اقتباس:
كاتب النص الأصلي : hashtnasht
طيب ..رح وضحلك وجهة نظري نتفة.
انت عطيت مثال بينطبق تماما ع الشي اللي عم قولو , و هو القوانين المتعلقة بما يسمى جرائم الشرف .
انت مثلاً يا ابو طوني ....و كونك انسان مدرك تماما انو عقوبات ما يسمى جرائم الشرف هي عقوبات مخففة جدا , فهل يمكن بحال من الاحوال ( لا سمح الله ..و الله لا يقدر يعني) انك ترتكب جريمة شرف بس لأنو الحكم رح يكون مخفف ؟
هلأ صحيح انا ما بعرفك ..بس من عندي بقلك انو لاء , و السبب هو انت ما القانون , السبب انك انت ك بني ادم عندك قدرة انك تفهم انو هي جريمة ....شي غلط يعني ...غلط و ما بصير نغلطو ....حتى لو ما كان في رادع , الرادع جواتك انت .
بنفس الوقت في حمير الله يعزك ..و منتشرين بشكل عشوائي و كثيف , و يعني ما كتير بهمن القانون ...بغض النظر ان كانت عقوبات هالقانون رادعة او مخففة ....هدول الحمير عندهن قناعة انو في شي اسمو شرف لازم يحافظو عليه , و مستعدين يضحوا بالغالي و الرخيص يعني في سبيل هدا الشرف الخطير , و ما رح تفرق معهن ابداً اذا كان رح ينحكمو اعدام او 6 شهور , المهم الشرف ....لانو بتعرف , يعني الجياة ما الها معنى اذا كان الواحد عكالو منكس , كيف بدو يقعد بين الزلم ؟ اي حبل المشنقة اهون بشي مليون مرة !!!!
القوانين يا ابو طوني بتجي استجابة لتطلعات المجتمع , بتجي لحتى تناسب التطور الطبيعي للمجتمع , و ليس العكس . يعني وقت المجتمع بحس انو هالقانون صار ديق عليه , و عم يعيقو بغير القانون لشي تاني , بس ترى ما صار بالزمنات انو انحطت قوانين و بعدين المجتمع استجاب لاجتياجات القوانين , يا اخي بدك تقول انو القوانين هي العربة و المجتمع هو الحصان ..او الحمار اذا بدك ..المهم انو هو الحيوان اللي قدام العربة يعني  |
ما بدي نفوت بقصة جرائم الشرف مشان خصوصية الموضوع بس بهاد الخصوص بقلك اني مقتنع تماما بأن الخطوة الأولى للحل بتجي بتغيير القانون وعدم وضع تسهيلات وامتيازات للمجرم .
بحسب رأي الشخصي بشوف بأنه القانون قادر على تطوير المجتمع لا بل وظيفته تطوير المجتمع
كمثال حي على قدرة القانون تحسين الواقع
حاليا في بالقانون مادة بتحدد العمر الأصغري للزواج بالنسبة للذكور بـ 16 سنة
والاناث إذا ماني غلطان بالـ 13
فعليا البنت اللي عمرها 13 سنة أقرب ما يمكن للطفولة ، حتى لقب مراهقة ما دائما بصح اطلاقه على هلعمر
وقت بدك تسمح شخص عمره 25 سنة بالزواج من طفلة !! فبتكون انت عم تقدم ستار لهلتطرف الما بعرف شو ممكن سميه .. انه بنت عمرها 13 سنة قادرة تصير زوجة وأم وتربي أولادها ؟ شو وضع هلأولاد اللي بدن يتربوا على ايد شخص خبرته بالحياة صفر مكعب ؟
وقت بتم رفع سن الزواج لمتل ما عملت بعض الدول الأوروبية للـ 18 سنة بتكون عم تقضي على ظاهرة "زواج" الأطفال بالمجتمع وهون بيجي دور القوانين لتحسين المجتمع
بده يكون المجتمع حمار حصان كديش ما بتفرق معي وما بختلف معك
بس القوانين هية اشارات التوجيه اللي بدها ترسم الطريق ليعرف هلكديش يمشي متل بقية الكدايش
اذا بدنا نعتبر القانون اللي بين ايدينا ناتج عن رغبة المجتمع فمعناها مجتمعنا السوري بأبشع أحواله ومافيه شي اسمه تقبل للآخر وكل الحكي تبع انا سوري آه يا نيالي مو اكتر من ضحك على البقية والكل منتظر أول فرصة لينهش بجسد التاني .. ما بعرف اذا كنت كتير متفائل بس ما بعتقد هلقانون انعكاس لمجتمعنا
اقتباس:
كاتب النص الأصلي : أم الجود
شو مشان هالسؤال اللي ما حدا جاوبني عليه ؟؟
|
ما حدا مرق على هلرد من الحوقيين المختصين ليعرفوا يجاوبوا على هلرد
بعتقد .. مجرد اعتقاد انه هي الحلات صارت بتدخل بالعلاقات بين الدول اكتر مما هية بقانون الأحوال الشخصية وبتلعب دور جنسية الأشخاص + المكان اللي تم توقيع العقد دور كبير بتحديد وجهة القانون
يعني بسوريا زواج المسلمة من المسيحي لا يجوز في حال المسيحي بقي على دينه
منسمع بكتير حالات سفر إلى لبنان ليقدروا يوقعوا عقد الزواج ويرجعوا .. وهلشي بصير بشكل كتير كبير
بس انه بيرجعوا على اساس هنن لبنانية ... او بتم تغيير الدين للزوجة مشان يلتفوا على القانون .. بدك تشوفي حدا بيعرف بهلقصص كيف بزبطوها بس أنا متأكد انه بصير هيك حالات