اقتباس:
كاتب النص الأصلي : قرصان الأدرياتيك
أهلا...
إذا كان كلامك موجّه لمشاركتي، كوني ذاكر "التخوين" فبتمنّى عليك (مرة تانية) قبل ما تعلّق تقرا المشاركة منيح وما تطفّ عليها... يعني أنا حطيت بين قوسين معقوفين أنّو كلامي موجّه لكل من يحكي بهيك أسلوب (متل ما جاء بالخبر).
|
أول شي لا ابدا ما كان كلامي موجه الك
اقتباس:
كاتب النص الأصلي : قرصان الأدرياتيك
وما بعرف أنّو تخريب منشآت وحرق علم البلد، ورفع علم قوميّة أخرى لسّاتها مانها دولة، شو بيعني بنظرك؟ وطنيّة مثلاً؟!
|
أكيد مو وطنية, بس لازم تعرف شو اللي وصل الامور لهون لانو ما في حدا بيولد من بطن امو مجرم
اقتباس:
كاتب النص الأصلي : قرصان الأدرياتيك
بكل الأحوال أنا ابن هديك المنطقة وربيان طول عمري هنيك وعنّا إذا بدّك المدن والقرى الشماليّة في غالبيّتها العظمى كرديّة، وبنعرف تماماً كيف بيعيشوا وكيف بيفكروا... فبقى مو ناقصنا دروس تنظيريّة، بتكفّينا الدروس العمليّة الآخدينها هونيك! والقضيّة مانها نظام وموالاة وأمّة بطيخيّة... إلخ!
|
بهي ما بقدر قلك لاء بس انا كمان بعرف اكراد من اللي عايشين بالمدن الكبيرة وهني عكس اللي عم تحكي تماما
اقتباس:
كاتب النص الأصلي : قرصان الأدرياتيك
طيّب أنا رح خبرك وبلكي تتنبّه، ورح أحكيك عن أحزاب الجزيرة (يللي جوات البلد مو براتها)، في عنّا أكثر من 17 حزب كردي بيناتهن أكتر من 17  بيدعو للانفصال!!! ولو أنّو في حزبين منهن بيحاولوا يلطفوا الأجواء عبر الدعاية والإعلام، بس إذا بتفوت بين الأعضاء بتشوف أنّو وييييييييييييييين حكين ووييييييييين مطالبهم وأهدافهم الحقيقيّة.
|
هدا مو حكي , انت عم تحكم علين من النية, يعني حتى لو اعلنوا انو ما بدن انفصال فبتقلي اكيد عم يخبوا اهدافن الحقيقية......... يعني بكل الاحوال هني بنظرك مدانين بتهمة الخيانة
اقتباس:
كاتب النص الأصلي : قرصان الأدرياتيك
وكرمال ما تقول هيك ولا هيك رح أعطيك مثال... أنا بزماناتي زرت العراق مرّة وحدة ودرت من الشمال وحتى بغداد... الشمال دولة مستقلّة وإذا بدك تدخل على أراضيه لازم تتفتّش وينشاف بسبورتك ومن هالحكي، المهم بعد ما تدخل للشمال الشمال رح تشوف لافتات الطريق بالكرديّة والحكي بالكرديّة والمدارس والأسواق بالكرديّة... إلخ! وأنا شخصيّاً ما بدّي يصير هالشي بمنطقتي...
ليش مين قال انو بجو هيك شي يصير؟؟ انا عم احكي عن اعطائن حقوقن كاقلية عرقية عايشة بهالبلد من مئات السنين , يعني حقو يتعلم لغتو كلغة تانية مع العربية مو كبديل عنها
أنا ولدت عم أحكي عربي (مع أنو قوميتي مو عربية) وبدي حافظ على لغتي هي وبلدي هاد واللي مو عاجبو لــ حفض القرد! (طبعاً هون الكلام موجّه لكل من يطالب بانفصال منطقتنا عن جسد الوطن الأم).
هاد تاني باشتان...
|
يعني اذا هدا مو اسمو منطق اقصائي فما بعرف لكن شو بتسمي؟؟ على عيني لغتك العربية وانا كمان بعتز بلغتي العربية بس التانيين شو ذنبن؟؟ اذا هو مو عربي و ما بدو يصير عربي شو بتعمل في؟؟ بتقلعو برا البلد؟؟
اقتباس:
كاتب النص الأصلي : قرصان الأدرياتيك
يا رجل أنت مصدق هالحكي؟! والله العظيم زعلان ومن كل قلبي أنو السوريين مو عارفين شو عم يصير عنّا وكأنّو نحن من كوكب آخر... وأقسم بذات العزّة أنّو نحن محافظة من سورية...
تعا خال لودّيك بإيدي لعند شي 5 أساتذة لتعليم اللغة الكرديّة في المناطق حيث الأقليّة كرديّة. لأن حيث الأغلبيّة ما في حاجة لتدور على أستاذ... لغة البلد كلها هيك بتكون...
وأنا، وأعوذ بالله من كلمة أنا، أخدت كام درس على إيد أستاذ كردي وبكتاب يعلم اللغة الكرديّة بالعربيّة يُباع بمكتبات القامشلي...
فأنو مطالبة وأنو حقوق... هن بدن مدارسن وكل شي عندن بالكرديّة، ليش يا أخي بالكرديّة؟! ليش وين عايشين نحن بطوالستان؟! لغة دولتنا الرسمية هي العربيّة وبدّا تضل هيك حتى يقترحولنا لغة بديلة، وحتى ذلك اليوم المعهود... إي حتى ذلك اليوم... بلاها!
|
ليش؟؟ لانو بكل دول العالم الاقليات بحقلها تتمتع بشوية حقوق, لك اسرائيل بتسمح للفلسطينيين بتعلم لغتن و نحني اللي المفروض الاكراد ولاد بلدنا بدنا نعربن غصبن عنن!!!
وين المشكلة يعني لو سمحتلن يعملو مدارسن الخاصة متلن متل الارمن والسريان وغيرن؟؟ وين الغلط لو سمحتلن يحتفلو باعيادن مو هيك بتكون حسستن انن سوريا هي فعلا بلدن
وبما انك ذكرت قصة اكراد العراق, ياريتنا نتعلم من اللي صار هنيك
نتعلم انو البسطار العسكري بعمرو ما بيجمع شمل وطن