[أم الجود]

يظهر أنك فهمت كلامي غلط
أنا ما عم قول انو نحنا ملايكة و أكيد في بمجتمعنا السوري (متل كتير مجتمعات عربية) ظواهر سلبية و مؤسفة منتمنالا تزول و الدولة تاخد حيالا موقف .. بس شو جاب لجاب مجتمع سوريا لمجتمع السعودية ؟؟!!؟ يعني إذا أنت حابب تحكي بلسان الطرف التاني لتقرب وجهات النظر و ترفع عنو الظلم ما في مانع بس ما تبالغ بنظرتك و شوف الواقع بموضوعية أكبر ... ما فيك تمسك جرائم الشرف و تنسى أشياء كتيرة و مهمة بتتمتع فيها المرأة بسورية ماممكن المرأة السعودية تحلم فيها ولا بعد 100 سنة .. أبسط شي الحجاب (اللي هو حرية شخصية و حتى بالإسلام نفسه مو إجباري) أنا عندي أكتر من صديقة سورية متزوجات من شباب عم يشتغلوا بالسعودية ... أول أول شي ما فيون يطلعوا من البيت بلا العباية السودا ولو كانت الدنيا عز دين الحراقي (مع انو قسم كبير منن مسيحيات و الباقي مسلمات مو محجبات) تاني شي ما بيحقلن يسوقوا سيارة .. هادا اذا ما بدنا نحكي عن المرأة العاملة و اديش نسبتا و شو بتشتغل و ما بدنا نفوت بمتاهات عن قوانين الأحوال الشخصية و الإرث اللي اذا عنا ممكن نقول عنا ظالمة فهي عندن مجحفة و مالا علاقة بالإنسانية بحق المرأة ...
أما بالنسبة لملاحظتك بخصوص السياح فهي معروفة و مفهومة .. أكيد اللي صاححلو يطلع لأوروبا و الفار ايست (محل ما اللي عم يشوفوه بالأفلام فيون يشوفوه شخصي) أكيد ما رح يجي لعنا و يلحق بالمصايف كل بنت آخدة راحتا شوي باللبس (لأنه عقله المحدود صورله ياها على أنها عاهرة) لحتى يعرض عليها مصاري و هو واثق و متأكد أنها ما رح تقدر ترفض لأنه نحنا شعب اندبوري و منفرط ادام القرش و كل شي ببلادنا فيو يحصل عليه بمصريات بتروله اللي عم يبيعو بتراب المصاري لمعلمينو الأميركان ...
يمكن نظرتي غلط أنا ما عم اعتبر حالي على حق و غيري غلطان بس أنا ما عم بقدر بطلع من صورة انه هالشعب عايش ببلاده كبت رهيب وصل لدرجة انو ما عاد عقلو يفكر غير بالجنس و الرجال ما عاد قادر يشوف المرأة غير من زاوية جنسية بحتة .. بدك تقلي عنا كمان الشباب هبك بقلك يمكن بس الموضوع نسبي .. يعني انت لما بتطلع من بيتك بتصدف جارتك ع مدخل البناية بتسلم عليها و بتطلع بالسرفيس بتقعد جنبك أو مقابيلك صبية (بغض النظر عن شو شكلا حلوة او بشعة) و بتروح على شغلك و عالطاولة اللي جنبك زميلتك بالشغل بتحكي معها و يمكن بتشربو قهوة و بتحكو عن هالدنيا .. و بعد الضهر اذا كنت مرتبط فيك تطلع تتمشى مع خطيبتك بالطريق و انت ماسكلا ايدا ... أكيد أكيد أكيد ما رح يكون متلك متل السعودي اللي بكل نهارو ما بيشوف وش مرا غير أمه .. هي إذا كانت أمه سبور أو ما كان هو يتيم ..!