ياجماعة خلينا نرجع للموضوع شوي :
خير الأمور أوسطها يعني لا غلو ولا حقد أسود ... احترام الرئيس أو الأمير أو المليك واجب بس مو معناتها نطلعو لعند الله ... لأنه بالنهاية هو بشر متله متلنا اللهم الا انه مستلم اعلى منصب بالدولة ... انا لست مؤيد ولست معارض .. صحيح في بعض السيئات متل الرشاوي والفساد وغلاء الاسعار والواسطة الخ ... بس بالمقابل في بعض الحسنات .. متل الأمن والأمان يعني انا بمشي بشوارع الشام الساعة 3 بالليل بعرف حالي أن مافي عصابة حتختطفني وتطالب بفدية متل مو صاير بالعراق أو واحد يعتدي علي بشبرية او بسلاح متل بعض دول تانية واقربها لبنان نسبة الاجرام والعصابات فيها مرتفعة..
بعام 1998
انا كنت بدرس بالمرحلة الثانوية بسوريا ... بتفاجأ وقت الاستفتاء على تولي الخالد المؤبد الإله حافظ الأسد ولاية أخرى طلعونا مظاهرة تأييد بالغصب واذا مابتطلع الك حساب تاني...
شيء اخر أجو لعندي عالفصل اعضاء من حزب البعث العربي الاشتراكي ... واحد منهم صرخ بأعلى صوتو : مين بدو ينتسب لحزب البعث طبعا انتو بتعرفوا المزايا يلي حتحصلو عليها ووو الخ ... المهم كلهم سجلوا الا انا .. أجا لعندي هذا البعثي وقال لي : ليش مابدك تنتسب للحزب ياابني ... انا رديت عليه قلتله مو جاية عبالي التزم بجدول معين ونشاطات معينة باعتبار انا بسافر كتير .. رد علي بعصبية وبصوب عالي : اكيد انت ابن عمو لنتنياهو
... نتنياهو وقتها كان رئيس الوزراء الاسرائيلي .. انا حبيت اقصرها مشان مااروح بخبر كان قلتله الله يسامحك
.. انا زلمة بسيط ماشي الحيط للحيط وياربي السترة
... أمانة هاه اذا بدك شي من السعودية قلي انا طالع بعد اسبوعين
... المهم سكت وتركني ... بتفاجأ لمن أنا اطلع برا الفصل بشوف البعثي نفسو عميستناني قالي : اسمع انا خليتهم يغضوا الطرف عنك بدي منك تجبلي بارفان ظريف وتقيل من السعودية بدي اهديه لخطيبتي عقبال عندك ... قلتله من عيوني الف طلب متل هالطلب بس انت حل عن ربي ..
هاي قصة واقعية صارت معي ومالي اي مصلحة اكذب ... على زمن حافظ كان الوضع زفت بس يمكن انا صار عندي شوية امل لمن استلم بشار الحكم ان هيك حالات ماعاد نشوفها وانا بتمنى ذلك لأن هيك حالات بتشوه الوجه الحقيقي لهذه البلاد العظيمة ولهذا الشعب العظيم ...
وبالنسبة لحب الرئيس مو ضروري نعلق صوره وين ماكان ونبصمله بالدم ... مافي داعي لكل هالغلو والنفاق يكفي ان حبه بالقلوب وصور الرئيس مو لازم تعلق الا بالدوائر الحكومية من اجل هيبة الدوائر الحكومية ...
انا زرت عدة دول لم أرى أحد من مواطني تلك الدول علق صورة رئيس دولته بالاماكن العامة للتعبير عن حبه لرئيسه !!
اتمنى الخير والتطور والازدهار لسوريا ولشعب سوريا العظيم سواء تحت ظل حكم الرئيس بشار أو غير بشار ..
لأن بالنهاية الرؤوساء والملوك يفنون ... والدول والشعوب تبقى
يا ايها الرجلُ المعلمُ غيرهِ..............هلا لنفسكَ كانَ ذا التعليمُ