اقتباس:
|
معقول ما نزل بالـ 2008 ولا غنية بتنسمع ..؟؟
|
ال 56 وحدة اللي فوق و غيرهن في كذا وحدة سقطو سهواً ..و بينسمعو ...رواق و حلوين الاغاني .
اقتباس:
من فترة كان في لقاء مع نديم محسن ..و قال شغلة مهمة
أنو مو غلط يكون في أغنية خفيفة .. و موسيقى خفيفة ..لأنو كلنا منحتاج أحياناً لنرتاح بسرعة و لنسمع بسرعة أو لنحس بسرعة ..و هالنوع موجود دايماً عبر التاريخ
بس الغلط أنو يكون هالنوع هو يللي محتكر الفكر ..و محتكر السوق
|
طيب كيف محتكر ! ..و كيف خفيفة ؟ لا و الله جد عم اسأل . يعني هون نديم محسن شو نوع الشي اللي بيعملو , خفيف ولا تقيل ؟ ..يعني اذا هو تقيل بنظري , مانو خفيف بنظر صميم الشريف !...و هي اجت ع القافية يعطيني العافية
بعدين ليش هالتقسيم ؟ غلط نقسم هيك يعني ... هو نديم محسن غلطان , موضوع خفيف و تقيل موضوع نسبي , و بيخضع لتقييمات بشرية بتتأثر بالذوق الشخصي و الخلفية الثقافية , و حتى التوجهات الفكريةو القومية و العقائدية .....الخ يعني . و انت بتعرف عن شو عم احكي ...يعني وقت البومات فيروز من شغل زياد بتاكل بهادل و مسبات بالجرايد ليوم الجرايد بتكون انت مستغرب , انو معقول زياد خفيف
...اي هو كتير خفيف بنظر بعض ( التقال ) .
أنا ما بفهم بالموسيقى ك علم و اصول , بس بعرف انو في موسيقى بتعجبني مثلاً . او موسيقى بتفوتني بالحيط , و تخليني اكفر من السلطنة , و في موسيقى بتخليني فكر اني اعمل اي شي تاني غير اني اسمع موسيقى ....الخ . و ما بهمني وقت بتعجبني الموسيقى شو راي النقاد ...و لا بهمني راي النقاد اذا ما عجبتني , و على فكرة ما بهتم كتير اذا هالموسيقى اصيلة , او ملطوشة ....باعتبار انو عم نحكي ع الموسيقا بحد ذاتها يعني , حتى لو بعرف انو هالغنية ملطوشة من اليونان او من تركيا متل ما هيي ...طالما هالموسيقى حلوة , و مافي شي جديد بالموضوع ..من ايام ( العمالقة ) و اللطش شغال , طبعاً اذا بدنا نحكي عن الموسيقي بصير مهم انو يكون اصيل , يعني ما معقولة يعجبني زياد الرحباني و انا بعرف انو حرامي الحان , حتى و لو الجانو الملطوشة عاجبتني . ...و صرت شوي براة الموضوع كتير يمكن.
هلأ بدي ارجع لموضوع الاحتكار , انو مين عم يحتكر مين ؟؟؟ يا زلمي انا ما شفت بحياتي شي اوقح من الطريقة اللي كانو يحكوا فيها هدول النقاد وقت يطلعوا ع التلفزيون و الراديو بهالعشرين سنة الل يمضو , و يبلشوا نتف بالعالم ....الله وكيلك يصيروا يتمسخروا ...شي ع راغب علامة , و شي ع وليد توفيق , و شي ع ربيع الخولي ....و يبلشوا يحكولك عن الفن الاصيل , ايام ام كلثوم و حسنين هيكل
..و انا بيني و بينك صير حس بالذنب , كنت صغير انا ...و بيني و بين حالي صير قد الكمشة , انو معقولة انا بحب اسمع ربيع الخولي ! ...هالتافة ربيع الخولي .....تفوووووووووووووووووووو ووووووووووووووو عليي ...لازم اسمع ام كلثوم .....فريد الاطرش ....يا ربي بس ما بقدر
..بيلعولي نفسي و هني عم يعيدو الموسيقى ...
....اي بس لازم اسمع فريد الاطرش .....و خلص ما عاد في ربيع الخولي ...بدك تكبر ..بدك تصير زلمي
يا اخي منسمع فريد ...بيجي بقلك :
سال الدُكَ كم راقني نجمه
لما حكى مسامهُ مبسمك
يا بدرُ إن واصلتنِ بال جفا يا بدرُ
ومِتُ في صدر الشباب مغرمُ
كل الدُجى ماتت
مات شهيدا بال وفا
فانثر على أكفانه أنجمك
اي و الله ما فهمت شي
يعني بعد ما داقت خلاقي و انا عم اسمع مقدمة موسيقية مسجلة بتقنيات فايتة بالحيط , بيطلعلي واحد ما عم افهم عليه ! ...بينما بنفس الوقت في شبيب حليوة صايع عم يغني :
كل البنات بتحبك ...كل البنات حلوين
طبعاً يا سيدي يا بختك ...و انت اللي زيك مين !
