اولا سلامي للجميع فردا فردا
هي اول مشاركة الي وارجو انها تكون مفيدة بقدر الافادة يلي قريتها من ردودكم
تانيا الله وكيلكم دوختوني بالموضوع وصلت لمرحلة ما شاء الله عليكم ما عاد اعرف مين كتب ومين رد
الذي منو. حابب قول شغلتين اولا كل الاساطير القديمة وهون عم احكي على اساطير شعوب الهلال الخصيب بتحكي عن الطوفان الكبير يلي صار وعن قصة النجاة والسفينة مع الاختلاف باسم بطل القصة واسباب حدوث الطوفان"راجع نصوص ملحمة جلجامش"وايضا مكتوبة في التوراة واللي معروف ان اسفار التوراة مو كلها تشريع بس كان في اسفار تحكي عن بدء الخلق والطوفان ...الخ اذا ما كنت مخطئ
يعني ان جميع الشعوب بالاخير من نسل نوح ...تمام لهون
ثانيا مهما كان الانسان عبقري يعني لو حطينا مجموعة من الناس بغابة وعطيناهم الحديد والحجر والذهب ووووو.وقلنالهم عملو حضارة ما بيقدرو يعملو
لان الحضارة ما بتنشا من العدم كل الحضارات قامت على اطلال حضارات قبلها بس مو بس اخدت منها طورت كمان من لي اخدتو
وهاد معروف بكل الحضارات فما فينا نقول ان العرب هنن اصل الحضارة وكمان ما فينا نقول انهم ما عملو حضارة
وكمان بالنسبة لكل الحضارات يلي قامت بكل العالم
شغلة تانية الاساطير الاشورية والكنعانية كلها بتحكي عن اصل الشعوب تبعها
في نصوص عندهم بتقول ان اجدادهم كانو ساكنين منطقة اسمها جنة عدن
وبعض علماء التاريخ ارجعوا مناطق سكناهم الى منطقة الخليج العربي يعني شرق الجزيرة العربية
بغض النظر عن اصولهم عربية او اي كانت انا ما رح ناقش هالموضوع هون
الخلاصة
الاصل كلو واحد
ومافي حضارة قامت من العدم من اول بدء التاريخ ولحتى اليوم الحاضر
يعني مافينا نقول مثلا ان الحضارة الاوربية الحديثة قامت بسبب حضارة اليونان القديمة
لا هي اخذت من كل الحضارات يلي قبلها بما فيها الحضارة يلي قامت باسبانيا ايام حكم الامويين
يعني لاقوة في الشيء مو انك تاخد بس من يلي حوليك لا القوة انك لازم تعرف كيف تدوب تجارب يلي حولك وتصيغها انت بمفهومك لحتى تقدر تعمل شي جديد
جديد مبني على تجارب الناس قبلك
آسف على الاطالة وشكرا مرة تانية على الموضوع الحلو والغني
وخلينا نتذكر ان
كن ابن من شئت واكتسب أدباً يغـنك مـحـموده عن النـسـب
إن الفــتــى مـن قـال هـا أنـذا ليس الفتى من يقول كان أبي
|