سوريا الله حاميها
سوريا الله حاميها
سوريا الله حاميها
سوريا الله حاميها
مع أنفلوزنا الطيور عيطنا وزعبطنا وقت اصاب المرض تركيا
ونط من فوقنا على الاردن
وانطلق متل الرصاصة جنب خاصرتنا .. بس اجت الرصاصة سليمة وصابت جارتنا لبنان
وسلّم علينا ولوحلنا بايده من بعيد وهوي قاعد على مجرى دجلة ليعكف على بلاد ما بين النهرين
بس ارتحنا وقت صار كل هلشي وما مر علينا بالمرة .. حتى فنجان قهوة ما استرجى يشربه على أرضنا الصفراء ( ببعض النسخ خضراء بس بأغلبية الأوقات بتكون صفراء )
والسبب واضح كتير .. بالمختصر المفيد السبب هوي أنه سوريا الله حاميها
مرة تانية جرب الزمن يلعب لعبته
رجع عدّل أسلحته البيولوجية وعمل خلطته الغريبة العجيبة وطلعلنا بأنلفوزنا الخنازير
انتقلت الانفلوزنا للبشر وصارت باسم انفلوزنا A
انه يعني عم تتلملعن يعني ؟
هع هع
الله بالمرصاد يا معلم
ومنعيد ومنقول سوريا الله حاميها
ليك وينك
اذا مانك مصدقني نط على أقرب مركز لوزارة الصحة واسئلهم وسماع الجواب بادنك
يمكن أول ما موظف الريسبشن يشوفك معبوط ومعجوق بحالك يبتسم فيك ويقلك " لا تعتل هم ..سوريا الله حاميها "
يا سيدي اكتر من هيك
بزمناته صار بالبشرية شي اسمه " جنون البقر "
الله يبعد الجنون عنك وعن احبابك من البشر والبقر على حد سواء
مع انه الجنون بالعادة بكون شي مفيد بس ما حلوة قلك "عقبالك" فبتمنى تفهم موقفي
المهم طلع مرض اسمه جنون البقر
وهاد ما كان معدي بين البشر بس اللي بياكل مخ بقرا وهوي نية بصير معه " التهاب المخ الاسفنجي "
يعني ما بينتقل من انسان لإنسان
حصرا من بقرة لإنسان او من بقرة لبقرة والله أعلم
وشو بتتوقع صار ببقراتنا ؟
لك اي اي طلعوا نيئة عن الخليقة وما انصابوا فيه
يا اخي حتى البقرات السورية .. الله حاميها !!
ليك خدا مني الله عامل حماية حصرية على كلشي اسمه سوريا
فاذا بتسمي ابنك او بنتك مع الأيام "سوريا" بكون كتير منيح
صدقني بتوفر من حق اللقاحات مبالغ رهيبة بتخليك تصيّف بأحلى فيلا بالشاطئ الازرق كله
وخدا نصيحة من عمك أبو الطونه الشاليه رقم 40 افخم شاليه بالشاطئ كله
بتنعزل عن البشرية والطبيعة بطريقة خرافية
لك مستعد قص ايدي من شروشا اذا بيصلك نسمة هوا
سألني الي استئجرناها انا وأهلي وقت كنا صغار ولهلق بينحكى بالشاليه 40
صارت مضرب مثل متلها متل خفي مدري شو كان اسمه
منرجع لإذا سميت ابنك او بنتك سوريا
تخيل حالك هيك ما احلاك وانت قاعد هيك على شاطئ الرمال الذهبية وابنك عم يحوم حولك متله متل النمل الأبيض ( جماعة المخابرات يعني .. يلعن مخك شده سميك )
ويجي هلسوريا الصغير يتزعرن ويشلف عليك سطل من مي البحر
تنط عم تسبه " سوريا يا كديش شو عم تعمل فيني "
بهاي الحالة لا الله ولا غيره رح يتعرف عليك .. صدقني ما عم ذل عليك بحرف واحد
رايحة تزور
كوخ مسحور
|