حسام حسني هاد ..اي نعم , و هاد الزلمي احد الوجوه الفاقعة بثورة الاغنية العربية ع القيود ..باتجاه اللاقيود .
طيب مين اللي عم يحتكر ...و كيف ؟انا بصراحة فهمت انو الفضائيات القوية بتنتج و بتعرض شي معين , يعني هلأ روتانا عندها خط معين للاغاني و عندها سياسة شغل معينة , بس روتانا مانها الله الاغنية , و ما معقولة كل العالم تكون بروتانا مشان ما يكون في احتكار ! اللي بدو يوصل للناس بيوصل , او حتى العكس ...اذا الناس بدها توصل لشخص رح توصللو , ووقت ما كان في شي اسمو فضائيات , كانت الاغاني توصل مسجلة من ع الراديو , و تسافر العالم من حمص للشام , و من طرطوس لسلمية مشان يجيبوا كاسيت ! و ما بعتقد انو نديم محسن بفكر ينافس شعبية تامر حسني مثلاً ...لانو هاد الحكي مانو مقبول , كريس دي بيرغ ما بيطلع شي حد كيلي مينوغ بالشهرة ....بس بضل هو كريس دي بيرغ و هي كيلي مينوغ . اما انو يا اما كلياتنا متل بعض , يا اما اسمو احتكار ..اي ما صحيح هاد الحكي .
طبعاً كل هاد الحكي على اعتبار انو يصح تشبيه نيدم محسن ب كريس دي بيرغ , و تشبيه تامر حسني بي كيلي مينوغ , و هو حقيقة ً لا يصح . و خود اصغر شغلة , قديش في كثافة اعمال ..يا اخي شو عم يعطيني نديم محسن ؟ ..يعني بقعد 5 سنين اسمع شبه و بعدين 10 سنين اسمع رقص النار و بس .؟ طيب ليش ...ما مروان خوري عم يشتغل يا اخي ..و شغلو طيب ..الله وكيلك شغلو كتير طيب كمان ....بغني بالمجال العاطفي بعيداص عن القضايا العالمية و الفلسفية الكبرى ...بس ما معناتو انو اغانيه صارت صغرى .
طيب كمان بدي قلك ....انو قد ما يحكيلي نديم محسن عن العتاق ...ما عم توصل متل اذا اجا علاء زلزلي ( اها اها
) ...و عطاها وحدة دلعونا تخليك تدبك و انت متربع ع الارض .....و الهوارة و الدبكة , و الدلعونا و الميجانا ما هي مجرد فولوكلور , هاي عايشة معنا ...و اشتهيت هالاوادم ( التقال) يعطو هالفولوكلور حقو ...غير الرحابنة نادراً جداً تلاقي حدا من ( التقال) كان يتعاطى مع هيك قصص .
كمان بنبسط بدلعونا علاء زلزلي وقت بشوف انو اذاعات عربية عم تقطش الغنية
...المقطع الاخير تحديداً
بنزل عالساحة وبهز كتافى
وكنتى تحبينى ومنى ماتخافى
حطى ياعمرى شفافك ع شفافى
وخلى الصبايا يتغير لونا ...
لانو هيك اغانينا نحنا ..بالفلولوكلور تبعنا كانت هيك.....و في عالم ما الهن مصلحة بهالحكي ..علاء زلزلي( أها أها ) قلن طز ...و عالعالي ...و لسا بدنا كتير عالم يجو يغنو و يقولوا طز .ع العالي .
طيب , غنية راغب علامة ( سر حبي ) , هي بالاصل غنية لابو بكر سالم ...و أبو بكر سالم يا معلم هو اسطورة ...ع قد ما معروفة و مشهورة بالخليج ع قد ما مجهولة برا ! ..ابو بكر سالم معلم هو حالة فريدة ..ابداعبة ثقافية ..و رهيب هالزلمي , يعني بتحس انو اسلوبو الغنائي ما بيعطيك مجال تكون بين بين , يا اما بيعجبك بيعجبك , يا اما لاء لاء لاء .و طبعا بالاخر الشغلة بترجع الك .
ابو بكر سالم ما هو موضوعنا , موضوعنا الغنية ..اللي هي اكتر من رائعة , يا زلمي اقسم بالله يمكن كل 1000 سنة لتجي هيك غنية , ع قد ما بسيطة و سلسلة وسهلة ع قد ما قمة !! و اداء راغب علامة ممتاز , يا اخي صرلو شي 50 سنة بغني لازم يكون صار بيعرف يغني منيح
اقتباس:
لك انو حطلك شي غنيتين راكزات بين هالمعمعة 
|
راكزات معلم ..انت سمعن ع رواق , و اتذكر انو هدول اغاني سريعة .و شغل حب و مراهقة و مشاعر تلات رباع سطحية ..و بجوز يكون في حكي ولاد كمان ...بس راكزين ..الله وكيلك راكزين
J.S: Death is the solution to all problems. No man = No problem.