أخوية - عرض مشاركة واحدة

**butterfly** · 02/12/2006

كتعريف بمكتبتنا ...
المكتبة : هي المكان اللي بنتبادل الكتب على أنواعها وحياة الكتاب والأدباء والشعراء .... ويفضل أن يكون الكتاب مرفق ونقبل استثناءاً وضع رابط لموقع مختص في تحميل الملفات . في حال تجاوزحجم الملف الحد المسموح فيه بأخوية
قرأت لك : قسم من المكتبة بينزل فيو مقتطفات من كتب .. لمحات عن كتب ... مقالات لأدباء ...

( سئل فولتير من يقود الأمم .. أجاب من يعرفون كيف يقرأوون ويكتبون )
لهيك بدنا نتفق على شوية أسس كيف بدنا نكتب ونقرا بالمكتبة :

1. تعلمنا من الأسلاف " لكل مقام مقال "
مهم كتير كتير يكون مقالنا بمقامو قصدي بمكانو ...إذا الموضوع مكانو بالمكتبة ... الشعر والقصة والأدب الساخر و الأبداعات الشخصية ومواضيع النقاش .. ألون أقسامون المميزة بأخوية .. ومكانون للأسف مو بالمكتبة ... المواضيع الدينية والكتب الدينية ما منحبذا بالمكتبة .

2. كتب نيتشه ( عندما تعبت من البحث .... تعلمت أن أقوم بالاكتشافات )
لازم نتساعد شوي بالبحث

... يعني بالمكتبة في أرشيفوبأخوية في بحبشة ونكوشة.... لهيك قبل ماننزل كتاب .. مقالة .. أو أيا شي نتأكد إذا الموضوع مكرر ( كتاب نازل قبل بمرة ... هالمقالة مكتوبة ..حياة هالكاتب محكي عنا ) ... بتقول غادة السمان ( الحب الذي يستعصي على النسيان .. يستعصي أيضاً على التكرار ) ونحنا منقول أنو المواضيع المميزة اللي عنا بستعصي على النسيان وعلى التكرار كمان

وإن كان عنا إضافة على موضوع موجود منتمنى ينزل مع الموضوع الأساسي ما نفتتح موضوع جديد .

3. سمعنا المثل الشعبي : “المكتوب نقرأه من عنوانه”.
ومواضيع المكتبة لازم حتما تقرأ من عنوانا ... يعني ( كتاب روعة ... مقالة ولا أحلى من هيك ... كرمال الله فوتو عموضوعي ) ... بدنا نحزفا ... حتى لو كان المقال روعة والكتاب بيجنن .. .. بدكون تعذرونا ...

4. قرينا بشعر نزار قباني :
( شعري أنا قلبي.. و يظلمني
من لا يرى قلبي على الورق )
ولأنو نحنا ما منحب نظلم حدا ... وحفاظاً عحقوق الكاتب ، كل كتاب أو مقالة ما بينذكر كاتبا رح نضطر نحذفا ...

5. بيقول أندريه جيد (إن أجمل الأشياء هي التي يقترحها الجنون ويكتبها العقل .)
وسعياً أنو كتابة ردودنا بالمكتبة تحافظ على الأبداع والمنطق منذكر أنو ممنوعة الحوارات الجانبية والدردشات .. ممنوعة إعلانات لمكتبات تانية .. أو لمواقع تانية ( عدا المواقع المختصة في التحميل )
ممنوع تغيير مسار النقاشات ( في حال وجود نقاش حول كتاب أو مقالة .. ) ..

وبالنهاية ومتل ما قال جبران ( يحتاج الحق رجلين . ... رجل ينطق به ورجل يفهمه .. )
ونحنا عملنا اللي علينا ..
يسلمو