أنت مين؟
عطفا ً على موضوع .. قهوة دايمي .. اللي بعتبرو بيشبه سوريا لدرجة البكي ..
خطر ع بالي
اسألكـ .. أنت .. اي انت .. مين أنت ؟
لما بتعمل صندويشة زيت وزعتر وبتاكلها مع كاسة شاي الصبح .. علما ً أنو انت بتصنف حالكـ من الناس اللي مو لاقيين ياكلوا ..
ولما بتقعد جنب صبية بسرفيس .. وبتحاول تورجيها انو أنت هاي كلاس وبتصير تمارس أساليبكـ المبتكرة دايما ً لتجذب انتباهها ..
(علما ً أنو حواليكـ بالدول المستعربة أنكـ تقعد جنب بنت بسرفيس حلم عم تتكالب عليه العالم)
لما بتشوف شب وصبية .. عم يعمروا دنيا ع قياسهم بس هنن التنين .. بنظرة أنو (بحبكـ) ممنوعة بكتير محلات غير هون .
لما بتعيش تعتيركـ اليومي .. وأنت عم تنحت ورا اللقمة .. وبترجع آخر الليل بتضم مرتكـ وبتنام .. وبتفرشلكـ شعرها تحت تعبكـ .. وتبرد عرقكـ ..
لما بتمشي بحارة .. و بجيبتكـ خمسين الف ليرة وما حدا بيطلعلكـ وبيقللكـ تلت التلاتة اديه ؟ وأنو هاد السبب اللي خلا أنو مو فارقة مع اللي خلقنا ازا صار عنا نظام الكريديت ولا لأ ..
لما بتنطعج من شرطي .. بيوقفكـ .. وبيقللكـ مخالفتكـ خمسمية هات ميتين ليرة ووفرها ع حالكـ ..
لما بتوقف ع طوابير المؤسسات الحكومية .. و بتستنا ألله يفرجها ويبعت ملايكتو تسعلكـ المعاملة اللي بتكون فتيت عليها مصاري .. بتعمر بيت .
سوريا عفكرة هي كل هدول ..
مين أنت ؟؟ إزا ما قاسمت سوريا الحلوة والمرة ..؟؟
إزا ما تعبت وشقيت برغيف الخبز ؟
ازا ما استحملت سوريا شوي .. إزا نرفزت وطلع خلاقها ؟ مننلكـ الشرف يكون اسمكـ سوري ؟
أصلا ً أنت بتعتبرو أنو شرف ؟ ما بظن
مين أنت .؟ إزا أصلا ً بتصير تتمسخر وتقول( أنا سوري آه يا شحاري) ؟ أنو خفة دم يعني ؟
مين أنت لكان ؟؟ وين محلكـ بين هالناس اللي بتحب وطنها أكتر من ألله .. ؟؟
مين أنت بين الناس اللي كل ما يناموا ويقوموا .. بيسبحوا بحمد سوريا .. وشكر سوريا .. ع أنو عطتهن أمومتها .
بدكـ ديمقراطية .. مو ؟
منشان شو ؟
منشان تاكل بسطرمة بدل الزيت وزعتر ؟
ولا منشان توصل للسلطة وتصير أنت ديكتاتور بدوركـ ؟
صدقني أنت لو طلعت عالكرسي لتجوهر وأكتر بكتير من غيركـ
لأنو في كتير أمثالكـ بتحب تخلع رقبتهم .
مين أنت ؟
إزا قمة إنجازاتكـ ... أنو طبلت وزمرت وسبيت وشتمت ولعنت ..
شو أنجزت ؟
كم وردة زرعت ؟
كم وردة قطفت ؟
كم دمعة نزلت منك وأنت عم تشوف غادة شعاع وهي عم ترفع علم سوريا بنص أميركا .؟
كون سوري .. واعبد البحص والشجر والبشر والشام عند شقشقة الضو
حاسب ساعتها من ما بدكـ
هون بقللكـ يخليلي ياكـ ما انزهكـ،
أراكـــــــــــ عصي الدمع ..شيمتكـ الصبر ..
أما للهوى نهي .. لديكـ ولا أمر ..
نعم أنا مشتاق ٌ وعندي لوعة ٌ ... ولكن مثلي لا يذاع له سر ..
|