[بيلسان]

موضوع بيجنن يا عاشق من فلسطين
مفيد وممتع وغني جدا
يسلمو دياتك

اسمحلي أضيف هالتعريف الصغير عن حنظلة
الشخصية اللي ابتكرها ناجي العلي بعد النكسة عام 1967
واللي رافقتو بكل رسوماتو وكانت البوصلة اللي بتوجه كل أعمالو

حنظلة يُعرّف بنفسه...

عزيزي القارئ اسمح لي ان اقدم لك نفسي .. انا وأعوذ بالله من كلمة أنا ..
اسمي : حنظلة ، اسم أبي مش ضروري ، امي .. اسمها نكبة وأختي الصغيرة فاطمة ..
نمرة رجلي :ما بعرف لاني دايماًً حافي ..
تاريخ الولادة : ولدت في (5 حزيران 67)
جنسيتي: انا مش فلسطيني مش أردني مش كويتي مش لبناني مش مصري مش حدا .. الخ ،باختصار معيش هوية ولا ناوي اتجنس .. محسوبك انسان عربي وبس ..
التقيت بالصدفة بالرسام ناجي .... كاره فنه لانه مش عارف يرسم .. وشرحلي السبب .. وكيف كل ما رسم عن بلد .. السفارة بتحتج ..الارشاد والانباء ( الرقابة) بتنذر ..
قلي الناس كلها اوادم .. صاروا ملايكة .. وآل ما في أحسن من هيك .. وبهالحالة .. بدي ارسم بدي اعيش .. وناوي يشوف شغلة غير هالشغلة ..
قلتله انت شخص جبان وبتهرب من المعركة .. وقسيت عليه بالكلام ، وبعدما طيبت خاطرو .. وعرفتو على نفسي واني انسان عربي واعي بعرف كل اللغات وبحكي كل اللهجات معاشر كل الناس المليح والعاطل والادمي والازعر .. كل الانواع .. اللي بيشتغلوا مزبوط واللي هيك وهيك .. وقلتله اني مستعد ارسم عنه الكاريكاتير . كل يوم وفهمته اني ما بخاف من حدا غير من الله واللي بدوا يزعل يروح يبلط البحر .. وقلتلو عن اللي بيفكروا بالكنديشن والسيارة وشو يطبخوا اكتر من مابفكروا بفلسطين ..
وياعزيزي القارئ .. انا اسف لاني طولت عليك .. وما تظن اني قلتلك هالشي عشان اعبي هالمساحة .. واني بالاصالة عن نفسي وبالنيابة عن صديقي الرسام اشكرك على طول .. وبس ..

التوقيع (حنظلة)

هادا كان تقديم الفنان ناجي العلي لشخصية حنظلة وتم نشر التعريف مع أول رسم كاريكاتوري بيحمل صورة حنظلة بصحيفة السفير ..


* * *



ناجي العلي : " كنت أشعر بخوف من أن أضل وأن يفسدني المجتمع الاستهلاكي ، ولكي أحافظ على ذاتي وأمنع نفسي من الشطط أو السكوت خلقتُ هذا الرمز .. حنظلة .. وقصدت من وجوده أن يبقى طاهرًا وعفويًا .. لكي أبقى صاحيًا مستفزًا وحتى لا يتحجر إحساسي أو أضلّ أو أتخلى عن واجبي نحو القضية "