[Syrian Gay]

أول شي تحية كبيرة للي قاعد بالمقلاية لأنو كتير بكنلو كل الاحترام
رامي لأنو غير نظرة مجتمع أخوية لقضيته وبيستاهل التحية والتصفيق
أهلين باشق .. وشكراً كتير ألك

المهم وبلا طول سيرة بدك تستحمل غلازتنا وتجاوب على هالكم سؤال:


1- أسئلة عامة:

* مدينتك؟
* دراستك؟ اقتصاد
* انت من عشاق سوريا وهالشي واضح عليك ..كيف بتتمنى تشوف بلدك؟ متطورة اجتماعياً واقتصادياً كتير .. تكون سوريا قدوة يقتدي بها الجميع
* شو بتعتبر حالك قدمت للمثليين بسوريا؟ مابعتقد قدمت شي لسى .. بس بعتقد غيرت نظرة عالم كتيرة بالنسبة للمثليين .. و هادا شي كتير منيح
* وين بتحب تكون بأي بلد؟ كندا




2- أسئلة خاصة:

* هل بتحس بالوحدة والظلم وكيف؟ بحس بالوحدة شوي .. بس عندي كتير رفقات مثليين بنساعد بعض نفسياً .. أما الظلم فـ بحس بالظلم كتير .. ظلم اجتماعي و وظلم ديني
* هل بتصارح محيطك العائلي أو الاصدقاء باللي بقلبك أو انت من النوع الكتوم؟ كتوم .. بصارحون عن أشياء وأشياء .. بس بأغلب الاحيان كتوم .. وخاصة ع العيلة
* مين بيعرف انك انسان مثلي جنسياً من محيطك؟ صديقتي العزيزة .. وبس
* هل انت بتحيى قصة حب حالياً؟ لاء .. من فترة صغيرة فكيت ارتباطي
* مين الانسان الي بتوثق فيه؟ أختي
*نوع سيارتك؟ شخصياً ما عندي سيارة ألي
* نوع موبايلك؟ سوني
* ستايل لبسك؟ سبور مع فنّات
* مستودع أسرارك؟ أختي وصديقتي وكمان بالأخوية كيوتي

مو كأني كتير خاصين كانو الاسئلة ؟!


3- علاقتك بما ومن يلي:

* الله علاقة تراضي .. بحبو وبشعر أنو يحبني .. بحس حالي فهمانو أكتر من غيري
* الوطن علاقة مختلطة .. بحب وطني .. بس بكره العيشة بوطني
* الاديان مو صحبة أبداً .. لا هني بيعترفوا فيني .. ولا انا بثق فيون
* العائلة منيحة كتير
* الاصدقاء نص نص ..
* الحزن ما كتير بنحب بعض .. لأن أنا فرح بطبيعتي .. بس يغلب علي الكأبة اكتر
* أخوية علاقة عم تكبر شوي شوي .. كل ما حاول اتركا بتعلق فيا بزيادة .. أخوية غمرتني وتحملتني ورضيت فيني .. عم حاول قدملها شي بس ما عم تزبط معي كتير
* التدخين ما بنطيق بعض
* المشروبات الروحية نص نص .. بحب تأثيرون بس ما بحب طعمتون
* أبوك علاقة سيئة كتير
* أمك المجاهدة أمي .. علاقتنا كتير منيحة
* اخواتك منيحة كتير



4- رأيك بما يلي:

* الله رحيم .. بأعتبار أنا روحاني .. بأمن بـ الله وبس فـ بشوفو غير ما الدينيين يشوفوه .. هو شي أنبل من هيك .. لو على حكي الدينيين فـ انا بشوف الله شي كتير ظالم وتعسفي وطاغي ..
* الانبياء بحترمون .. لأن وصلّوا رسايل أيمانية عظيمة .. كلها تم تحريفها .. وعدم فهمها .. لهيك أنا ماني مستعد أتبع دين ممكن يجوز عليه الغلط
* المجتمع الحالي للأسف مجتمع تائة .. بدو تركيز وتطوير
* العلمانية الحل الأمثل للدول المتعددة الطوائف .. وكمان هو الوجه الأول للتقدّم
* زواج المثليين ممتاز .. بينظم حياة شخصين .. ما بشوف فيو سلبيات عدا مشكلة التبني إذا تمت .. لأن أسا أول طفل متبني من مثليين ما كبر كفاية ليقدروا يحددوا .. وهل تأثرت نفسيتو كون عندو أبوين و من دون أم ..
* الفساد أسوأ أنواع الخراب .. تصليحو أمر صعب بس مهم كتير
* سوريا كل شي .. كل سوري لازم بفتخر بسوريتو .. بيكفي أنها مهد الجميع



