[krimbow]

كاتب النص الأصلي : WHITESNAKE

بس سؤال واحد وللكل ورح ارجع حطو كموضوع اذا تهمش وأرجو مشاركة الباقيين سواء الأخ السعودي أو غيره

لكل المسيحيين والملحدين وباقي الناس يلي معارضة أي شي ممكن نساويه منشان موضوع نشر الصور وبأكد على أي شي ممكن نساويه
وحسب الردود يلي كانت فبتصور انو أشمل الملحدين والمسيحيين سوا هو الصحيح مع التحفظ من كم واحد مسلم يمكن واحد فقط ممكن يشمل معهم وبغض النظر عن العقيدات رح ابدا بالسؤال:

ممكن تتفضلو وتقولولنا شو بدكون بالضبط؟؟ مارح اسأل شو مدايقكم لأنو مابيهمنا
شو المطلوب ؟ اذا عم تنصحونا أخي كتر خيركم وصل المعنى لالنا ويمكن ناخد بالنصيحة ويمكن لاء هي حريتنا
بدكون تنتقدونا كمان خلصنا ووصلنا نقدكم كمان يكتر خيركم يمكن نظبط حالنا من نقدكم ويمكن لاء وهي حريتنا
بدكون تتمسخرو وتتضحكو فكمان مشكورين حبابين تسلمو وصلنا مسخرتكم والتفتو لحالكم وتركونا بحالنا اذا بكم واذا مابدكم كمان مو مشكلة والله بس انو كمان مسخرتكم وصلت وفهمنا شو بتقصدو
بدكون تعطونا حلول ؟ مابتصور سبق وصار بأي رد كانو كلهون عم ينصبو تحت خط واحد وهو انو نحن كمسلمين خطأ بنظركم بقى شو ماعملنا غلط وخصوصاً انكم بتلاقو رسولنا غلط ومابتحبو ولا بطيقو أي شي ممكن يقولو او اي شي عنو......الخ بقى أكيد انتو ممكن تكونو بأغلبية هاه وليس الكل بأغلبية مؤيدين لموضوع الصور وانها عم تحكي صح
لاتقولولي ناقش بموضوع انها طيب مو صح لأنو عبس مخكون انتو يلي مابيعرف شي غير التعند بيللي بدكم ياه وماسبق وشفت حدا اقتنع قبل (أكيد رح تقوقو لأنو مافي شي صح)

هلأ هاد كللو شي وأهم شي أنو يللي صار صار واحترقت السفارات ونحن أغبياء وبهايم بنظركم وشعب أهبل (مافي غيركم الفهمانين والمفكرين الرائعين بس ضيعانكم بهالبلد)
أخي نحن حرين نحن هيك عملنا وانتو هيك عملتو ونحن هيك حكينا وانتو هيك عم تحكو نصطفل وتصطفلو نحن مقتنعين بالشي يلي عم نساويه واذا مو مقتنعين فبيناتنا منحل قصصنا لا حدا يدحش حالو وصي علينا لأنو ذكي فنحن أغبياء عبعضنا وانشالله منعمل شي بيحقق غاياتنا كأغبياء هي حريتنــــــــــــــــــــ ـــــــــــــــــــــــــ ـــــا

شكراً لحقدكم وشكراً لتعصبكم وشكراً لمسخرتكم فهي ان دلت على شي فدلت على انو انتو ال(مابدي استخدم تعابير مش ولابد) متخوزقين وشو ماصار بيضل كلشي بقلوبنا من عقيدة او فكر او محبة لرسولنا كتل ما انتو بقلوبكم اي شي بتحبو بتدافعو عنو بشراسة ونحن هيك حاولنا نحاوركم بس يبدو انو هي نهاية الحديث انا غلط وانتة صح ورح ضللني غلط ومتخلف ومنشوف للزمن مين يلي رح يحقق الصح من الغلط مع الزمن وليس هلأ تقولولي نتائج السنين السابقة
نحن ولاد اليوم

مرة أخيرة
تحيى الحرية بالمنبر لأنو خلتني أحكي هيك بدون اي شي عقائدي

عال كتير
مزال القصة هيك ليش عم تحاور بالاساس ؟؟؟
طالما انت مزعوج من الحوار ليش عم تحاور ؟؟ حدا ضاربك ع ايدك ؟؟؟

و تأكد انو ما كنت عم اتمسخر ... حتى لو بالاول كنت عم اتمسخر ... بعد حرق السفارات ما عدت عم اتمسخر
الشغلة اكبر من مجرد حرق بيناية او تنتين

اساس حواري معك انو في شغلة ما عم تركب بعقلي
منطقيا في عندي حلين
يا اما الرسول الكريم شخصية عظيمة و اشرف الخلق (متل ما بتقولوا بادبياتكم) و بالتالي ما ممكن لمليار صورة انها تسيء الو
يا اما شخصيتو مهزوزة لدرجة انو كم صورة بتسيء لألو و بالتالي معكم حق تعملوا يللي عم تعملوه لحتى ما تفرط شخصيتو و ينكشف
انا من اتباع الحل الاول .. و كل حواري معك كان لوصللك انو الرسول اعظم من انو تهينو كم صورة

و بصراحة ما عم تركب بعقلي انو تقيموا القيامة مع انو الرسول ما ممكن تسيء الو هالصور
و بوكرا بوقت الحساب (ازا كان في حساب و جنة و نار و علاك مصدي) الرسام وحدو رح يخش النار ... هوي و اللحمة المشوية
بس انتوا ما رح تخشوا النار سواء دافعتوا عن الرسول و اللا لأ لأنو الله اكبر من هيك بشوي ... لأنو اساسا الرسول اكبر من انو ينهان بهيك صور
و خصوصي انو "لا تزر وازرة وزر اخرى" و ما حدا بيضرب حدا منية بهيك مسائل مصيرية
و ما حدا عم يهين الرسول غير يللي بيقتنع بعكس هالفكرة
و ازا كان في حدا بدو يفوت ع النار لأنو ما دافع عن الرسول ... فتأكد انو رح يفوت ع النار لأنو ما دافع عن فلسطين و الاقصى الشريف

شكراً لحقدكم وشكراً لتعصبكم

قبل ما تتهم الناس بالتعصب ... شوف شو هوي تعريف التعصب الديني:
"أية تفرقة أو استبعاد أو تقييد أو تفضيل بسبب الديانة أو الاعتقاد يهدف أو ينتج عنه إبطال أو الحيلولة دون الاعتراف بأي حق من حقوق الإنسان أو الحريات الأساسية أو التمتع بها أو ممارستها ".
هلأ يا ريت تخبرنا وين تعصبت لما قلتلك انو الرسام عم يمارس حرية الرأي ؟؟؟؟


بتعرف شغلة خيو

ازا هيك بدنا نقضيها آخدك صد و تجيبني رد ما رح يمشي الحال

انت و انا زعلانين و مقهورين ... و على فكرة نحنا التنين زعلانين و مقهورين لنفس الاسباب
انت زعلان و مقهور ع الصورة البشعة يللي رسمها الارهابيين عن الاسلام
و انا زعلان و مقهور ع الصورة البشعة يللي رسمها الهمج عن سوريا

انت زعلان و مقهور على نتايج الصورة البشعة عن الاسلام
و انا زعلان و و مقهور على نتايج الصورة البشعة عن سوريا

ما بعرف عنك شو رح تسوي
بس من جهتي (مع اني بالعادة متشائل) كتير شايف الصورة سودا