[yass]

كاتب النص الأصلي : أسير التشرد

مرحبا شباب وصبايا...
مرة من المرات وبعد سماعي نبأ قرار اعدام صدام حسين...وانا عم اتمشى بالشارع رأيت صورتو ع القمر..اي ع القمر الصورة كانت مرسومة... صحيت يا الهي يعني معقول هالزلمة صار من اولياء الله الصالحين..؟!!!

خلونا بالجد..والحكي المزبوط..
قبل ما نتفلسف عليكم بحكي تقيل شوي... نصيحتي انو خلينا نرجع للتاريخ...لانو فينا نفهم شخصية هالزلمة كيف كان وكيف استلم السلطة...بعدين خلينا نعمل منو إله او قديس او قائد مفدى او موحد العرب بوتقة واحدة وضمن هدف واحد وتحرير القدس...

وكمان لا تخلو العمى السياسي والفكري انو يخليكم تظنو لفترة انو الرجل كان عم يشتغل لصالح شعبو ولبقية الشعوب.. مثال بسيط خلينا ناخدو من احتلالو للكويت..برأيك محبين صدام حسين انو يا ترا هل يحق لبلد قوي انو يعتدي ع جارو.. الضعيف..؟ بحجة انو هالجار كان سابقاً محافظة من محافظة هالبلد..؟

خلونا نفهم ليش صدام حسين استلم السلطة.. وكيف وشو صار لما استلم السلطة..ووين صار بقية اعضاء الحزب(حزب البعث العراقي قبل فترة استلام صدام السلطة...)..؟

خلونا نفهم ليش ببداية استلام صدام السلطة صار اعلان حرب بين العراق وايران..؟ ولو فتلنا برأسنا للخلف قليلاً للتاريخ رح نشوف انو العراق ما كانت بحالة حرب مع ايران قبل استلام صدام السلطة لاكثر بل لمدة طويلة من الوقت..!!

رح نحكي هلأ بالوضع الحالي..
الكل هلأ من اللي اعمارهم بتقل عن عمر ووقت استلام صدام السلطة(لانو الاغلب مو عرفان تاريخ العراق كيف كانت وقت الملكية وبعد الملكية وزمن الاحزاب والانقلابات وبزمن استلام البعث السلطة..) يمكن البعض ما بيعرف انو بعض التفجيرات حصلت بدمشق بزمن الثمانيات حصلت بأمر من القيادة البعثية بالعراق...

يا حلوين المقارنة بالحالة الحالية مع الحالة اللي كانت سابقاً بزمن صدام غير مجدية... (يعني هل انت بترضى بحكم دكتاتوري مستبد قايم ع نتائج انتخابات تصل إلى 100 بـ 100..؟ وباعتبارك انسان حر وبتفهم بالحرية... بظن صعب الاجابة ع هالشق...

السياسية معقدة جداً... حالة العراق الحالية مافينا نقول انو صار لما صدام راح..؟ بالعكس هالحالة نتيجة اعمال رئيس مستبد كان عم يخدم مصالحو ومصالح دول اكبر خارجية...

خلينا نفهم شوي... كيف الامريكان صاروا بالمنطقة اكتر واكتر قرباً وعمق من خلال انشاء القواعد العسكرية...فينا نرجع لورا شوي ونشوف انو هالمنطقة كانت خالية تقريباً من التواجد الامريكي من خلال التوازن بين الامريكان والسوفيت سابقاً... ما بدنا ندخل بتفاصيل هون... بنرجع...

امريكا صارت عنا بسبب صدام.. احتلال الكويت.. وعشرة سنوات من الحصار الاقتصادي ع الشعب العراقي فقط... ما عدا السلطة اللي كانت عم تلعب بالنفط والمال..من خلال بيع النفط ع حسابهم الشخصي..
وتوزيع البونات ع الاصدقاء ع الدول المجاورة...

ما فينا نقول ع الاردن غير انها بلد طفيلي ..(طبعاً الكلام موجه لطبقة الحكم مو للشعب..).. بنلاحظ انو الاردن المستفيدة الاولى من كل شي عم يجري بالعراق... عم تاخد نفط بزمن صدام بسعر تفضيلي وبعدين وقت الحصار استفادت من البونات النفطية (برنامج النفط مقابل الغذاء..)..وحالياً كمان عم تلعب دور مميز من خلال فتح الطريق للارهابيين حتى نالهم من الارهابيين ما نالوا...

يمكن بنلاحظ بعض او الاغلب الفلسطنيين بحبو صدام حسين...وهالشي نتيجة اطلاق صدام شعارات الوحدة والعروبة ووعدو بتحرير القدس وهالشي تم ع اساس انو اسس جيش خاص بتحرير القدس..بس شغل دعاية وحكي جرائد واعلام للناس العوام...

وكمان من خلال اعطائو بعض البونات النفطية وكمان اعطائو المال لعوائل الفلسطينيين..

الامر مستغرب كتير...انو البعض عم يطالب بانو نرفع رأسنا بشخص كان دكتاتوري..ممكن نرفع رأسنا كمان بهتلر.. هالزلمة كان ناوي يحتل ويدمر امريكا وبريطانيا... وكان حاقد ع اليهود كمان..متل ما كان صدام ع اساس يعني..!!!

خلونا نفهم يا حلوين انو قيمة الانسان بعملو مو انو يدمر بلدو من خلال حروبو مع جيرانو...واستنزافو لكل طاقات البلد حتى صار البلد تحت الديون ...

لو بدنا نحكي ...عن قذارة فترة حكم هالرجل ...الحكي ما رح يخلص...
باختصار شديد إلى مزبلة التاريخ يا صدام.. وكل حكام العرب...
وخلونا نصحى ع عقولنا ونفهم حقنا بتقرير مصيرنا وانو لكل فرد الحق بالرأي..

ويا هلا...

كلام رائع فعلا

تحياتي