ياجماعة .. هلأ بشرفكن خلونا لو لشوي صغيرة بس ننسى قصة مشرفين واعضاء ومنسقين .. ودرجة اولى ودرجة تانية ودرجة تالتة ...
ياجماعة الاخوية ومن لما دخلت عليها 2006 لحد هالحظة .. كل المشاكل اللي صارت فيا نابعة عن قصة وحدة او شي داخلي بكل واحد فينا .. هالشي اللي بخلينا نحس انو في حاجز بينا وبين هالمشرف وبين هالمنسق .. هلأ انا ماعبعرف اوصل الفكرة مزبوط
بس ياجماعة صدقوني يمكن هلأ كل سبب هالمشكلة اللي عبدور من شهرين لهلأ احساس كتير من الاعضاء انو لازم نحن نكون مشرفين متل هدول .. انو منسقين متل هدوليك .. طبعا بغض النظر عن الاخطاء اللي عبتصير من الطاقم الاشرافي واللي مابقدر انكرا ولا اي حدا .. في اغلاط كتيرة .. وتشدد نوعا ما واللي بصراحة يعني والله حاسس انا بشعور كل واحد اتجاه هالقصة .. وبخصوص انو عبحس حالو مخنوق ومافي كتير اريحية بهالقصص .. صدقوني حاسين بحكيكن كلكن بهالخصوص .. وكل الطاقم هيك لانو نحن اعضاء كنا متلكن .. ومازلنا اعضاء
بس مع هيك بغض النظر .. كمان في شي جوات كل حدا عبيحكي عن الاشراف عبقلو انو انا احق من هالمشرف الفلاني باني صير مشرف او منسق .. انو يا اخي ليش هو صاير انا احق منو وهو عبيغلط ومتلو متلي بل يمكن انا احسن منو ليش حتى ماكون متلو ؟؟
هلأ هادا شعور داخلي .. اكيد كلكن بنتابكن .. صعب ننكرو حتى لو جيتو هلأ قلتولي انت عبتخبص ونحن مالنا هيك .. بس انو هالقصة يمكن ماحدا يحس فيا .. او انو باللاشعور تبع كل واحد فينا
ماتروحي لبعيد .. حتى انا مثلا او اي منسق بشكل عام .. انو بقول ليش حتى ماصير مشرف او امين مثلا !! .. هي قصة طبيعية فينا كلنا ومافينا ننكرا ابدا بجوات كل واحد فينا ..
وهي بتولد هالقصص .. وبظن ازا عملنا نسبة مئوية عن سبب هالمشاكل .. وكان في احصائيات حقيقية فرح نشوف انو 30 بالمية بسبب الاغلاط اللي عبتبدر من المشرفين .. 70 بالمية بسبب هالاحساس الداخلي .. هلأ انا مارح كتير غوص
بس انو عنجد .. انا هدفي من كل هالحكي اللي فوق
انو ياخواتي .. ويا اخواتي هون نابعة للكل واحد عببحكي عن هالطاقم
انو خلونا ننسى شوية قصة مشرف ومنسق وعضو وامين .. صدقوني بس لو للحظة انو نحاول ننسى شوي هالقصص خلونا نتعامل مع بعض ع انو كلنا اعضاء باخوية .. كلياتنا هون نفس الشي كلنا ولاد اخوية .. واخوة باخوية .. او انو يا اخي مشان مايقولو عبنزودا انو يا اخي خلونا نحسب حالنا رفقة بحارة وحدة .. بشركة وحدة بملعب واحد كلياتنا منلقي كل يوم بهالحارة .. ومن هالمكان صرنا رفقة واصدقاء .. يااخواتي عنجد انا احيانا بضل يومين نسيان حالي اني صرت منسق .. الا لادخل ع الساحة الرياضية لاتزكر 
وصدقوني انو كل الطاقم هيك .. عكس الشعور اللي متولد عند كتير منكن انو المشرف هيك مبسوط ع حالو انو صار مشرف وبتعامل بفوقية مع هالخلق .. وحتى لو صار وحسيتو بشوية فوقية بيوم من الايام من شي مشرف او منسق .. فبكون هو عبعاني من هالقصة مادخل الاشراف والتنسيق فيا .. خلينا ننسى شوية قصة الاشراف والتنسبق انو ازا الواحد صار مشرف او منسق رح يصير نفسية !!
او بالاحرى خلونا ننسى قصة الدرجات بالمرة .. صدقوني كلنا هون منحاول انو نتعامل مع بعض كانو نحن رفقة واصدقاء .. سواءا كــطاقم اخوية .. او مع الاعضاء بس مع هيك في كتير اعضاء مارضيانين بتقبلو هالقصة .. بسبب الشي اللي زكرتو فوق اللي جوات كل واحد فينا
كتير انزكر بمواضيع قبل هالموضوع كتير زكرو المشرفين والمنسقين انو يا اخي نحن اولا واخيرا اعضاء ومنضلنا اعضاء ..
