موضوع حلو.... شكراً...
1-هل من الضروري أن يدرس الدين في المدارس؟ هل وظيفة المدارس هي التربية الدينية؟ ولماذا هذا الإصرار على التربية الدينية؟
أنا برأيي أنو لاء... من غير الضروري أبداً أن يدرس الدين في المدارس.. أو على الأقل بالطريقة التي يدرس فيها حالياً.. (قصدي أنو نفصل المسيحية لحال والإسلام لحال وكل واحد ياخد دروسو لحالو)... الفكرة إذا كان في بد منها ليش لحتى ما يصير الحصة مشتركة وعن فكرة الميثولوجيا والأديان... يعني بالمختصر تطور فكرة البشرية عن الله.. من أول ما وجدت البشرية لهلأ، بطريقة علمية بحتة بدون ما يكون إلها أي علاقة لا بالخوارنة ولا بالشيوخ، وإنما المناهج بتنحط من أكاديميين بالهالموضوع (وما أكثرهم).... بعرف أنو الفكرة مبدأيا غير قابلة للتنفيذ بس بتضل فكرة مطروحة...
أما بالشكل الحالي، فأنا بشوف أن هالأسلوب العقيم بحصص التربية الدينية لا جدوى منه ولا يؤدي إلا إلى نتائج عكسية... والمدرسة كمان ليس من مهامها نشر التلعيم الديني بل الثقافة الدينية، وشتان بين الإثنين...
2-ما مدى السيطرة على الإسلاميين في دمشق؟ هل بدأ الحبل يرخى للسلفيين والوهابيين على حساب العلمانيين؟ أم أنهم تخلصوا من الحبل بالقوة؟؟
السيطرة على الإسلاميين في دمشق (أو سوريا)... هون الموضوع برأيي شائك ومعقد... أنا باعتقادي أن السلفيين والوهابيين غير مرغوب بصعودهم في سوريا (حتى من قبل الحكومة)، ولكن المشكلة بإيجاد البديل. أنا عم شوف أن التوجه العام بالحكومة عندنا هو نحو الاعتدال الإسلامي وتشجيعه من أجل كبح التطرف الإسلامي، بس هالشي لهلأ ما عم يجيب نتيجة، ويا خوفي تنقلب الطبخة على الطباخ!!!
3- من يتحكم بالجيل القادم؟ وسط ضعف وزارة التربية والمناهج، المد الإسلامي، وقوة وتمويل المتعصبين من كل الجهات(خارجية وداخلية)؟
من يتحكم بالجيل القادم؟؟ آآآخ على الجيل القادم... أنا تمر عندي لحظات ضعف أفقد الأمل من الجيل القادم... بس بعدين برجع بتفاءل، ما من أي منطلق ولكن من منطلق أن التفاؤل هو خيار استراتيجي... مشان هيك أنا بالفترة الأخيرة صرت متفائل بالجيل القادم..
أما من يتحكم بالجيل القادم، فهذه مسؤولية المجتمع ككل، أنا بشوف التأثير بالجيل الطالع بشكل عام ما بيكون بس بالمواعظ والتلعيم... بموقف، بتصرف، بكلمة، بمبدأ، بكل تفصيل من تفاصيل الحياة اليومية بتزرع بذرة وانشالله منشوف هالبذور عم تكبر وتصير شجر مثمر...