[krimbow]

اضربولي فرام كلكم و خدوا تايم آوت

بغض النظر عن رأيي بشخص و افكار كمال لبواني ... بدي احكي عن مجمل ردودكم قشة لفة باستثناء رد طارق ...

لأنو هاد مو حوار هاد خوار

آغا و مدق:
زلمة معتر و صار معو مصاري ... هي تهمة ؟؟؟
بتصور انو الدكتور كمال طبيب بدولة من دول العالم التالت ... يعني كتير منطقي انو يصير معو مصاري
انو بدكم يانا نكرهو او نتفهم ليش انتوا بتكرهو ... لمجرد انو صار معو مصاري ؟؟
انو نضرب بالمندل يعني لنعرف كيف صار معو مصاري ؟؟؟

بعدين شو هالاسلوب هاد ؟؟؟ انو ما لازم نتفق مع اي برنامج سياسي إلا ازا كان متبنيه الله ؟؟؟ يا اما لازم نتفق مع عصابة الاسد ؟؟؟
انو بالله بهالطرح بشو بكون مختلف عن الاخوان المسلمين ؟؟؟

و حسب المعلومات القليلة يللي عندي عن هالزلمة ... ما بتصور انو كلامك او كلام مدق بيأثر عليه ... سياسيا

و بتمنى لما بدكم تتناولوه انو يكون في شوية منطق .. يعني مو يجي واحد يقللي كنت مرضان و ما استقبلني بعيادتو مثلا، او والله طول الوقت حاطط العلكة بتمو، او حب شي صبية، او ما بيصوم و لا بيصللي، و من هالعلاك المصدي هاد
بتمنى انو تحكوا عنو بطريقة سياسية لأنو يللي بيهمنا هوي جانبو السياسي ... بالتأكيد مع الجانب الاخلاقي

ابو النسيم:
المفروض انك ليبرالي، يعني عايش ع الارض، مو بكوكب تاني متل الشيوعيين و القوميين السوريين و لا باليوتوبيا متل الاخوان المسلمين .... بالمشرمحي المفروض انك واقعي
و طالما انت واقعي معناها يللي بيهمك هوي نتيجة اي تجربة
خلينا نحكي عن نتايج المناضلين يللي حضرتك ضربتهم كمثال ... خليني كفي الجانب المظلم يللي هوي اكبر بكتير من الجانب المضيء بصورة هالمناضلين

كفاية لليستة المناضلين عندك حافظ الاسد، جمال عبد الناصر، معمر القذافي، انور السادات، مصطفى طلاس، ستالين، و حرامية و نصابين و محتالين و سفاحين بيسدوا عين الشمس

يللي بدي قولو انو الفقر صحيح مش رزيلة ... بس بنفس الوقت ليس فضيلة

و الاهم ... انو جربنا نجيب شحادين و زبالين و نعملهم ارباب علينا و شفنا بالنتيجة سرقة بلاد و شعوب و طمع مالو والي

بقا لا حدا يضربلي مثاليات عن الطبقة المعدومة لأنو ما خرب بيتنا كشعب سوري غير وصولهم للحكم

و لمعلوماتك لما استلم حافظ الاسد الحكم بسوريا اجا عمك رفعت و جمع شلة من هالمعدومين يللي كملوا العصابة الاسدية و قللهم "معكم خمس سنين، و قدامكم البلد بحالها، ازا بعد خمس سنين بلاقي فيكم واحد فقير بقوصو بمسدسي"

و ع السيرة بس
بعد قيام ثورة اذار بسوريا
بييجي جدي (كان عندو سوبر ماركت بالصالحية) و بيتعرف على ضابط لمع اسمو بشكل مخيف فيما بعد، و بيستقري فيه مستقبلو بيقوم بيضرب صحبة معو
المهم انو بعد كم يوم جدي هداه لهالضابط قنينة نبيد فرنسي معتق، و نص كيلو جبنة روكفورد... و هيك هدية كان جدي متعود يهديها للسفراء و الوزراء بسوريا

تاني نهار بيسكروا محل جدي بالشمع الاحمر ... لأنو الجبنة (يللي هداها للضابط) طلعت معفنة
بتصور انو كلكم بتعرفوا انو جبنة روكفورد ازا ما كانت معفنة ما بيعود اسمها روكفورد ...

هلأ بخصوص كمال لبواني و شلتو
فقير غني ما بيهمني
بيشتغل سفير و اللا كهربجي ما بيهمني
يللي بيهمني انو مثقف، و واعي، و يللي بيهمني اكتر هوي برنامجو السياسي
و بصراحة برنامجو خارط مشطي

و دمتم