[مالك الحلبي]

تنفيييس: طفّي الخلوي واقعدْ * كامل النصيرات

افتقدنا للقعدات العائلية الحميمة ..هذا كلام لا غبار عليه ..؟ وين أيّام العيلة ما كانت تقعد وهات يا قرّ وهات يا ضحك و مزح ..العيلة بكل أركانها ..العيّل قبل الشايب و البنت قبل الشب ..؟، كانت تجمعنا بطيخة و إبريق شاي إمْطَعْوَجْ..ولا تفرقنا إلا الحاجة الحقيقية للنوم ..،، أما اليوم ..كل وين ووين حتى تجتمع العائلة ..وإذا اجتمعوا يكونوا لابسين رسمي ..إللي لابس بدلة (لأنه مستعجل و جاي يطلطل ع السريع ) ..وإللي قاعد يستنى برنّة من الخلوي حتى يلتحق بموعد مهم (عاد لا مهم ولا) ..وإللي يستنّى بمسلسل باب الحارة ( يحضره للمرة التاسعة على التوالي) ..وإللي مرتو تغمزه فيقعد يتنحنح استعداداً للقومة ..وإللي وإللي وإللي ..،،المهم في كل القعدات العائلية الحديثة ..هناك رفيق في كل يد ..وهو الخلوي ..يرن خلوي أحدهم ..ورغم أن الرنة مختلفة عن رنات الجميع ..إلا إن الجميع (يفطّون) و يمسكون خلوياتهم ..فيستعرض إللي رن خلويه وهو يبتسم : هاظ تلفوني أنا يا جماعة ..،،ويبدأ مسيرة العرط : أيوا ....هلااااااااااااااااااااا ا والله ..وين من زمااااااااااااااااااااان ما سمعنا هالصوت ( عاد قبل نص ساعة حاكيين مع بعض ) ..ها ها ها ها (هاي الضحكة لزوم الفشخرة) ..وتنتهي المكالمة بهذه الجملة : خلّي إلْـ (ألو) بينا ..،،العائلة كلها قاعدة من صغيرها لكبيرها ..أحدهم يحكي في موضوع و البقية ماسكين الخلويات يبعثوا بمسجات ..(كلّو بًكَبًّسْ) ..وترى شبه ابتسامة مع الكبس على (إرسال) ..وترى ابتسامة واضحة عندما تأتي مسج لأحدهم (لشعوره بالأهمية) ..والمشكلة أن اللي يحكي بقصة مفكّر الكل متابع حكايته لأنه يسمع منهم هذه العبارات : لا اله الا الله ..ويكبًّس على الخلوي..معقول ؟ ويكبًّس ..إيييه دنيا ..ويكبًّس ..كل شي يصير هالأيام ..ويكبًّس..،، وعندما ينهي قصته ويضحك ..تجد الجميع قد فقعوا من الضحك تضامناً معه و يعودون للتكبيس ..ويقول أحدهم : يفضح شنينك (لا أعرف ما هو الشنين) ..وآخر يقول : يخرب مَـطَـنَّـكْ مَـطَنّ ..،،أعتقد ولا أبالغ باعتقادي أننا بحاجة إلى اطفاء الخلويات عندما نكون في جلسة عائلية ..حتى نستعيد بعضاً من دفء القعدات القديمة ..ومش غلط إنو كل عائلة تركّب جهاز التشويش ع الخلويات ..أو يطفّي جهازو و يحطو في كندرتو و يقعد..،،..ولو سمحت طفّي جهازك وإنت تقرأ بالمقال ..،،