سلامات ... وأمّا بعد ..
1- الصورة #1 . شوط يا قمر ( 3 نقاط )
صورة شوط يا قمر تم اختيارها بالدرجة الأولى بداية ، للقدرة على توثيق هالاحساس اللي مالو حل ابداً بمكان وبوقت سريع الحركة جداً ، وسريع التغير أيضا من ناحية تعابير الوجه ، وحركة الايد ، والموضع بشكل عام ، بالإضافة لاختيار الزاوية المناسبة، ونهاية وهاد الأهم بالنسبة الي ، انطلاقا من مبدأ انه العدالة المطلقة لا توجد إلا في الموسيقى ، الظلم لا يمكن مواساته إلا بالموسيقى ، آلة العود الموجودة بالصورة لطالما ارتبطت ( معظم ألحانها ) بالرتم الحزين ، والحزن هو الجزء الأكبر المتولد بذاكرة أي شخص بحاجة للعدالة، فـ اخترنا هالصورة.
2- الصورة #9 . ياس (2 نقطة / نقاط )
صورة العم ياسين ، وما أدراك ما العم ياسين
اختيار هالصورة بالدرجة التانية تم بناءً على انه بعرف الخجل ( أو البخل ) الموجود عند ياسين من ناحية التصوير فـ هاد الشي اللي هو الجرأة بعودة ياسين للتصوير والمشاركة فيها عالعلن كانت سبب كافي لاختيار صورة ياسين بالمرتبة التانية ، بالإضافة لل (
) اللي ولدتو عندي الصورة ، واللي لحد هلق بكل مرة بتطلع فيها لأول وهلة بتبين عندي الشمس لتتحول تدريجياً لثقب ولدته رصاصة ما بـ نص هالانسانية .
وبس
3- الصورة #11 . لـ حسان "ذا لايت" ( 1 نقطة ) (1)
*(1) ... على الرغم من الذكر أو التلميح باستخدام الفوتوشوب ( بأكثر من مكان ) بصورة حسان لكن ما قدرت ما صوّتلها ، وطالما تم سابقاً الحديث عن منع استخدام الفوتوشوب لتعديل عناصر الصورة، لكن اللي بشوفو بصورة حسان هوي التعديلات التالية :
1- إضافة إطار للصورة
هاد الشي ما اظن بيلغي / بيعدل / بيغير / بيجمّل.. عناصر الصورة أو الجمالية ، وكإسقاط على أرض الواقع أي مشترك في مسابقة تصويرية ما ... لا / لم / لن يتم منعه من المشاركة إن فضّل المشاركة بصورته مع برواز ... او الصورة فقط مطبوعة على الورق / بدون برواز.
2- إضافة كلمة "إلى كريم"
هالإضافة لا تغير أي عنصر من عناصر الصورة، كمان كإسقاط متل الإسقاط السابق، إن شارك بصورة ما وحط اسمه او توقيعه او التاريخ ... الخ عليها ، فهاد رغبةً منه بحماية حقوق الصورة اله فقط ، وبالتالي صورة حسان مافيني اعتبر اضافة هالجملة بهالحجم الصغير أدناه تعديل عالصورة ... وغير ممنوع منطقياً .
3-
والأهم ، وجود المساحة السودا حول الشمعة هو بفعل الفوتوشوب، وعادة بيتم منع استخدام الفوتوشوب للقيام بتعديلات غير قابل القيام فيها على أرض الواقع وأثناء استخدام العدسة،
لكن :
3 - A ... افتراض عدم استخدام الفوتوشوب :
بصفتي مصوّر شبه احترافي ماني قادر أنفي انو هيك لقطة ممكن القيام فيها بدون استخدام الفوتوشوب فقط بامتلاك كاميرا مناسبة ، بإعدادات مخصصة ، وإضاءة معيّنة ليطلع الشكل اللي طلع مع حسان بإخفاء العناصر اللي كانت متواجدة حول الشمعة
3 - B ... بافتراض انه حسان استخدم الفوتوشوب :
متل ما قلت سابقاً منع استخدام الفوتوشوب هو منعه مشان استخدامه بتعديل عناصر الصورة اللي ما ممكن عملها باستخدام الكاميرا او الاعدادات او التقنية المناسبة ، وبكل بساطة هون ، باستطاعة أي شخص وضع لوح ورق أو كرتون أو بلاستيك مثقوب على المساحة الظاهرة فيها الشمعة لإظهارها بهالشكل هاد ، فلذلك بصفتي اختصاصي فوتوشوب ( ولا فخر ) بعتقد إن تم استخدام الفوتوشوب بهالصورة ، فهو ما أظن ممنوع حتى بالمسابقات الي على مستوى العالم ، طالما تم استخدامه لتسهيل وتوفير الوقت وليس لإظهار شيء او عنصر ما بالصورة ما من الممكن أظهاره بالوسائل التصويرية المعتادة.
وبالنهاية القرار بيرجع للجنة الحكم المعنية بالموضوع باحتساب صوتي ومبرراته من عدمه
بونص بوينت :
بحال تم رفض احتساب صوتي لصورة حسان فـ بفضّل صوتي يروح لـ :
- الصورة #4 . أبو طوني.
اقتباس:
|
حتى القضبان تزّهر \ احياناَ \
|
كانت عبارته كفيلة بإني اتحيّر لاختيار صورته ، وطالما التناقض كان يولد عندي متعة كبيرة ، فاخترنا هالصورة كـ خيار أخير
ودمتم
