[Danito]

أولا شكرا بنوتة حلب على تعليقك

كاتب النص الأصلي : جواد الكردي

قال الرسول عليه افضل السلام سياتي زمن على امتي القابض على دينه كالقابض على جمرة ولن ياتي العن من هذه الزمن زمن الاباحيه والانحطاط الخلقي الا من رحم ربي .

يا سيد جواد مع أنو جوابك المقتبس أدناه على شكل قصة بيسم البدن و فيه كتير مغالطات أنا جاوبت عليها بمشاركة سابقة بس يعني نحنا هون لنتناقش و نفيد و نستفاد و ندلي بآراءنا الواضح أنك ما قريت المشاركات المختلفة بس اسمحلي رد على نقطتك هي و فتح مخك معي إذا سمحت:

ا

ليكم يا سادة يا كرام هذه القصة ومنها نستخلص العبر واكون بذلك قد اجملت ردي واختصرت
وقف المتهم امام القاضي وهو يقول والله اني برئ يا سيادة القاضي
فقال القاضي كيف تقول انك برئ والشهود راءوك وانت تعتدي على البنت
قال المتهم نعم مزبوط ولكن ياسيادة القاضي لو رايت انت البنت لعذرتني ولحكمت عليها
فقال القاضي ااتوني بالبنت فلما جات البنت فأذا ربعها مغطى وثلاث ارباع جسمها مكشوف فقال اخلو سبيل هذا الرجل فانه معذور.

مع أنو هي القصة هي عبارة عن قصة من بنت خيالك لأنو الحكم بالمحاكم ما هيك يبتم بس العبرة وصلت، و هي تحميل المسؤولية على البنت بسبب لبسها هلق ممكن الواحد يعني تمر عليه القصة إذا كانت بمجتمع مغلق متل بعض الدول اللي بتفرض تغطية شبه كاملة للمرأة حتى لو كانت زائرة للبلد
طيب بس بمجتمعات متل سوريا تركيا لبنان مصر الجزائر جورجيا أرمينيا كزخستان الصين الهند و القائمة تطول مطرح ما بتعيش ناس من عادات اجتماعية متفاوته تتراوح بين المتحررة تماما و المحافظة إلى أبعد الحدود هل يجب برأيك فصل كل فئة بمنطقة جغرافية معزولة عن الأخرى حتى لا تحدث جرائم الاغتصاب المعفو عنها سلفا بسبب خطأ الفتاة بطريقة ظهورها (هاد كلامك انا مو موافق عليه بأي شكل من الأشكال)

طيب شو بالنسبة للاجئين و اللي هني بمئات الألوف و ربما الملايين اللي بيهاجرو و بيلجئو لبلدان أوروبا الشمالية مثلا (السويد الدينمارك هولندا بريطانيا ...) هي البلدان اللي ما بتطلع فيها الشمس إلا بأوقات متقطعة وقليلة و أول شي الكل بيعملو لما بتطلع شوية شمس هوي ارتداء ملابس خفيفة و كاشفة جدا بهدف التعرض للشمس و هاد الحكي ببلادهم و ضمن عاداتهم الاجتماعية و رؤيتهم للحياة المختلفة ، فهل برأيك ذلك يبرر للمهاجرين من مناطق لها نظرة مختلفة للجسد و المستور و المكشوف، مثل أن يقومو باغتصاب الإناث؟ (أنا هون عم اسقط فرضيتك) ربما اللي لازم تنتبهلو أنو الناس ألها رؤية مختلفة تماما بالحياة و لما بتصطدم هالرؤى ما لازم يكون نتاجها تبرير الجرائم
هلق حاليا ببريطانيا جاك سترو و معه كتير من المتطرفين اليمينيين البريطانيين عم يهاجمو المسلمات على لباسهم للحجاب و من منطلق أنو ببريطانيا هاد اللباس غريب و عم يشكل عائق لاندماج المرأة المسلمة بالمجتمع ..الخ .. يعني شو الفرق بينك و بينهم؟ لا أنتي أسوء أنت مو بس عم تهاجم الناس على طريقة لبسها أنتي عم تبرر الاعتداء عليهن

لذلك 90بالمئة من الاغتصابات تكون طوعية وليست قهرية وانا ارفض رفضأ باتأ ان ارتبط بمثل اولئك النساء

هلق هاد صلب الموضوع أنتي على أي اساس قررت نسبة التسعين بالمئة؟ هل درست الموضوع ؟ اطلعت على دراسات؟ بجميع الأحوال بس من باب التذكير الاغتصاب جريمة حتى لما زوج بيجبر زوجتو على الجنس و بالعنف هاد شكل من أشكال الاغتصاب (عم كرر مشاركتي هون لأنك شكلك ما قريت السابقة) الاغتصاب يا أستاذ جريمة شنيعة و هي ما بتصير متل ما صورتها أنو شاب ملاك ماشي بالشارع قام شاف بنت شيطانة كاشفة عن مفاتنها قام الملاك ما في قاوم القوة الشيطانية للبنت قام هجم عليها متل الملاك و بطحها بالأرض كمان متل الملاك و هي الشيطانة حاولت تقاوم قام هو الملاك الطاهر اطر يضربها شوي منشان ما يقدر يشقلها تيابها و يعتدي عليها جسديا و نفسيا .. آسف على التفاصيل بس ياريت تفكر قبل ماتحكي الاغتصاب مانو نشل و نشترة شغلة الواحد شدها و هرب ، الاغتصاب عمل عنيف و ما في اغتصاب إلا فيه ضرب و أذى جسدي بالإضافة للأذى النفسي اللي هوي أخطر ، و كمان كتير من المغتصبات بينتقلهم أمراض من المغتصبين و بيحملو باطفال هني ماكانو مخططين يجيبوهم و ما مستعدين نفسيا و ماليا لتربيتهم هادا عدا عن الوضع الاجتماعي الفظيع
بحب ذكرك أنو الاغتصاب بيصير مو هيك خبط لزق متل ما صورتو ، الاغتصاب بيصير لناس ضعاف غير قادرين للدفاع عن نفسهم ، يعني بنت ببيت لحالها أو بنت عم تطلع بموقف سيارات مافي ناس أو راجعة على بيتها بش زقاق صغير أو بمناطق نائية و اقرا الجرائد السورية لما بتنشر جرائم اغتصاب لتكتشف بنفسك شو هية نوعة الضحايا العامل المشترك الوحيد هوي كونهم غير قادرين على الدفاع عن نفسهم و غير قادرين على طلب المساعدة
بالإضافة لذلك أشنع أشكال جرائم الاغتصاب هي بالحروب و الحروب الأهلية حيث تتم بشكل جماعي و بدون رادع المحصلة جرائم الاغتصاب شنيعة و لا يمكن تحميل الضحية أية مسؤولية عن تعرضها للاعتداء و انتهاك إنسانيتها
و فقط من باب الإشارة هناك رجال يتعرضون للاغتصاب من قبل رجال آخرين (السجن أكبر مثال) أو حتى من نساء ، فهل يمكن القول أو السبب أن الرجل كان يرتدي ما يغري باغتصابه؟
بجميع الأحوال الإنسان لديه عقل يحكم تصرفاته و عندما يقوم بالاعتداء على آخرين عليه تحمل المسؤولية و حتى في حال كان ذلك ناجم عن مرض نفسي فهو يحتاج للمساعدة و التأهيل و بجميع الأحوال تبقى الضحية ضحية