[tiger]

كاتب النص الأصلي : أبو طريق

تسلم يا غالي على هالكلام الحلو، و إزا كان الكاتب أصدوا هيك، فمعناتا كلشي تمام.
يا معلم التطرف صار شغلة روتينية للأسف بمجتمعاتنا، و صار كمان "تدين" و تقرب من الله، و شوفة عينك الفضائيات الدينية -بغض النظر عن الدين- عمتكسح عالمنا، مو لأن البشر زاد إيمانهن، لأن لو زاد كان في سلام بحياتنا، بس لأن العالم بدها تفش خلقها، بدها شي تتسلى فيه و تمللي الوقت و تفسر هالجهل و التخلف يللي عايشين فيه، و المشكلة إنو شيوخنا بيطلعوا بالجملة، و نازلين فتاوى غريبة عجيبة، و العالم من طيبة ألبها و سذاجتها عمتمشي وراهن و تتبعهن عالعمياني، تقول يا زلمي كأنن أنبيا!!!!!!!!! المهم هادا التطرف دواه شي واحد بس-على الأقل برأيي-، بظن إنو دواه العلم، لأن لو تعلمنا رح نصير نتسامح، و لو خلينا العلم و التطور هدف لمستقبلنا و مستقبل ولادنا صدقني كنا زتينا هالاختلافات ورا ضهرنا، و كنا اشتغلنا مع بعض و ساعدنا بعض بغض النظر عن الدين أو اللون أو اللغة، المهم إنو العلم يللي عميجمعنا، و يللي ولّد العلم هوي إيماننا كلنا بإنو في رب عميحمينا و يطلع فينا، بس كل واحد بينظر لهالرب الرحيم من زاوية شكل.
و يللي خلاني دافع و احكي-ولو بعصبية بس مو تطرف- هوي غيرتي على هالدين الإسلامي الطاهر، متلو متل أي دين سماوي، لاحظ تعاليمنا متل بعض، تلخيص القرآن و السنة النبوية هيي بكل بساطة الوصايا العشرة للمسيح. فيا صديقي لما شوف إنو في حثالة من البشر بتدعي الإسلام و كمان عمتغسل دماغنا، و على قولة نزار قباني بيدعوا إنهم "أصهار الله"، صدئني بفور الدم لراسي، و بحس إنو من واجبي و من حق الإسلام عليي إني حارب هالبشر و وقف بطريقهن، و بزيد زعلي لما شوف إنو الناس يللي بينتموا لغير أديان مقتنعين بإنو هالبشر ممثلين للإسلام، بس لما تجي للواقع ما بينلاموا يا أخي، لأن ماحدا عمبدافع عن هالدين، بالعكس، كل مازاد التطرف بتزيد القنوات الفضائية و بتصير تحكي بمواضيع سخيفة و تافهة و بيطالعوا فتاوي و بلهوا العالم بحجة تصحيح صورة الإسلام المشوهة، و مشان تاخد مثال، يا زلمي تخيل بمصر واحد مطرب، الزلمي بنى مسجد بمصر، آمت مصر و أهل مصر نسيوا الفساد يللي بينهش ببلدهن متل ما بينهش بأي بلد عربي، نسيوا التضخم و التلوث يللي عمياكل القاهرة أكل، و نسيوا الانحطاط العلمي للجامعات المصرية-متل ما صار بالجامعات السورية- و نسيوا إنو في علماء مصريين عميتكرموا و يا خدوا جوائز عالمية من الغرباء و المصريين واقفين عميتفرجوا، تركوا كل هالمشاكل و دقوا بهالمطرب يللي بنى هالجامع و نزلوا تكفير فيه و إنو الجامع لازم ينهد فوق روس صحابوا. بتمنى من إخواني و حبايبي المصريين (بالزات صديقي و أخي محمد ابراهيم) ما يزعلوا مني، بس هالمثال هوي يللي جاي ببالي بالوقت الحاضر، و كمان لا تنسوا إنو سوريا و الأردن و لبنان...لحتى الدولة العربية رقم 22 مدري 21(مو فارئة أصلا) عايشين نفس التخلف و يمكن أكتر.

و متل ما قلت أخي تايغر، الله يخلصنا من التطرف، لأن عنجد هوي حماقة و تخلف و مناقض تماما لأي دين أو مذهب أو أي فكر إنساني و حتى حيواني، و إنشالله منصحى و منعرف إنو يللي بحب الله عنجد بحاول يبني بلدو و وطنو بالعلم و التطور، مو القتل و الرجعية و التخلف. آسف عالإطالة.

اخي نحنا مشكلتنا متل ما قلت هي التخلف الكبير ياللي عم نعاني منه , ما عم نقدر نقبل الآخر بأي شكل , و حتى الله وكيلك ما عم نقدر نقبل انفسنا , و حل كل هالامور هو اكيد العلم و لا شيء غير العلم ....
اي محاولة لتغيير الوضع القائم تعتبر كفر , اي محاولة لتفسير الاديان بطريقة محترمة و متناسبة مع الانسان في القرن الحالي تعتبر كفر , اي محاولة لفضح الرؤساء الدينين و اظهار حقيقتهم كمان بتعتبر كفر , اي محاولة لتبيين انو الشريعة هي لخدمة الانسان وليس الانسان لخدمة الشريعة بتعتبر كفر ....
اخي هدف الدين هو انو الانسان يعيش بحرية , سعادة , هناء , يبني وطنه .....
خلينا نشوف كيف الناس بتعيش بدول الغرب , في الناس من كل الاديان و الالوان و الاشكال بس كل هالناس بتساعد بعضها ببناء اوطانها .....
بتعبد انت الله مو مشكلة , انا بعبد اهورامازدا , كمان مو مشكلة , غيرنا بيعبد البقرة كمان مو مشكلة نحنا بنحترم بعض و المهم انو نعمر وطننا لانو بالنهاية تعمير هالوطن هو تعمير للمجتمع و لحياتنا .....
اخي نحنا شعب عريق عمره اكتر من 6000 سنة بس مع الاسف نسي عراقته و غرق في تخلفه ......
تحياتي الك اخي ....