[zen]

ذكريا ت و شخصيات أخوية
مرحبا أخواتي كيفكون
ما بعرف انو كيف خطرلي اني اكتب هالموضوع
ومابعرف بيجوز يصير سلسلة بس بزكر انو مدري شو صرلي قلب مزاجي فجأة وحبيت أني اتستطح ع الصوفاية وأطفى الضو وحط فيروز وعم فكر قمت تذكرت شخصيات أخوية اللي اثرت فيني وحبيت اني أكتب كل شخص مرق ببالي شو الذكريات اللي محتفظ فيها وبشو بيذكرني هالشخص
راح بلش
اول شي راح اذكر
ريتا : ريتا عرفتها اول ما فتت ع أخوية حبابة كتير متل ما الكل بيشفوها انا بالوقت الحالي أكتر اوقات بذكر فيها ريتا لما بسمع غنية البواب لفيروز من قبل كنت اسمع الغنية وارسم للغنية صور مختلفة أما هلق لما بسمعها ما بقدر إلا ما اتذكر ريتا واتخيل سيارة وشنطة سفر وشخص كبير عمبيسكر باب السيارة وبنت راسها طالع من السيارة وعم تسلم ع أبوها ومسافرة وكمان بتذكر غنية لما نكون سوا لوائل كفوري وريتا أكيد بتذكرها صح رتروت ؟؟

هلق منجي للست ليلى : ليلى انا بحب عطول قلها الست ليلى مدري ليش بتذكرني بالبنت الكتير ناضجة وفهمانة وكل ما اقرا اسمها بأخوية بتذكر غنية المصالحة تبعيت فيروز هي بتحبها كتير بس ليلى انا هلق ما عم شوفها كتير

حشت نشت : كل ما شوف اسمو بحس انو في واحد نازل ع الشام بدو يحط براسي مسدس اذا ما بعمل الشغلة اللي قلي عليها أما شو هالشغلة فهي سر

سيزار : كل ما اذكرو بحس انو في حدا مشيت انا وياه بطريق وفتنا على غرفة هو طلع وتركني بالغرفة لحالي وقفل الباب وزت المفتاح بالبحر وراااح وانا بضل متل الأجدب أصرخ وقول ليش ؟؟؟ بس بلا جواب

مجوود : مجود بس تنذكر بتذكر أنسة عندي بالمدرسة كنت حبها كتير يعني مدري ليس بتذكر الأنسات لما بتخطر مجود ع البال وكمان بذكر الأغاني التركية

حسام او الحكيم : مدري بالاول كنت حس بالخوف لما نحكي عنو انو بحس انو عم نحكي على شي حدا موقر طبعا هوي بيستحق الاحترام بس انا عم احكي كمجتمع افتراضي كان بيخوف انو كان لازم نكون عاملين كلشي على اتم وجه قبل ما يطل علينا

بارليب : بارليب تركبلوا براسي صورتين وكنت بتمنى انو يبقو صورة وحدة بس أحيانا القدر لازم يلعب لعبتو المهم بارليب لما بشوف اسمو بأخوية عطول بتذكر رسالة smsوصلتني منو قبل ماروح ع الجيش بعتبرها من أغلى الرسايل اللي وصلتني كان عم بيهون علي الروحة ع الجيش هي أول صورة أما الصورة التانية لساها مشوشة راح احتفظ فيها بألبومي الخاص

حسام (عاشق من فلسطين): كل ما اتذكرو بتذكر مطعم اسمو ستيشن كان هوي بشتغل بمنطقة قريبة من هالمطعم لما رحت لعندو وكمان بتذكر كلية الأداب بالشام لما كل مرة كنت شوفوا بالصدفة ووقف معو يوشوشني ويقلي شو بدك بالوقفة روح ع البيت أحسنلك بعدين عرفت ليش كان يقلي هيك كما اني بتذكر دخان اسمو شام

ياس : ياس كل مااذكرو بقول انو انا وياه ما منتفق بحس انو عندو صورة مصبوبة عندي ما بتتغير مع اني كنت كتير حاول غيرها

