[محمد 13]

السلام عليكم ورحمة الله وبركاته
اهلا بيكم جميعا
قبل ما ابدأ اتكلم حبيت اوضح لكم انى قرأت شروط الكتابة فى هذا القسم ولكن معرفتش بردوا اعرض مشكلتى فين فانا اسف لو اسلوبى فى عرض الموضوع ممكن يضايق حد
وانا اسف بردوا لانى هطول عليكم ولكن والله ده اقصى اختصار للموضوع
انا اسمى محمد من مصر عندى 20 سنة
مشكلى هى انى من حوالى عدة سنوات بتخيل انى بكلم ناس
والناس دول موجودين فى الواقع مش شخصيات انا بخترعها ولكن الناس دول ما بسمعش ليهم صوت او بشوفهم دى حاجة فى خيالى وساعات بكلمهم فى خيالى وساعات بكلمهم بصوت مسموع وعالى بس مش اوى واضحك كأنهم جالسين معايا يعنى مثلا مرة اكلم واحد صاحبى ومرة اكلم ممثل او ممثلة انا بحبها حتى لو هما اموات او مثلا طبيب نفسانى وانا بحكيله عن مشاكلى وساعات بتخيل انى حققت كل احلامى اللى معرفتش احققها واتعايش مع الحلم وكأنى حققته فعلا و ساعات الاقى نفسى بضحك واهزر بصوت مسموع معاهم وبعد كدة ارجع لتركيزى وصوابى واصدم بالواقع انى لوحدى وساعات تانية الاقى نفسى هادى اوى وحزين بالرغم من انى كنت بضحك من شوية
والغريب انى عمرى ما تخيلت انى بكلم والدى اللى هو توفى من سنة وانا الانسان ده بالذات لو كلمته ممكن يقلل من حزنى عليه بس انا حاسس ان الموضوع ده مش مسببلى مشكلة ده بالعكس انا بحس انا بطلع طاقتى المكبوته فيه واحب اقول ان لما والدى توفى انا فوقت من اللى انا فيه وقعدت حوالى شهر مكلمش حد فى خيالى واعتقد ان الموضوع انتهى على كدة لكن رجع تانى وبسرعة وانا فى قمة حزنى
واحب اضيف انى حزين وعندى اكتئاب ومبنزلش من البيت غير لما احب اصلى فى الجامع حتى الكلية مش بروحها
ولو حبيت اخرج من البيت مش بلاقى حد اخرج معاه بس انا حاسس ان ده شىء طبيعى لانى ماليش اصحاب غير واحد وهو معظم الوقت مش فاضى والباقى مجرد زملاء لكن طبعا اسباب حزنى ده شىء يطول شرحه ومنها اسباب عائلية.

وانا اسف انى طولت عليكم لكن اتمنى ان اجد النصيحة منكم
وياريت حد يقولى ايه هو المرض ده وهل فعلا انا مريض ولا لا
وشكرا
السلام عليكم