[jano.]

كاتب النص الأصلي : jovia

لا مو مستكترة ولا شي بالنهاية كمان سوريا بيغلب عليها الطابع الديني ؟.. بالرغم من وجود علمانيين فيها بس في مسيحيين واسلام وديانات اخرى المهم كل دين بيتشبث بتعاليمو وبما جاء بمقدساتون ... يعني هاد حكي مو من عندي انت ازا بدك روح ودور وامريكا متلا مو علمانية ليكون عند معلومك دولة بيغلب عليها الطابع المسيحي لذلك ما عم بحكي شي من فراغ
وانا بانتظار كتابك ...

ما بتزبط لما بتقولي في علمانيين وفي مسلمين وفي مسيحيين.. العلمانية مانا دين، العلمانية هيي القيم والمبادئ يلي بتنظم المجتمع والسياسة على أساس المساواة بين المواطنين مهما كان دينن ومهما كان انتمائن، وعلى هالاساس بيتطبق القانون وبتمشي السياسة. مالا علاقة بعقيدة الفرد أو عقيدة المجموعة الفلانية، العقيدة بتضل مكفولة وما حدا بيقرب عليها. بالعكس العلمانية بتحمي الدين اكتر من الحكم الديني بالبلد! لانو الأخير مش قادر يحل مشكلة الطائفية بين وضمن الاديان وبيزيد الطين بلّة!
بنجي لنقطة أمريكا، امريكا دولة علمانية بس عدائنا الون بيعطي هالصورة المخيفة للعلمانية عند البعض! لانو بيفكرو اذا صرنا علمانيين معناها رح يصير مجتمعنا امريكي، كش برا وبعيد (الكش برا وبعيد مانا استهزاء بالمجتمع الامريكي، بس انو يعني أطباعنا رح اتضل متل ما هيي، رح نبقى شرقيين صدقيني وما حدا بيحقلو يغيرنا) اي فهدول يعني بيفكرو انو العلمانية بتفرض قالب مجتمعي واحد ذو صيغة واحدة!
خدي مثال قضية زواج غير المسلم بمسلمة، هي أكتر قضية شائكة مو؟ طيب في قانون بامريكا بيمنع المسلمة الامريكية انها تتزوج من الغير مسلم بامريكا؟ لأ طبعاً لأنو القانون علماني ومالو علاقة بالدين، بدك تتزوجي اتزوجي، ما بدك تتزوجي لانو الشغلة مخالفة لتعاليم دينك ، كمان عراحتك.. هادا مثال بسيط..

بالنسبة للكتاب خلص وعد بس شوف شي كتاب منيح رح خبرك..