قطرميز زينون (جورج): بحس حالي انو في حدا بيضل يقلي مخادع و عم بيقول للعالم انتبهو منو بس بدون سبب او اسباب كانت بس ببالوا (جروح قديمة ماحدا يدقق)مجرد ذكريات

جوي joy: عطول بتذكر قصة مين أجى بالأول الجاجة أو البيضة وانا بقول الجاجة بالأول

مارسيل : من زمان كنت احكي مع مارسيل كتير طبعا هلق تير الوضع كنت حس انو شعرها قصير مدري ليش بس عطول كان يجيني هالشعور
سيمون : مدري لما بتذكرو بتذكر الأشوريين وبتذكر العسكرية لانو كان عسكري قبلي هوي وكان يقلي انو الجيش سهل
أنجي أو بلو أيز : هالبنت الجزراوية بيزكروها أكيد ريتا وليلى بس لما بذكرها أول شي بتخطر عبالي ستها وأختها الصغيرة وهي عم تبكي لأنو عاملتها تحتها (ملا ذكرى)

كريم كريمبو: كل مرة بمرق من قدام مكان شغلو بتذكر البيتزا والكلب تبعو كان حباب كتبر وكمان بتذكر الساعة الساعة اللي عملناها بأخوية ووعلى المينا تبعها أسماء الأعضاء كلون تقريبا أنا لهلاء محتفظ فيها وطبعا بتذكر هيفا ومحششتنا القديمة

ابو النسيم : بتذكر النكت اللادينية الله يرحم هديك الأيام لهلاء حافظ نكت من هالنكت

علي : عطول بتذكر أسبانيا ومعهد المسرح اللي كان عندي أمل في بس ضاع

جيني : بتذكر أول مرة شفتها بالجامعة كان معها رفيقتها كان انا كمان معي رفيقي بتذكر كيف ضلينا ساعة نروح ونجي من قدام بعض بدون ما نعرف بعض وكل واحد يتطلع بالتاني انو معقول يكون هاد ؟!!!!
مجد او هير ايام: كل يخطر ببالي أول شي بتذكرو وشم غيفار انو ضلينا فترة هوي يقول انا بدي اوشم غيفارا ع كتفي و انا قول هيك راح اوشوموا قبلك فمرة قلي فتحلي الكام وقبل كلشي كان حاطط كتفوا قدم الكام ليفرجيني الوشم
سعيد : اول شي بذكرو الحميدية بحمص وكيف مرة تصورنا صورة طلعنا فيها منضحك وبتذكر لما كنا رايحين ندور ع بيت ريتا وليلى لنصورة ونبعتلون الصور
هانية او هنونة : هالبنت كنت احكي معها بس ماكنت اعرف انو هي ومجد بنفس المحل كل ما احكي معها كنت حس انو محلها هو ع طريق بتطلع من بابو ببين عليك الوادي

لؤي أو فارون : لم بتذكرو بتذكر مشوارنا بالحميدية بحمص انا وهوي ومجد ولما فتنا ناكل صار يسألني انو بتاكل بيتزا سلامي وانا قلو أي شو فيها وهو يستغرب ويرجع يسألني اخر شي سألتوا انو ليش مستغرب قال لأنو فيها لحم خنزير وهو مفكرني اني ما باكل
مريومة الغزولة : ما بتخطر عبالي لحالها عطول هي ورفيقتها بتذكرون اقفين بمحل cd وعم تحاكيني وتقلي تعا زورنا
هاني داغر : اول شي بيخطر عبالي السكسوكة ونو عطول بيطلع كبير بالصور وانا قلوا قديش عمر وجن لما يطلع أصغر مني
فراس غودفازر : من اسمو لازم نتذكر ألباتشينو بس انا بتذكر تيستو لأنو كان يجي ال DJ كتير

ولسا في كتير زكريات
بس أخر شي انو فيني قول انو حست او اكتشفت انو اغلب الناس بأخوية متل العجين بيقدرو بتشكلوا حسب الظروف وفي ناس ما قدرو فكانت أخوية مجرد مرحلة بحياتون وتركوها ومشيو وناس قدرو يتعاملوا معها بكل الاشكال
وانا بعدين عايش بهداك الزمان …………