[VivaSyria]

أبو حلب خدني بحنانك شوي الله يرضى عليك لأنو عن جد كنت بتمنى انك تكتفي بالرد يلي قبل هاد بحكم انو أقرب للواقع وللحقيقة:

كاتب النص الأصلي : أبو حـلب

9 شهداء تغمدهم الله برحمته قد إنضموا إلى مواكب الأبطال،

بأي ذنب انضموا لمواكب الأبطال؟؟ ومين بياخد بتارهون؟؟؟ ولو لاسمح الله كان الك قريب من بيناتون ياترى كانت رح تكون ردة فعلك نفس الشي؟؟

سوريــا لا تفكر بالعقلية العربية القاضية .. (إنزال بـ إنزال ، صاروخ بصاروخ)

إلون الشرف العرب اذا بيفكرو بهالطريقة يلي عم تحكي عنها... بس ياريت أعرف شو العقلية يلي النظام بيفكر فيها؟؟؟ ضربة بعمق الأراضي السورية بدير الزور وتدمير بناء عسكري واستشهاد عدد من المواطنين...ياريت تنتبه معي هون على هالعوامل انو اسرائيل ضربتنا بالعمق وانتهكت الأجواء السورية وراح شهداء من الغارة.... نحنا كيف ردينا؟؟؟

ماسمعت عن رد على هالعملية إلا اذا بتقصد انو بعد شي عشر أيام من هالقصة حماس ضربت صاروخ اجا بصحراء النقب... اذا هي طريقة الرد المشرف يلي انت بتشوفها مناسبة على يلي صار ما فيني قلك شي غير الله يهنيك..

بس عندي إلك سؤال وياريت تجاوبني بصدق: إنت شايف انو طريقة رد حكومتنا العظيمه سليمه ومشرفه؟؟ يعني اسرائيل بتضربنا وأميركا بتضربنا..وبيضربونا علناً..ونحنا منروح مشان الله ياحزب الله عملو شي أو ياحماس دبرونا...برأيك هي طريقة الرد الصح؟ هي الطريقة يلي بتحفظ الكرامة؟؟

لن نخضع للإبتزازات الأمريكية ولن يستدرجوننا إلى ما ليس في مصلحتنا ،
نحن قوم لا نُستفز ولا نؤخذ بالعواطف ,, الرد قادم ,, وكما ردت سوريا على إختراقات الطائرات الإسرائيلية لأجوائها
بشن حرب ضروس في جنوب لبنان كبدت العدوان الإسرائيلي خسائر فادحة،

انت عن جد عم تحكي عن حكومتنا ؟!!!!
ماعم افهم شو هالطريقة الخطابية هي.. يعني مع احترامي إلك بس هي الطريقة كبيرة علينا شوي وهالكلام حرام يطلع مننا مشان ما يفقد قيمتو... تروك هالكلام لحسن نصرالله أو لهوغو تشافيز ياسيدي... اتركو لحدا عن جد عمل شي بحياتو غير الحكي الفاضي..

فإنها سوف تنتقم لأبنائها من الجنود الأمريكيين ومن يساندهم من العملاء العراقيين ..

كمان سؤال: انت بينك وبين حالك مقتنع بيلي عم تقولو؟؟ شهداء وجرحى وبهدلة وانت عم تحكي بهالطريقة الخطابية الخشبية... يعني انت شايف الوقت مناسب؟؟
والله يا أبو حلب نحنا مو باجتماع حزب ولا بموضوع تصاميم للرئيس... خلينا نحترم شوي الموقف..

و ليس من الضروري أن تعلن سوريا العظيمة (شعباً أولاً و حكومة ثانياً) أنها ردت
ولكنكم ستشعرون بجحيم الرد في جلودكم ،
وسلامي لكل سوري ولكل صامد مضمد لجراحه سائر على طريق المجد.

رجاءً رجاءً رجاءً... بالمواضيع يلي بهالحجم ماتحكي بهالطريقة... لأنو هي الطريقة وهاد الخطاب هو يلي موت شعبنا الجوع وهو يلي هدر كرامتنا ودمنا... وهو يلي عم ينقلنا من سيئ لأسوء..

والخلود لرسالتنا.