وهني فعلا هيك .. بس بيختلفو انو هنن بايدن شوية صلاحيات مشان تبرز الاخوية بشكل احسن
وبخالفو اي حدا مخالف .. لانو هو عبتعارض مع العمل اللي انوجدو مشانو
او اخي خلوني هيك بسط الفكرة .. هلأ انو شركة فيا شي ميتين موظف هالشركة لازما مدراء ورؤساء اقسام وفنيين وموظفين .. هدول كلن هدفن انو يحسنو هالشركة وبظهروا بمظهر لائق قدام الزبونات والعملاء وهالقصص .. وهالشي نفسو بنطبق ع رئيس قسم انو عندو شي 5 موظفين احد هالموظفين فوضوي واخلاقو سيئة وشغلو تخبيص .. هالموظف الفلاني رح بسيئ لمدير قسمو وبالتالي رح يشوهلو سمعتو بالنسبة للادارة اللي فوقا .. وبالتالي بتشوه منظر هالقسم قدام اي حدا غريب جاي ع هالشركة
وهون حكينا انو المشرف هدفو يطالع قسمو بمظهر لائق قدام اي حدا غريب جاي يشوف هالاخوية .. اخوية هالاسم العظيم اللي عاصرو ناس .. كل واحد الو مكانتو وقدمو كتير لهالمجتمع .. فانو يا اخي ازا اجا عضو خالفلو هالمنوال اللي عبمشي عليه هالمشرف وعمل متل الموظف .. فاكيد هالمشرف لازم ينبهو ويخالفو مشان مايخرب الصورة اللي لازم تكون طبيعية وهو بتكمن القصة .. المخالفة ياجماعة مجرد تنبيه لا اكتر ولا اقل .. انو يا اخي متل واحد عبقلك دير بالك او شغلك مو مزبوط
يعني مو هالشغلة المستاهلة صدقوني .. انا اكل مخالفات كتير بزماني .. انو مابتزكر يوم عملت مشكلة مشانن او شي او ازا عملت حدا يزكرني يمكن نسيان .. القصة عادية شغل شباب .. انو ماناخدا ع منحى شخصي وناخدا شغل شباب ..
وطبعا هالحكي مابصير غير لننسى قصة المشرفين والمنسقين والاعضاء والدرجات المراتب اللي بتراود كل واحد فينا جواتو خلينا ننساها .. ونفكر بشي واحد انو يا اخي نحن كلنا طاقم واحد .. جماعة وحدة .. اخوة .. رفقة .. اصدقاء .. موظفين .. هدفنا بس انو كلياتنا نتعاون مشان نطالع هالشركة بصورة مشرقة قدام هالزبون اللي جاي ياخد من عنا مايحكي ع شركتنا بالعاطل.. ونفس هالحكي هالاخوية العظيمة بصورة مشرقة قدام كل غريب بدو يجي .. ويشوفا وياخدا انطباع عن اخوية سوريا .. لانو مالازم ننسى اخوية مجتمع مصغر عن المجتمع السوري اللي منتمنى يصير هيك بالمستقبل
لما نحط هالفكرة براسنا .. رح تقل مخالفات الاعضاء .. ورح تقل اغلاظ المشرفين والاعضاء .. ورح يخف التشدد شوي وتخف العداوات والحساسيات بس المشرف والمنسق والعضو ..
صدقوني اانا متأكد من هالحكي انو لو كل واحد يحسب حالو بشركة وبدو يشتغل عليها حتى يطالعا .. صدقوني رح نحصل ع هالنتايج اللي زكرت ..
فانو عنجد خلونا نوعا ما ننسى كل هالعي الفاضي لانو متأكد تماما لو منفتح 10 مواضيع متل هادا فمارح نستفيد شي .. ورح نوصل لطريق مسدود ..
وخلونا بس كلنا عيلة وحدة وننسى هالحساسيات .. وهالدرجات والمراتب .. وكلياتنا هون درجة وحدة حتى لو اختلفت صلاحياتنا .. بعدين ياجماعة مو كل مشرف او منسق بهالاخوية دايم .. الدني بتاخد كتير .. وكل واحد الو ظروفو وحياتو .. يا اخي يمكن هالمشرف او المنسق يموت او تعفسو قاطرة ومقطورة .. او ينسو اهلو جرة الغاز مفتوحة وهو نايم وياكل هوا الزلمة .. ويمكن انت تجي بدالو بعد مدة .. ماحدا دايم .. ورح تحس وقتا انو شو كان يعمل هالزلمة حتى بزبط هالاخوية وشو مطلوب منو يعمل ..ورح تحس فعلا انو مارح يتغير عليك شي .. رح ضلك عضو .. وكلياتنا اعضاء ... ويا اخي كما صدقوني هالمشرف او المنسق مالو مصلحة انو باي عضو بالاخوي يترك حتى لو كان ابن يومين بالاخوية .. المشرف مابيطلع منو هيك حكي الا ازا حدا استفزو ووصل معو لطريق مسدود .. ولا رح يخاف انو ياخدلو محلو لانو مالو مسؤوول وبعدين الاخوية بتحمل قد هالطاقم ومرة وماحدا رح ياخد مكان حدا.. وهالكم العضو اللي تركو للاسف ماقدرو يتأقلمو ع فكرة انو كلنا واحد هون وينسو هالاحساس الداخلي اللي حكينا عنو وللاسف كان اقوى منن وتغلب عليهن !!
ورح تحس فعلا انو مارح يتغير عليك شي .. رح ضلك عضو .. وكلياتنا اعضاء
طولت كتير .. بس ياريت انو كون قدرت وصل شوي من الفكرة اللي حاولت وصلا .. وانو لو عضو واحد بس يحاول بفكر بالشي اللي حكيتو حتى نصير احسن ..
اللــي طــــالع الجحش ع المأدنة .. بنزلـــو
|