منوصل للست النطاطة باتر فلاي
1- أول شي بحاجة للرواق, كتير رواق, رواق إلى حد الوحدة , كمان بحاجة إلى أنثى (دافع ) لأكتب, أو لشي حدث بحياتي ( في حال عدم وجود ملهمة ) يأثر فيني لدرجة أنو حب عبر عنو كتير, وقتا ما بقدر ما قوم جيب قلم و ورقة و حط عواطفي عليها.
2-ما بتصور عندي موقف دفاعي من الحب, يعني ممكن أنا بقول هيك أنو ما بدي حب أو شو ها الحب و الحكي الفاضي, بس بتصور أني كتير متصالح مع ها الموضوع, لما رح يجي حدا يعجبني لحبو ما رح وقف بوجه ها الشعور , متل ما أول حب مرق بحياتي إجا صدفة بحتة و نمى على مهل كتير و راح على مهل كتير , بتصور نفس الموقف رح يتكرر بالتاني أو التالت أو أو أو .......... أول مرة ما كنت عم دور عا ها الشي و بتصور عمري ما رح دور عليه , هو بيجي لحالو.
3-ما بتخيل أنو أنا من النوع اللي كتير بيتمسك بشي و ما بيفلتو, بس أنا اقتنعت أنو ها الشي ما بيناسبني, بتركو فورن و ما بتطلع ورا ضهري ولا بندم لحظة, فأي حب رح يجي عا الطريق ما رح يتأثر باللي قبلو, لأنو اذا اللي قبلو راح فأكيد راح و أخد معو كلشي إجا معو , بتضل بس الذكرى الحلوة و المودة اللي كانت, ما رح يكون في أي شي بيزعج الحبيب من هدول .
4-أنا ما بحب الخلطة كتير, الناس اللي بقربون عليي بنقيهن عا الفرازة , فاللي بيخلي الآخر يتعزب بالتعامل معي , أنو ما بحب قرب فجأة , يعني كتير بخلي مسافة لبين ما اتعرف عا الشخص, و بدي لأوصل مع أي حدا لعلاقة عميقة فترة طويلة, و اللي ما بيساعدني عا ها الشي أنو ما كتير بلاقي ناس عندنا تقريبا نفس اهتماماتي , كمان بحب شوي الركاز بالتعامل , و ببعد عن أي شي بيكون خارج عن ها الإطار كرد فعل أولي
غالبا بحب الهدوء كتير و ببعد عن الضجة, و خصوصي ضجة العالم التانية.
5- الثقافة مو قراية و كتب , ولا علم وشهادات, الثقافة طريقة تعامل , تحية قريبة من القلب , حديث ممتع و لبق , بأي شي , من الطبخ للعادات اليومية للمشي و التطليع و القعدة عا الطاولة, و طريقة ايصال فكرة أنو أنا مهتم أو مهتمة, فالمثقفة " بخمسة " هيي اللي بتعرف تتعامل مع الناس صح و بتعرف تحكي صح و بتعرف ليش عم تتصرف بالطريقة اللي عم تتصرف فيها
من المستحيل يطبقو أفكار شخصين, ولا سيما من جنسين مختلفين, بالإضافة أنو يكونو منجذبين لبعض , فأكيد ما بدور عا ها الشي, اذا كان موجود فخير وبركة بس اذا لاء ما بيأثر كتير
بصراحة لسا ما لقيت مثقفة بخمسة تجي عا قد خمستي , يمكن لازم نعبي بزر بليرة بس
6- غياب الأنثى بيولد نوع من الحزن و الفراغ, بيسرق أحيانا الدافع للطيش و المغامرة .
حضورا بعكس غيابا بيولد النشاط التفكير و التحفيز, بيولد النطوطة
و المغامرة و الاندفاع , ما بيسرق كتير بس ممكن يسرق شوي من حصة الغوالي بالاهتمام " و ها الشي بيدايقني شوي "
7- بنتي رح أسعى أنو ما تكون أنا , و رح أعمل جهدي أنو تكون هيي
8- بدي رد بسؤال........... ليش بتقرري عني
يا عبد متى رأيتني في الضدين رؤية واحدة, اصطفيتك لنفسي.