اقتباس:
كاتب النص الأصلي : yass
بعتقد انو هون بدنا نبلّش من أولها... هل من الممكن انو وجود حدا يهدد وجود الآخر؟ مجرد وجود؟
رأيي الفلسفي الفزلكي انو لأ, مافي وجود بحد ذاتو يهدد وجود, اللي ممكن يصير انو يكون في خواص بهالوجود تتعارض مع خصائص وجود الشخص الآخر, و بهالحالة في حل فلسفي أو سياسي بانو الواحد يبحث عن نقطة توازن ما بين هالخصائص (بمعنى آخر, كل واحد يحط من عندو شوية جهد لحتى يصير في, ازا مو تعايش على الأقل تجاهل وجود).
أما لما احد الطرفين أو كلاهما ما بدو يحط من طرفو شوية جهد... فهو المشكلة و هون تبدا النزاعات من خناقة الحارة للحروب العالمية, بس هون الأمر ما بيتعلّق بالوجود بحد ذاتو انما بخصائص مرتبطة فيه, و هالخصائص مهما كانت دوغماتية الواحد لازم يحاول يسيطر عليها.
ما بعرف اذا وضحت الفكرة...
|
الفكرة واضحة .. وموافقتك فيها ، بس هيي شغلة طمع بمحاورتك الغنية
وبالنسبة لقضية تهديد الوجود فأكيد مارح يتهدد من مجرد وجود آخر وانما من خصائص هذا الوجود متل ما انت حكيت .. بس مع الوقت هاد الوجود بيصير يشكل خطر كوجود وليس فقط كخصائص وجود ..
متل جماعة التأييد لجرائم الشرف .. المشكلة انو وجود هالجماعة ما بيقتصر بس ع الحكي لانعتو بالتخلف والرجعية والحيوانية وانما صار وجود هيك جماعة يهدد وجود النساء بشكل عام .. ومن حقي اني اكرهها والغيها خوفا منها حتى قبل ما ترتكب هيك جرائم ..
نفس الشي ليبرمان .. مع انو لحد هلأ بس عم يجعجع بالطالعة والنازلة وبمناسبة وبغير مناسبة بالترانسفير للعرب .. بس خوفي منو ومن تنفيذ هالخطة وحماية لوجودي بيخليني اوتوماتيكيا طالب بالغائو من الحكومة .. يعني مع انو الديمقراطية صعب تسمح بحدوث هالشي ومع انو لحد هلأ بس عم يجعجع انا بشوف انو وجودو بيهددني وبيريحني جدا اني طالب بالغائه ..
وشكراً لطولة بالك علينا