5- رأيك بمن يلي:

* السيدة فيروز عملاقة .. خلتنا نعيش أكتر
* الشاعر نزار قباني عملاق .. كل إحساس إنساني منظملو بيت شعر
* جورج وسوف ما بحبو .. بحس أغانيه مكررة ومملة
* الاعلامي فيصل القاسم شخصية قوية .. وصل بقوة شخصيتو مو بكتاباتو
* الاعلامية أوبرا شخصية رائعة وانسانية .. بتمنى أني شوفا شي يوم ولو مدة نص دقيقة
* نانسي عجرم بحب أغانيا .. بحسا طفولية وعفوية
* صدام حسين مافي رأي .. محايد ..
* اسامة بن لادن عم يلعب دور الله .. ما بظن الله موكلو لـ يحاسب العالم ويقتل العالم .. ما بطيقو
* السيد حسن نصر الله كـ شخص ما بحبو نظراً لـ طائفيتو المخباية سابقاً .. بس كـ سياسة فـ مع أفكارو
* السيدة اسماء الاسد بحبا كتير .. بتأمن بقضايا انسانية كتير وبتدعما .. بتمنى لو بقدر أعرف رأيها عن المثلية باعتبارها أنسانية
* رامي مخلوف جاب كتير أشياء حديثة وجديدة ع البلد .. بس ما بعتقد بهدف تطوير البلد .. لأهداف تانية
* الوليد بن طلال كمان جاب شغلات جديدة وحديثة ع المنطقة .. بس بيتبرع بمبالغ خيالية لجمعيات انسانية وصحية .. بحترمو ..
* جورج بوش حاول يساوي شي بس ما زبطت معو .. والمشكلة انو من ما بيعترف بأغلاطو .. وبيكمل .. ومن خراب لـ خراب
* هتلر متعصب بغيض
* مصطفى طلاس مافي رأي .. أو يعني ما بعرف شو بدي أحكي عنو
* وليد جنبلاط متخبط عقلياً .. جد وبدون مزح بدو مشفى أمراض عقلية .. ما بيعرف شو بيحكي .. بيحكي شروي غروي .. ما بيعتمد ع حقائق بحكيه .. عندو نقص بشخصيتو بتخليه يحكي شي ما بينحكى .. إلى مزبلة التاريخ
* اسماعيل هنية أنا ضد حماس بشكل عام .. لأن بكره الاسلوب العنيف .. بس كمان ماني مع استهتار فتح ..
* مارسيل خليفة فنان مبدع .. وطني عريق .. ضل ورا القضية يللي بيأمن فيا
* بسام كوسا مبدع وممثل سوري ساخر .. قدم اعمال ساخرة بطريقة رائعة .. بتمنالو التوفيق



6-لو:

* فيك ترجع واحد بس ع الحياة مين بترجع؟ ما برجع حدا .. يللا راح راح
* تطلب طلب من الله يتحقق؟ أنو ينزّل أية وحدة بس لكل دين وبقوللون انتو فهمتو الدين غلط
* 3 طلبات من مارد المصباح؟ شعور كامل بالرضى عن نفسي - حبيب دائم - إنشاء جمعية ذات مركز معروف بسوريا بس مع شرط أنو يحميه من البطش
* تغير شي واحد بحالك؟ عدم الانفعال

7-وجه كلمة لكل من ما يلي:

* الرئيس بشار الاسد حارب الفساد بيديك .. خليك محافظ ع وطنك .. عض النظر عنا مؤقتاً وادعمنا لاحقاً (نحن المثليين)
* أمك سامحيني إذا غيبت ظنك .. وعمليلي تبولة
* صباح عبيد شذوذ قراراتك ما رح يوصلك لـ شي .. عنا عقل لنختار بحكمة بدال القرارات المتعجرفة تبعك
* ريمي الي زتتك هون الله يسامحك انكسر ظهري صارلي 10 ساعات تماماً عم بكتب
* مشرفي أخوية بشكل عام تنشطوا اكتر كلكون .. وشكراً الكون ع الشي يللي عملتولي ياه ..
* مساجين الرأي تبعين أخوية ولا يهمكون .. صرتوا فخر النا .. وبسجنكون وصلتوا رسايلكون لعالم أكتر من بينون أنا

شكراً كتير
ما تقلت عليك بعرف دمي خفيف
لا ابداً ما تقلت علي