[yass]

هيدا الكلام بيصح بالدول يلي فيها اساسا شي اسمو عمل سياسي اما بدولنا العربية باعتبار انو لا في حرية راي ولا حرية سياسية صارت هالمطالب مطالب سياسية لاحقوقية ولا مدنية من هون اجا الاختلاط

الحقوقية و المدنية هي شروط أساسية لعمل سياسي سليم.. و ليس العكس. يعني مشان تقدر تشتغل بالسياسة لازم يكون هناك نضال مسبق من أجل الحقوق السياسية, و النضال من أجل الحقوق السياسية هو نضال حقوقي و مدني و ليس نضال سياسي (بس تحقق المناخ الملائم للعمل السياسي, نبدا بالعمل السياسي).

فولتير بيقول انو "قد أختلف معك بالرأي, و لكنني مستعد أن أضحي بحياتي في سبيل أن تقول رأيك" و هالجملة, عدا عن المعنى الانساني الكبير الموجود فيها, تحمل أساس حكينا.. أنو أول شي ما بيهمني للوهلة الأولى شو انتمائك السياسي أو الفكري, أهم شي انو نكوّن بيئة نقدر نحكي فيها بدون خوف و لا تهديد.. بس توفرت هالبيئة معناتو ساعتها نبلش ننتف بعض فكريا و سياسيا..

شعلة عدم التبعية بتوقع كتير صعب انو توصل لمنظمات ما الها تبعية لانو مهما كان شكل المنظمة فهي بحاجة لتمويل وباعتبارها مؤسسات غير ربحية فالتمويل ناتج اما عن تبعية لجهة ما سواء سياسية او دينية وبالتالي تاثر موقفها بموقف هالتبعية او عن طريق التبرع .. ومتل ما قال الماغوط بغربة ... تبر شووووووو؟؟؟؟ يعني ما ممكن تلم تبرعات الا يا دوب واذا تبرع حدا بمبلغ كبير صارت بشكل او باخر تابعة الو وبتخاف من فقدانو وهي حال كتير من هيك منظمات حتى باروبا

أكيد.. هاد تهديد موجود دائما, لكن بالمقابل, الاستقلالية شرط أساسي لبناء منظمة مجتمع مدني, و منظمة مجتمع مدني غير مستقلة ليست منظمة مجتمع مدني انما هي منظمة سياسية أو دينية أو شو ما كان..

هاد الحكي النظري..

أما الواقع هو نوعا ما مزاوجة المصالح.. يعني الاستقلالية يجب أن يكون محافظ عليها, و لا مانع من اللجوء إلى جهات معينة لأمور نقطية تشترك فيها المصالح, أو تعاون جهات المجتمع المدني بحد ذاتها بين بعض (متل لما نشوف بأوربا شي منظمة عاملة سبوت و تلاقي تحت مكتوب انو بالتعاون مع كذا و كذا أو حتى شي وزارة)

برايي انا انو هي المؤسسات لازم يكون الها دعم من الدولة من دون ما تكون تابعة الها بالمعنى السياسي او الديني يعني انو يكون الها مخصصات محددة بالقانون تبقى مع تغير نظام الحكم وبيصونها القانون من التطفل الخارجي ..
غير هيك بتوقع انو هالجمعيات ما رح تقدر تستمر لفترة طويلة ...

المجتمع المدني جزء من الدولة.. لكنه جزء من الدولة بالمعنى الصحيح للدولة, يعني ليس النظام الحاكم... و شي طبيعي انو تمويل أي هيئة مجتمع مدني لازم يجي إلى حد ما من الدولة (و كل ما كبر الـ" إلى حد ما" كل ما أحسن).. في عندك مثلا بالقانون الضريبي الاسباني في جزء من ضرايبك يروح لمنظمة مجتمع مدني انت تقررها.. بس هالجزء رايح رايح يعني... و عاطينك الخيار اللي أنت تفضلو

المفهوم الصحيح للدولة هو مانو مفهوم ايديولوجي أو فكري.. الدولة الصحيحة هي دولة مؤسسات, و في جزء من هالمؤسسات تابع ايديولوجيا لجهة محددة خلال فترة زمنية محددة (و هالتبعية تمس بعض المظاهر و الأولويات و ليس جوهر عمل هالجزء من المؤسسات)