت ان اتخذ القرار بأن يغني الكورس بشكل متواصل بالرغم من ان الكورس ممتاز يغني انواع متعددة كالاوبرا والكلاسيك والشرقي، اي انه لولا انطباعي ان الناس ستغني ضمنا يعني اذا مو براسا .... على العالي، كان من الصعب اتخاذ هذه الخطوة... مبارح كانوا عم يغنوا "عايشة وحدا بلاك"، كان صوت الجمهور مسموع لدرجة ان العازفين اضطروا لتخفيف صوت الالات ليستطيعوا التفاهم مع بعضهم البعض ، لولا هذا الجو لما استطاع الناس تحمل الكورس فترة طويلة.
س: الكثير من الاصوات تحلم ان تغني من الحان زياد كما حدث مع الفنانة لطيفة، هل لديك الاستعداد لتكرار تجربة لطيفة، مثلا الفنانة اصالة صرحت ان حلمها ان تغني من الحان زياد الرحباني ؟
ج : اكيد، اذا كان هناك شي جيد و كلمات جيدة فلمَ لا، وطبعا هذا الشيء يعود للمغني فيما اذا كان يجيد الغناء ام لا.
س: هناك جوزيف اخر اود ان اسألك عنه و هو جوزيف سماحة رحمه الله وهو الذي اقنعك بالكتابة في جريدة الاخبار؟
ج: جوزيف سماحة صديق العمر و صديق حرب اهلية طويلة رحمه الله.
س: هل نستطيع العودة الى عاصي الرحباني بسؤال آخر؟ كنت قد صرحت في أحد اللقاءات انك اكتشفت أن كل ما كان يقوله لك عاصي عن امور عدة كان صحيحا الا رأيه في المرأة، هل انت اليوم ما زلت مختلفا برأيك عن رأي الوالد ام حتى كلامه عن المرأة اصبحت تجده صحيحا ؟
ج: ( يضحك ) ما الذي ادراكم، اعتقد انه ما كان على ان ان أتسرع وأصرح عن هذا الموضوع لاني اعتقد ان كل ما قاله عاصي كان صحيحا.
س: هل صحيح انك قد قدمت طلب زواج في السفارة التشيكية ؟
ج : نعم .
س: من ماذا يشكي زيوان البلد لتحضر قمح جلب!!!؟
ج: حاليا لا يوجد سوى المعجبات، الاعجاب شيء الزواج شيء آخر، بدك حدا تعيشي انت وياه ، المعجبة.. الى متى تبقى معجبة، من الافضل ان تبقيها معجبة، الاعجاب لا يبني حياة اسرية.
س: ما هي اهم صفات المرأة التي ممكن ان تعجب زياد الرحباني ؟
ج: لو كنت اعلم لكنت وجدت، وعندما يضع الانسان مواصفات ويعتقد انها هي الصفات المطلوبة يكتشف ان هذه الصفات غير موجودة وانه يستطيع ان يجد انسانة اخرى مناسبة أكثر ولا تحمل هذه الصفات.
س: كما تعلم ان عالم النفس فرويد قد قال ان كل رجل يبحث عن امرأة شبيهة بوالدته لانه لا يوجد اطيب من رائحة أمه وطبخها، انت كيف ستجد امرأة تنافس فيروز؟
ج: اذا فرويد طلع معه حق.. ما في امل، وبعدين اصبح الانسان بعمر لا يستطيع وضع مواصفات او شروط ، بكل الاحوال، هذه قصة قديمة، لكني لا زلت طالب زواج.
سؤال من المستمعين: هل أنت سعيد بهذا "التأليه" لشخصك؟
ج: لا أبدا، الأمر مربك.
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـ
you Fouad
كل ما قاموا بيت السلطان ليحدوه خيلهم .... بتمد الخنفسة رجلها