اقتباس:
|
كيف تفسرت معك أنو من ضمن صلاحياتها تفريق زوجين . يعني بيكونو تنين عايشين مع بعض بتجي بتفرق بينهم ؟ . التفريق حيكون اذا طرف اشتكى على الأاخر مثلا . والقاضي رح ينظر بالقضية . وهاد كان موجود بصيغة تانية من الاول . وتصويرو بأنهم حيفرقو بين الأازواج من دون وجه حق . هو يلي أعتبرتو تفسير (بشكل معين) . لاتحتمل كل كلامك . وكلنا منعرف أنو مثلا لما كان بالأول المسيحي يتزوج من المسلمة . كان المفروض أنو يكون مسلم . وهاد الشرط ما أشترط أنهم يروحو يشوفوه ملتزم ولا أسلم بالحكي بس . وهاد الشي مابعتقد أنو تغير هلأ
|
شو رأيك بدل ما تكذّبني تقرا مشروع القانون و تشوف شو صلاحيات النيابة العامة الشرعية (النائب العام بالتعريف هو قادر على تحريك دعوى من دون شكوى, يعني لما يشوف انو في شي يستحق التدخل ممكن يتدخل), و أنا هون ما حكيت عن مسيحي تزوج مسلمة و لا بالعكس, ما بعرف ليش عم تقولني شي ما حكيتو....
القانون يقول صراحةً و جهاراً انو النائب العام الشرعي من حقو يطالب بتفريق زوجين مسلمين اذا اعتبر انو الزوج مرتد عن الإسلام... يبقى اذا ما بدك تشوف هالشي هون ما عادت مشكلتي...
اقتباس:
|
القانون بعتقد لحظ خصوصية كل الديانات والطوائف . وكلمات متل مطاوعة وطالبان وغيرها . لاتمت للقانون بصلة . وهي مالها اي تفسير . الا انها هجوم غريب وكلمات كبيرة . الغرض منها الأثارة فقط
|
ممكن اطلب منك ما تفسرلي لألي شو غرضي من الحكي؟
أنا قلت انو القانون طالباني, و هالشي صحيح و هاد رأيي, و أنا قلت انو مو ناقصون غير يعملو مطاوعة بهالبلد بعد هالقانون و هاد شي صحيح و هاد رأيي, و كلا الشغلتين ما دخّلتون بالقانون....
أما اذا بدك تعطي كلامي معاني من عندك لتنتقص منو لمجرد انو القانون عاجبك و لازم كل اللي ما عاجبو يطلع هيك و هيك و هيك معك... فوالله أنا أأسف جداً على انك تستخدم هالمنطق هاد
اقتباس:
|
كل دولة بدول العالم الها خصوصيتها . فرنسا مثلا تمنع تعدد الزوجات . رغم أنها مضرب مثل للعلمانية . وحجتهم أنها تنافي قيم الدولة . ومع ذلك المسلمين ممكن يلاقوها تدخل من الكفرة والزنادقة بعقائدهم ( على نفس المبدأ يلي المنابر العلمانية السورية عم تناقش فيه المشروع) . الا أنها ملتزمة بتطبيقو
|
أنا كمواطن سوري قدك تماماً أرفض اعتبار الأفكار الظلامية الموجودة بهالقانون خصوصية سورية, أرفض هالشي رفض قاطع, نحنا ماننا هيك, و كونك إسلامي لا يعطيك الحق انو تفرض انو هيك
و شو رأيك نخلي فرنسا و غيرها ع جنب... لأنو على الأغلب لو نبلش نقارن نطلع خسرانين... أقل مافيها فرنسا انو فيها قانون أحوال شخصية مدني هو اللي بيحط دور الدولة بالأحوال الشخصية, و بعدين اللي بدو يتزوج حسب دينو و طائفتو هو حر و عندو كل الحق...
صعبة كتير هاي؟ حق و حرية كتير صعبة؟؟؟
اقتباس:
|
أنا معك بهي النقطة . وبعتقد أنو القانون يجب أن يوضح هذه النقطة أكثر
|
لازم يوضّح؟ يا أخي القانون هيك!! بشكل واضح بيقول هيك... الكبيرة (ع حكي القانون) وليها والدها ثم جدها ثم أخيها... واضحة مية بالمية...
اقتباس:
|
مابعتقد انو تغييب ارادة الأاكثرية فكرة صائبة . بتتخيل أنو بألمانيا مثلا ممكن يمشي هيك قانون طبعا لأ . لأنو الغالبية رح تكون ضدو . والقانون بعتقد بيضل أرحم من ماحملته بعض النظم التي تعتبر متطورة . متل يلي صار بمحجبات فرنسا . لأنو الحجاب مو مجرد رمز . أو حصل لمحجبات تركيا من أنتقاص لحقوقهم
|
أرحم لأنو جاي ع مراقك؟؟
شو صعبة انك تشوف انو جريمة بحق غير المتدينين (و مش بس الملحدين)؟ و للا هالجماعة كخة؟
القانون و الدستور ببلد لازم يكون للكل مو للأكثرية مهما كانت الأكثرية ساحقة, لأنو المواطنين متساوين بالحقوق و الواجبات و من حقهم انو القانون ما يميّز بيناتهون على أي أساس, و من واجب الدولة انها تلاقي صيغة قانونية تحتوي الكل, و مش صعبة ملاقاتها لو في نية, بس مافي نية.. و في مين فرحان على فرض فكرو
و برجع بقول بمقارنات فرنسا و ألمانيا منطلع خسرانين, و قميص عثمان (قضية محجبات فرنسا) كالعادى تستخدم بشكل منقوص و صفراوي (هون أجي أنا أقول انك عم تستخدمها بصفراوية) لأنو الحجاب بفرنسا يمنع بالمدارس فقط لاعتباره رمز ديني, بس كمان ممنوع الصليب و ممنوع الطربوش اليهودي هاد, مافي فرق.. و مهما كان الرأي حول القانون لا يمكن المقارنة, لأنو الحكي عن فرنسا هي بمدارس عامة, للدولة, المدارس الخاصة تعمل شو ما بدها....
بفرنسا تمشي المرأة بالشارع محجبة و ما حدا الو عندا شي, تروح و تطلع و تفوت و لابسة برقع اذا بدك (أي أنا بسوريا بعمري ما شفت برقع... شفتو بمدريد) و ما حدا الو عندا شي...و ما بدي اعمل مقارنات ما بين فرنسا و سوريا لأنو واقع مختلف... بس الواقع المختلف لا يعني أبداً مثل ما تقصد انو و الله خصوصيتنا انو اسلاميين و الشريعة الاسلامية لازم تمشي. هاد مش عدل, أبداً مش عدل