[أم الجود]

الموضوع حلو بس شائك ...

الرقص بكل أشكاله اتحاد فريد و ديناميكي بين الروح و الجسد بالإضافة لكونه رياضة و وسيلة تعبير .. و نحنا (الناس العاديين اللي يمكن مالنا بالرقص لا من قريب ولا من بعيد) كتير مرات منقوم بخطوات راقصة خلال يومنا من دون ما نحس !! لما منتحرقص أو منعنّّد منخبط رجلينا بالأرض .. و لما منفرح على شي شغلة و منهيص منصفق أو منهز براسنا يمين و شمال .. حركات و ايماءات بسيطة بيعبر فيا جسمنا عن حالتنا النفسية .. الراقص عندو ياها هي الشغلة بتكنيك أعلى .. بيعرف يجمع بين الايقاع و النغمة و الحركة اللي عم يقوم فيها ليقدم بجسمو لوحة بيوصل إحساسها للناس بعفوية و ما كتير بدنا لنفهمها دراسة و نقد و تعمق متل لوحات الرسم ...
و أنا شخصياً بحب أتفرج عالرقص الشرقي -طبعاً لما بتكون اللي عم ترقص على درجة من اللياقة و الانسجام مع الموسيقى مو بس طالعة تعرض جسما- و بحب حتى أرقص مرات بحرية قدام العالم مو بس لحالي بالبيت .. بس نظرة الناس و المجتمع للرقص دغري بتخليني دوس فرينات .. كون الرقص الشرقي مرتبط بعقليتنا المحافظة بالأفلام المصرية الرخيصة و الإغراء و العري ، فصار شي منافي للأدب و الحياء و مرادف للفجور و الابتذال ..
شكراً