[personita]

أتصور أنو المعيار هون مش هو البنت راحت البيت معو ولا لأ، كانت لابسة ولا شالحة، عذراء ولا لأ، المعيار هو هل هي كانت موافقة على العلاقة الجنسية ولا لأ. فأعتقد إذا كانت العاهرة من حقا أنو ترفض أو تقبل علاقة، والقانون بيحميها من الاغتصاب، كيف إذا بنت ما الها ولا عليها. حتى ولو رايحة معو البيت، حتى ولو حطت حالها في موقف ممكن يعرضها لهيك شي، من باب الغباء أو من باب الثقة بالشخص أو من أي باب كان، بالنهاية هي ما سمحت و ما كان بدها ها العلاقة تتم، ومشان الله لا حدا يحكي لي عضلات مهبل، لأنو كأنو عم تحكو عن جدار برلين!! يعني شو ممكن تعمل هل العضلات قدام ثور؟! مع الأخذ بعين الاعتبار عامل الرعب اللي ممكن يصيب البنت في هاي الحالة. وبالنهاية ما بعرف إذا قانون تخيير الجاني ما بين السجن أو الزواج من المغتصبة، المراد منو معاقبة الجاني أو الضحية! ما بقدر أتصور حجم المهانة والذل اللي ممكن يحس بيه إنسان تعرض لعملية اغتصاب (وحكيت إنسان لأنو الرجل كمان ممكن يغتصب، في السجن مثلا)، فمن باب المقارنة، ما أحلاها في هيك حالة مشان يردولو اعتبارو يخيرو اللي اغتصبو ما بين السجن أو انو يغتصبو رسميا كل يوم!!!