اقتباس:
|
طيب لما شعب بيعرف انو هاد الشي غلط(على اي شي مو شي معين)وبيعمل هيك
|
اسمحلي شوي... بس بدي اجاوب ع نقطتين صغار.. أول وحدة الأقتباس اللي فوق
شعب بيعرف انو شي غلط.. انت عم تقولها.. كونو يعرف انو شيء ما غلط معناتو هاي الخطوة رقم واحد موجودة (رغم انو هون ما بتفق معك... في كتير شغلات نعملها, أو تنعمل فينا ما نعرف انو غلط لأنو ببساطة ما حدا قاللنا انو غلط)
بيقلك المثل انو ما يجبرك عالمر... الا الأمر منو.. بشو بدك نبدى؟
بالموظف اللي يكبسك 50 أو 100 ليرة عالمعاملة؟ طيب لو راتبو بكفّيه أنا بقلك ما بياخدهون, و اذا أخدهون بيكون ابن حرام رسمي (و هون تجي مسؤولية الأعلى منو لحتى يشيلو و يحاسبو.. مو ياخد منو نسبة %)
باللي ما ملتزم بقانون السير؟ اذا شرطي المرور مرتشي.. و ولاد الضباط ماشالله شوماخر ما بيقدرلهم.. اذا حاميها حراميها كيف راح المواطن يلتزم
اذا المواطن من شبابو بيشوف انو الحرامي كل ما حالو حرامي بزيادة... وكل ما كان حرامي أكتر كل ما ارتقى أكتر و أمورو تصير فوق الريح... مو بس هيك يفتح مشاريع و تنضرب فيه الأمثال لأبو فلان انو ليكو كيف شاطر...
لما جيل و جيلين و تلاتة يتعلّم انو الطريق الى القمة يمر بالفساد و فقط الفساد... هاد بئا مو ذنب هالأجيال. هاد ذنب اللي علّمهون هيك..
في موقف قديم صار معي بدي احكيلك ياه: كنا صف عاشر, و كان معنا بالمدرسة ابن معاون قائد شرطة المحافظة و كان تحت طيزو للولد مرسيدس 280 زرقا منفوضة و مفيّمة و عين الله عليها و يصفها بمرآب المدرسة (بمدرستنا في وحدة دفاع مدني .. ففي مرآب.. هو يصف فيه سيارتو بس شي استاز من ورا الدورات عندو بيكاب سكودا آكل هوا ما بيصير يصف فيه سيارتو ).. هون المفارقة الأولى انو زملاء هالشب كيف بدك تقنعهون انو السواقة بدون شهادة مخالفة و ما بصير هيك لما واحد من جيلهون عم يسوق سيارة شرطة..
الولد كتير أرعن بالسواقة كان.. جدا جدا يعني شي رهيب.. ضمن دائرة أبناء المسؤولين حتى شي رهيب هالولد.. فكان كل ما يعمل عملة من عمايلو ضمنيا ياكل مسبات .. العالم بينها و بين حالها أو مع أهل الثقة تسبو .. كان عندي رفيق الله يذكرو بالخير جدا صاحبي.. فمرة طالعين من المدرسة و طلع الأخ هاد بساعة الانصراف و عجقة ولاد المدرسة طلع من باب المدرسة عم يفحّط عالكوع متل العادة.... فعم نقول لعمى ضربو انو هيك و هيك .. فصاحبي هاد قال يا زلمة يطلعلو و أنا بدي اعمل جهدي مشان ولادي يكونو متلو... قلنالو لك شو عم تحكي و من هالحكي... قال أي معليه أنا قبلان ولادي بالمستقبل ياكل مسبات متل مهند ******* (شفرنا الكنية
) .. بس عالقليلة ياكلو مسبات و هنن راكبين سيارات و اللي بيسبوهون ماشيين ع رجليهون..
الشب هاد.. طريقة تفكيرو وليدة الحال اللي بشوفو... طبعا ما بحب طريقة هالتفكير لكن ما فيني ما أقدّر ليش هيك عم يفكر.. لأنو بوجداننا صار انو ما يمشي حالك لتفوت دوامة الفساد
ع فكرة... الشب خلّص حقوق السنة الماضية و آخر مرة تراسلنا كان عم يدوّر واسطة (بالمصاري طبعا) مشان يتطوّع بالشرطة
قصدي من هالحكي انو وجداننا هيك... و لازم هالوجدان يتغيّر و اللي لازم يغيرو هو اللي فوق... اللي بعملو و تصرفو زرع هالوجدان.. لما أول واحد يلتزم هو الشرطي المواطن راح يلتزم غصبا عنو... بس ما نقدر نضرب شرفيات عالمواطن لما حاميها حراميها... مزبوط؟
سلامات