ميزات الأغنية الشعبية ببلدنا ( سورية ) :
أكيد للأغنية الشعبية أو الجبلية أو الساحلية أو ( أغاني الكراجات ) ميزات كتيرة ما لح أقدر أحصيها كلها و هي بعض منها :
1 - بتلاقي مدة الموسيقة ( الزمر ) شي نصف ساعة و عدد الجمل اللي بقولهن الفنان أو "المطرب" جملتين أو تلاتة يعني بكون معك مجال لحتى تسلطن و تنطرب على صوت ( المجوز ) .. ملاحظة : المجوز آلة موسيقية مشهورة عند البدو والعرب القدماء
2 - نوع المشاعر بالغنية كيف بدي أشرحها هي ، مثلا : ( سمرا و أنا الحصودة ) بتسمع الغنية و بعد ما تسمع الغنية و بعد ما تستمتع بالغنية بتقرر أنت شو بتشعر يعني حب أو حزن أو شوق ما بتفرق المهم أنك سمعت الغنية ...
3 - شدة الشوق لسماع الأغنية يعني أنت هي الأغاني مافيك تسمعها وين ما كان فبتشتقلها و الأماكن اللي فيك تسمع فيه هي الأغاني متل الكرجات أو مكاري الضواحي و الجبل و إلخ .. نادرا ما تزورها و أنا واثق أنك لح تشتاق لأغانيها ...
4 - عدم فهم الأغنية و هي ميزة كتير مهمة لح تسألوني كيف .. لح أشرح بإختصار فمثلا أنت لم تسمع أغنية مميزة كتييييييييير متل أغنية ( سامحتك ) أو ( شلونو ) ما لح تقدر تفهم الأغنية من أول مرة بسبب المفردات الجديدة و الغريبة و هيك لح تضطر تسمع الغنية مرة و تنين و تلاتة و أربعة ... لحتى تقدر تفهم الغنية شوي على الأقل ....
5 - عدم وجود حقوق نشر للأغنية و هي الميزة كتير حلوة يعني مثلا أغنية ( بس أسمع مني ) فيك تسمعها بصوت سارية و بصوت محمد نور و جلال حمادة .... يعني هيك فيك تسمعها بأكتر من صوت و هيك بتقدر تنوع و تستمتع أكتر و أكتر ...
6 - الحماس : و هي الميزة أنا شخصيا بحبها كتييييير فا و أنت عم تسمع الأغنية و مبسوط بتطلع عبارة " أدبح " أو " عاشو " أو " عرب عرب " ، " يا ولوووو " و هي العبارة بتأثر فيي كتير و بشكل مو طبيعي و بتخليني متحمس من أول النهار لأخرو ...
7 - هي الأغاني مناسبة لكل المناسبات يعني فيك تسمعها بالعرس و بالعزى و قبل النوم و قبل ما تفيق و بعد ما تنام و قبل الغدة و بعد السحور و لما تروح للجامعة و لما تروح رحلة و بس تفوت للحمام ..... ما في مشكلة يعني مو مقيد بالزمن أو بالحالة النفسية ...
8 - تميز هالنوع من الأغاني يعني مثلا و انت عم تسمع غنية متل ( بس أسمع مني ) بس تقلك " أسمع بس أسمع .... " من كتر مو مميزة بتتمنى لو أنك أطرش طبعا بتتمنى لو أنك تطرش من سبيل المزح مع حالك .
9 - من كتر مو حلو هالنوع من الأغاني و بأثر كتير بالأحاسيس و المشاعر بكل بساطة ممكن تجيك جلطة أو سكتة قلبية ( طبعا من شدة التأثر ) و تروح فيها و هيك بتكون أرتحت من الدنيا و مشاكل الدنيا و هموم الدنيا ... و متل ما لاحظتو هي أهم ميزة على الإطلاق .