[Danito]

وحياة الشباب أنا ما كنت بدي علق و شارك بالموضوع مرة ثانية و بالأخص أنو الأخ اللي حاطط الموضوع يعني عم يناقش و يوجه الحديث بطريقة ما بتشجع للمشاركة..
بس كرمالك يا Hashtnasht حابب ناقش بعض النقط معك يعني..

يعني ما بعرف شو دخل القنبلة النووية بالحكي اللي حكيتو انا؟؟؟ إلا اذا كنت بتقيس تمدن و حضارة و ثقافة شعب معين بقدرتو على صنع سلاح نووي ...وقتا بكون بدي اعتذر منك...لأنو ما عندي شي قولو أبداً

يعني هو اللي قصده أنو مافي إنجازات جوهرية بعلوم معقدة و متقدمة بس ما بتصور بموضوع السلاح تحديدا

أنو يعني أنت بتحكي عرب يمنيح و اللبناني بيحكي عربي مكسر ..و مبسوط و مفكر أنك غلبتو واحد صفر !!!!

يعني هي الشغلة مو صراع و تنافس نقاط كل العالم خير و بركة..

أنو يعني بلبنان صار حرب أهلية معناها الشعب هنيك ما بيفهم ...؟؟؟ دخلك شو البلد اللي ما صار فيها حرب أهلية ؟؟؟

أي سمحلي هي الحرب الأهلية شغلة كبيرة و كبيرة كتير و وصمة عار مو بس على اللبنانيين و الفلسطينيين و السوريين (يعني هي كمسؤولية ما يبتحملها الأكثرية) بس يعني هي نقطة عار بتاريخ المنطقة و مو حدث عابر عرفت شلون يعني .. يعني ما هي مستمك من "سوري" على "لبناني" بس هون برجع لنقطتي الأولى أنو كل هذا النوع من الحديث يعني أشبه بحديث ولاد المدارس سيارتنا أحلى و أسرع لاء جدو كان أقوى من جدك..

أنو كل الأدباء و المفكرين و الفنانين اللبنانيين اللي طلعو من شقفة 10000 كيلو متر مربع ما عبو عينك ؟؟
لك نشيدك الوطني اللي هو حماة الديار ...صنع في لبنان !!! ليش بالله ؟؟ غريب ما هيك ؟ مع أنو في نعيم حمدي ....مع أنو في عصمت رشيد !!
نزار قباني سوري ....بس كان ساكن ببيروت ...مدري ليش ؟؟
لك جورج وسوف ....شقفة جورج وسوف ...تارك سوريا و ساكن بلبنان !! ليش ؟
كل الكتب المحرمة و الممنوعة لأسباب ( قذرة ) كانت تطبع و تنشر في بيروت ؟؟ ( قولك لنو هنيك الشعب متخلف يمكن ؟؟؟)

هي الحركة الثقافية لا شك كانت قوية جدا بلبنان و مازالت إلى حد ما حاليا بس مو مثل الأول و حتى هنن بمجال اللغة العربية عندهم بحاثة و جهابذة بس يعني هي الأمور مو حصرية فيهن و أنت نفسك قلتا المبدعين السوريين كانوا يروحوا على لبنان يعني بكلام ثاني البلدين فيهم مبدعين و مواهب بس بلبنان في حرية أكثر و هي النقطة عامل في منتهى الأهمية لظهور المواهب بشكل أكبر و هجرة المواهب إليه.. و الفوضى اللي كانت أبان الحرب كان من فوائدها شبه انعدام للرقابة و بالتالي نشطت حركة الطباعة و التأليف و الترجمة (بس كملاحظة كان ألها مساؤها من قبيل عدم احترام حقوق الملكية الفكرية و السرقات الأدبية و تدني مستوى الترجمة و التعريب بسبب الرغبة في الأسبقية على حساب الجودة) يعني فيك تقول موضوع كبير و ما بيتلخص بسطرين و ما بتم قرائته بشكل مسطح...

أنا ماني فهمان ليش نحنا كسوريين عنا هالنفسية ( الجقمة ) يعني أنو نحنا سوريين و هيك متل الطير النافخ ريشو !!
انت قلي على شو بالله ؟؟

يعني معك حق بهي شغلة نفخ الريش على أساس القومية بس يعني هي مو شغلة سورية اللبنانية رب مين نفش ريشه و على الفاضي... (مو الكل بس يعني نسبة لا يستهان بها أبدا)

أنت ع شو مبسوط بحالك انك سوري ؟؟

هي ما حبيتا منك حبيب يعني الواحد ما لازم يكون متعصب أو عنصري أو متعنجه مهما كانت جنسيته أو عرقه لأن إن كان هيك فهو الدليل على محدوديته و غباءه لكن الواحد ما بيمنع يكون عنده حس انتماء و هادا الحس بيدفع لأنه ياخد من هالانتماء و يعطيه و يفخر بحاله و بانتماءه بمعنى يكون أله هوية (مو بمعنى التعصب و العنجهية)

