[Danito]

آه بنفخ نفحة بتطبخ طبخة
هلق شيلو كل شي على جنب و الله انا عندي تعليق على موضوع تجديد البيعة يعني سخيف بس انو منشان مدري شو بدي اعرف انو ما في غير بيت الأسد؟ على راسي الجماعة كل الناس خير و بركة بس انو يعني بس من باب التغيير ما في مجال يجيلو شي رئيس تاني؟ عن جد مو مزح انو في ملل بالموضوع .. انو مكانك راوح و انا هون ما عم احكي لا فساد و لا إنجازات و لا غيرو و لا سياسة بس هيك التغيير حلو يا زلمة يعني الواحد أحيانا بيكب كنزة مو لأنها مهترية بس لأنو صرلا زمان و مل من سماها ..

اما عن كلام الكهربجي فهو معو كل الحق هلق انا برأي المشكلة مو بالتوجه الاقتصادي و السياسي بحد ذاته بس بغياب الخطة يعني أو عدم كفائة الخطة و عدم واقعيتها و النظام ربح جولة بس هي ما بتكفل استمراروا بعدين هوي النظام وجد لخدمة الشعب و لا الشعب اللي بيخدم النظام؟ يعني ليش السبيل الوحيد للتغيير هوي انقلاب عسكري او احتلال على طريقة العراق؟ يعني النظام و الناطقين باسمه بيرددوا انو الشعب مو جاهز للديمقراطية او التغيير و هاد الحكي من اكثر من سبع سنين طيب هني شو عملو لتغيير هالموضوع؟ بما انهم شخصو المشكلة بعدم جاهزية المواطن و تشخيص المشكلة نص الحل ؟ وين النص التاني؟

العالم حبينا او كرهنا صار ضيعة كبيرة و رفاه البشر عم يزيد تدريجيا بكل العالم بس في فئة محتكرة هالاستفادة وبتحمي احتكارها بالعنف و الفساد و السلطة و الأخيرة هي اخطر شي لأنها بتعطي غلاف قانون للتنتين الأوائل.. يعني لما بيطلع قانون بيخلي السلطة حكر على مجموعة معينة و لما بيطلع قانون بيفرض عقوبات بالسجن و غيره على المعارضين و لما بيطلع قانون بيسمح للجيش بالتعدي على دول تانية او مدنيين تانيين هاد هو اللي عم احكي عنو و يعني و لو زعلو منا كتار بس بالميزان تتم إدانة أنظمة سوريا و اسرائيل و العراق و اميركا و السلفادور و الصين و بريطانيا و يمكن كل دول العالم لما منحكي على أفعال معينة متل قتل المدنيين متل اغتصاب حقوق البشر تحت مسميات فضفاضة و رنانة (ديمقراطية، مكافحة ارهاب، أمن وطني، وحدة وطنية، دفاع عن النفس، و كل الخربطات و الشعارات التانية)
يعني نحنا ما فينا نحكي عن تحرير كل البشر بس يعني فينا نحكي عن كسر الحلقة عنا ، في نحكي عن تغليب الحقوق المدنية للمواطنين و جعل الفساد الاستثاء و ليس القاعدة

يعني مين للفقراء بالوطن اللي بيعيشو من قلة الموت ؟ مين للناس اللي مضطرة تكافح و تتنازل عن كرامتها و مبادئها و عزة نفسها و حتى اخلاقها .. بس لتبقى على قيد الحياة هني و ولادون؟ ما الناس مفطورة على غريزة البقاء و يلي هي غريزة أساسية .. و الحفاظ على النوع يعني الحفاظ على الأطفال .. يعني هاد قانون طبيعي الله حاطو و الله ما بيغيرو (هي للي بدو ياخدها دينيا) و الله ما في يغيروا لانها جزأ من الدي ان اي تبعنا : يعني الناس بدها تعيش بس المشكلة لما منخلي طموح الإنسان و قضيته الاساسية محصورة بهي الغريزة الأساسية و كل شي ما عداها خارج نطاق إحساسون و رؤيتون يعني بأربع كلمات : تجريد الإنسان من إنسانيته
هلق بجوز تقولو الوضع مو بها لسوء.. اي يمكن .. او يمكن لا

يعني حتى لو حكينا عن تجريد الإنسان من جزأ من إنسانيتو هاد مو ظلم ؟ طيب يعني إذا هاد الشي عم يصير بشكل يومي طيب هاد بالصدفة؟ هلق إن كان هو نتيجة جانبية لممارسات معينة أو هدف بحد ذاته من الممارسات ما عاد يهم : يعني ما بيهم انو تفقير الشعب و تجهيل هو هدف الحكومة الفعلي أو نتيجة لأهداف التانية (السيطرة على الحكم و احتكاره) لأنو النتيجة وحدة لا و الأسوء أنو إذا كان منتج جانبي معناتو ما في خطة للتصرف مع هاد المنتج لما بيصير أخطبوط كبير ، لما الناس بتتحول إلى نمور جريحة و بتستشرس على بعضها يعني و منفوت بعراق تاني بأميركا و بدونا..

طيب مو بالضروروة نوصل إلى أسوء الاحتمالات بس مين اللي قال أنو نحنا السوريين كتب علينا أنو نقبل بالحد الأدنى من الرفاه و الإنسانية أو إذا مو الحد الأدنى بحدود منخفضة من الرفاه و الإنسانية و أنو لازم نصلي و نركع للحكومة من شان "الأمان" اللي اصلا ما عم نشوف غير قشوره ؟ مين اللي قال أنو نحنا لازم نعيش مذلولين ببلدنا أو نتغرب و نضل مكسورين و مقهورين؟ حتى الناس اللي بتدعي انها مبسوطة بالنظام و ما بدها الخيارات البديلة عم تكافح شعور الإنكسار و الهزيمة اللي جواتها و تضحك على حالها

بجميع الأحوال مبروك للقائد الشاب و الفذ النجاح الباهر اللي حققه بالأستفتاء الأخير