[saba n]

منذ السقوط ظهرت طبقة جديدة بين الشعب العراقي تدعى بالمتضررين.. ويعرّف المتضرر على انه من يملك مستمسك يدل على أنه كان متضررا" من النظام السابق.. مما يؤهله ليكون السبّاق في الحصول على ماشاء من الامتيازات وان كان غير مؤهل لذلك.. ،ألفت النظر الى ان تلك ليست حالة حصرية بالعراق بل هي مثال لا أكثر..
ولسان حال من أضطهدهم الانتهازيين يقول:_
يعني بس انتو متضررين ..
لعد أحنا أش ﭽــنا..
واليوم كلها ألكم
ومن كل جهة تغرفون*..
ﮔـيعان *..ومنح..وتعيين..
يا عمي ..لعد وأحنا..
يعني لأن ماعندنا مسفريّن..
ولاعدنا مسجون ... ولامعدومين..
هسه هيج صرنا ..
نسيتوا الحرب.. والخوف .. والجوع..
كلنا فد سوا كظنا*..
نستوا كل شهر لوجبة التموين كلنا نتعنا* ..
نستوا التمن اللي ناخره الدود..
والشكر.. والدهن .. المايسدن* جوعتنا ..
نسيتوا الطحين اللي يهص* جوا السنون..
ﭽــنا نموت جوع..ونتقاسم خبزتنا ..
يامـا سوى ﺒﭽـيـنا بالعباس*...ويم شباﭺ ابو الحسنين ﭽــودرنا*...
وياكم عشنا الضيم .. وشكينا الظلم وصرخنا..
تذكرون ذاك الوكت ..صيف العراق المايرحم .. سوى ذوبنا..
ويامـا..
يامــا فد وكت يخلّص نفطنا وتنطفت اللالات ..
وياما على السـطوح مثل ما انتو نموتوا.. احنا هم نمنا..
ولمن ﭽــــانت العجاجة ﺘﮕــب* ما سألتنا من ياحزب أحنا..
ﭽــنا و ﭽــنتوا ..نعجن بموعنا الهمّ ..ونزﮔـي اﻠﮕـاع من عرﮔـنا..
بس يا حيف.. هــــﻴـﭺ دنيانا تصير..
وأحنا اﻠـﭽــنا شركا* بوجي* المحنة..