[Danito]

كاتب النص الأصلي : chefadi

هلأ الحل الاقرب للواقع برايي هو نظام اقتصادي جديد يطعمي الشعب الجوعان و يخلق فرص عمل للشباب و يحمي حقوق العمال وطبعا هادا كلو بظل نظام ديمقراطي علماني بحت اما كيف بدنا نوصل لهاد النظام ؟؟؟؟

هلأ هون بالذات تكمن المشكلة ، حافظ الأسد بعبقريته السياسية و قرائته العميقة للواقع المحلي و العالمي، و بأسلوبو المتجدد باستمرار ، نقل آدوات السيطرة من القمع و الاعتقالات و سيطرة الأجهزة الأمنية ، يلي أصلا بتطلب أشخاص و شبكة علاقات معقدة ممكن بمرحلة متقدمة يتمردوا أو يشكلو خطر (على حيدر، محمد حيدر ، عبد الحليم خدام) هي الأسلوب تحيد ببداية التسعينات و صار إفراجات عن المعتقلين بالآلاف تقريبا تفرغت السجون و تحول التركيز على الناحية الاقتصادية يعني نحنا مع أنو اقتصادنا مهلهل و الإدارة الاقتصادية المهلهلة هي السبب ، بس اللي بيتابع الوضع بيلاحظ أنو نحنا قدرنا ندمج اقتصادنا "الاشتراكي" بالنظام العالمي الجديد، و رغم أنو الدمج مشوه بس يعني هو أخد مكانه و بشكله المشوه دخل بالتركيبة ، طبعا الغائب الأهم كان المواطنين و اللي صار عكس مبادئ الحزب و الاشتراكية ، زيادة غنى الأغنياء و فقر الفقراء.. هلأ هي كلها مقدمة للرد على السطرين: آدوات السيطرة الحالية هي السيطرة على رأس المال و "الأستاز" رامي هو مو مجرد مشروع تكديس أموال على طريقة أنو ما بيشبع، هو أغمق من هيك لما بتطلع نكتة "لحتى تشتغل بالبلد لازم تكون يا مخالف يا مخلوف" هي مع كل السخرية اللي فيها بس هي بتعبر عن الواقع بشكل مختصر، يعني يا بتكون جزأ من تركيبة الفساد و معناتو ما فيك تعترض عليها أو حتى علقان جواتها يا أمى بتشتغل و مصالحك مرتبطة بجماعة الحكم، و بهي الحالة حتى في أهم الديمقراطيات العالمية اللي بيحسم القول هو صاحب المال لأنو هو اللي بينتخب و هو اللي بيتمثل .. و الاقتصاد مسيطر عليه تماما يعني محاربة الناس بأكل عيشها و بخبزها اليومي
هون بدي حط ملاحظة أنو اسلوب الاعتقالات الجماعية الرئيس بشار رجعها و هو بجميع الاحوال استفاد من المرحلة السابقة و ما افرزته من شرعنة اعتقال أصحاب الرأي المخالف من خلال قوانين فضفاضة و مخالفة لروح الدستور: قانون الصحافة ، بنود الإخلال بالوحدة الوطنية و الروح القومية..

برايي متل ما حكي الكهربجي انو حكومات الثورة و زمن الثورة انتهى يمكن تكون الثورة الفكرية هيي البديل و مابيمنع هاد من شوية اضرابات للعمال (متل عمال معمل فرات ) شوية اعتراضات لطلاب الجامعات (جامعة حمص) ,,,

التغيير الحقيقي ممكن يتم عن طريق نقابات العمال و اتحادات الطلبة و اتحادات الحرف الصغيرة و مجالس الإدارة المحلية لأنو هي بيطلع منها ناس من عمق معاناة الشعب و متحمسة و مبدأية و عقائدية
المشكلة أنو هي الجهات كلها تم تفتيتها و إعادة صياغتها و مثال صغير كتير ، اتحاد نقابات العمال بيرأسه بعثي و الدولة بيحكمها البعث : أنت الحاكم و المحكوم؟؟ نظام الإدارة المحلية بوضعو الحالي هو الخنجر في قلب إمكانية تحسين الأوضاع المحلية المواطنين (صرف مقدرات الدولة بما ينفع الأهلين و ليس بما يغني بعض المتعهدين الفاسدين)
يا سيدي كلمة إضراب ملغية و خلال تدجين المواطنين تم تعويدهم أن الشكل الوحيد للخروج للشارع هو مسيرات التأييد أو سب الأجانب (يعني حتى كلمة إضراب أو مظاهرة مو مستعملة

يعني انا ماعم طالب انو يتغير النظام مو مهم من اللي عم يحكم بعثي او شيوعي او قومي المهم هو التحسين القتصادي و بعدين منبئا منرجع منفكر بالمادية الديالكتيكية و بكارل ماركس و غيروووو

هادا اسمه وعي سياسي متقدم ، و توازن مع الذات و إذا الأجيال الجديدة بالأحزاب بتفكر بهي الطريقة نحنا بألف خير

تحياتي و بعتذر ع الاطالة ,,,

قلتلي إطالة ؟ شوف ردي لكن: جريدة