[jano.]

موضوع حلو
التبرع بالأعضاء طبعاً موضوع حساس كتير.

مهم كتير انو يكون عنّا بالبلد توعية مدروسة بكل وسائل الاعلام والتربية. في كتير ناس اذا تعرفت على ايجابيات التبرع وغايتو النبيلة فأكيد رح تتبرع وهالشي رح ينقذ حياة الكتيرين من المرضى.
هلا متل ما مبين بالتقرير ففي تقصير كبير بالنسبة للتوعية بموضوع التبرع بسوريا، وبتصور اذا صار هيك توعية (لنفرض عن طريق المنهاج المدرسي أو مثلا الاعلانات) فرح يصير شوشرة بين رجال الدين حول اذا كان هالشي مسموح او لا، انا شخصياً ما بلوم حدا اذا امتنع عن التبرع بسبب الدين لأنو الشغلة بتضل حساسة ومانا سهلة، بس أهم شي أنو يكون في تشريع واضح! وما يصير قيل وقال... وقتا الناس رح تضيع اكتر وتتخوف ومارح نستفاد شي.

انا شخصياً لحد الآن (بسبب عدم الاستقرار ولأنو ماعندي معلومات كافية عن الإجراءات) ما سجلت حالي كمتبرع... من زمان ناوي سجل وبأقرب فرصة رح دوّر عشي مركز واستفهم عن الموضوع..
خلي ياخدو الي بدّونياه.. كل أعضائي وعضواتي تحت تصرفن... البشر عندي أفرض من الدود.
واذا مشي الحال* رح سجّل حالي كمان بشي معهد تشريح تابع لكليّة طب. خلي هالطلاب يتعلّموا بجسمي.

* مابعرف اذا بيمشي الحال اذا تم التبرع بجسد غير كامل لمعهد تشريح، اذا بيمشي الحال فأكيد ما رح يكون لطلاب السنة الأولى لأنو هدول بدّون جسد كامل... قريت من فترة الإعلان على موقع المعهد بس ما لقيت معلومات عن ارتباطو بالتبرع بالأعضاء..

بالنسبة لاهلي وللمقربين ألي، لسى ما فاتحتن بالموضوع ومابتصور في داعي لأني متأكد انن رح يحترمو رغبتي.. وبعدما سجّل رح اقنع البقيّة كمان...

وبالختام نتمنّى لكم ولنا طول العمر ولجميع المرضى الشفاء العاجل
وبالرفاه والبنين
زيارتكم تشرفنا