ا

نت قاعد بروسيا مدري باوكرانيا مشان تجيب شهادة من هنيك ؟؟ غريب !! مافي جامعات بسوريا ؟؟

ليك في طلاب من بلدان كثيرة عم يدرسوا بسوريا حتى بالجامعة كان في معنا طالب ألماني إكستشنج (تبادل طلابي) يعني هادا موضوع طلب العلم شي تاني و بعدين الطلاب اللبنانيين منتشرين بالعالم مع أنه عندم الجامعات الخاصة (الأميركية و غيرها) موجودة من سنين و لعلمك في كثير دكاترة سوريين بيحاضروا بلبنان و الأردن (على سبيل المثال لا الحصر الدكتور إياد الشطي دكتور محاضر بالجامعة الإميركية ببيروت)

يعني مشان الله أخواتي....كلياتنا سوريين و كلياتنا منعرف شو الوضع ....و ما حدا يقول كف عدس....مجلس الشعب تبعنا بعبر عننا ....حتى لو ما نحنا اللي انتخبنا بعبر عننا ...بدو ...نحنا

يعني إذا في وضع سياسي معين و قهر هادا الشي ما بيعيب الشعب يعني نحن شعب مسلوب الإرادة كليا أو جزئيا

شعب بدوي .....طبعا يمكن انتو تنصدمو شوي...لأنو أكيد انتو اللي هون نخبة هالمجتمع وما عم تحسو انو اللبناني افهم و اوعى ...يمكن لأنو انتو عندكن مستوى وعي وفهم ما بخليكن تحسو هيك.....بس الشعب السوري بالمجمل متخلـــــــــــــــــــــ ـــــــــــــــــــــــــ ـــــف
شعب جاهل ....شعب لا يقرأ ....شعب ما عندو لا مسرح و لا سينما

لك نحنا شعب ما عنا مؤلف روائي.....و اذا طلع شي مؤلف او شي شاعر ..منقتلو ...مندبحو و منحسب الله ما خلقو ....نحنا شعب لهلأ منعتبر التمثيل فلتنة وقلة حيا ....و مع هيك منحب نحضر افلام و مسلسلات !!
نحنا شعب ..........

مرة ثانية يعني اسمحلي اعكس نقطتك هون و قلك أنو مو كل الشعب اللبناني هو اللي بتشوفوا على ال بي سي و المستقبل الحقيقة مرة أكثر من هيك بلبنان و الناس الفقير و المهجرين و المهمشين هدول مانون قلال بلبنان و مشاكل الفقر مانها قليلة بس يعني أسابها مختلفة عن سوريا.. و من جهة ثانية لا تحكم على الناس من طريقة عيشها لبسها و همومها لأنو في سوريا في كثير ناس مثقفة و قارئة نهمة و في مناطق نائية و بالرغم من شظف العيش و قلة التسهيلات .. يعني بس أنت عملك جولة بالإنترنت و على المواقع السورية أو اللي يبكتب فيها سوريين مثل الحوار المتمدن و معابر و عشرات المواقع الأخرى و شوف الكتاب و المفكرين السوريين اللي يبكتبوا من سوريا عدا عن اللي عيشين براتها يعني و شوف مستوى كتاباتهم، يعني و إذا بدنا نبلش نعد المفكرين السوريين يعني قائمة طويلة جدا
الملخص : كل شعب عنده مفكرينه و مبدعينه ، أما أنك تلقي أحكام جائرة و مسبقة و تعمم و تقولب .. الخ و هادا الشعب متخلف و هادا متطور يعني هادا الشي ما بيزبط و في ردود أله و خاصة لما عن تحاول تقارن شعبين مثل السوري و اللبناني .. يعني مرة ثانية لا تحكم من خلال اللايف ستايل أو نمط الحياة (الأكل الشرب اللباس) الواقع بيقول كل شعب عنده مشاكل و نقاط ضعفه و هي المقارنة اللي طرحا أحمد نون يعني و بالأسلوب و البنية اللي استعملها يعني حكي جرايد صفرا أكثر ماهو حكي موزون و محاولة لفتح حوار بناء و مصارحة مع الذات..
يعني و بحب قلك أنت بالنهاية سوري و شخصيتك هي نتاج هادا المجتمع و تفاعلك معه و الخ أما تعتبر حالك حالة استثنائية و من النخبة و أن البقية كمجموع مختلفين بشكل جوهري و تصفهم بالتخلف بكلمة واحدة و نقطة على السطر يعني هادا تقييم ذاتي و غير موضوعي
تحية لألك و بتمنى كون وضحت وجهة نظري