[الموسيقار]

كاتب النص الأصلي : yass

يا أخ موسيقار اعتقد انو المشكلة تكمن انك -مع احترامي الك و بتمنى تقبل مني هالنقطة- مانك قادر تشوف الطابع البشري (مشان ما أقول الانساني) للقضايا, انو القضية منيح القضية أفكار أو لا أفكار.. بس ورا هالأفكار بشر... يعني شي حلو نشوف, أو نحاول نشوف, النص المليان من الكاسة... بس المشكلة انو في ناس الكاسة من أساسها مانها شايفتها... يعني اسمحلي اعطيك مثال حقيقي وواقعي آخر هالرد

هيومان رايتس ووتش أنا بقلك... كل شي مالو علاقة بالاخوان الو الى حد ما مصداقية... و مو بس علينا.. لا تنسى انو هيومان رايتس ووتش كانت أحد الأطراف اللي كشف فضيحة أبو غريب, و كانت الجهة اللي (مع العفو الدولية) كشفت رحلات الطيران السرية تبعيت قواعد أوربا الشرقية اللي كانت تهرّب ناس لغوانتانامو. على كل مو هاد موضوعنا... ما بدي أدخل بنقاش ما فيني ادعمو بوثائق أكيدة (و لا انت فيك.. خلينا نكون صريحين) بس بعرف كم واحد من اللي حواليي مسجون.. و كم واحد مضايق أمنيا.. و كم واحد ممنوع من السفر.. و كم واحد محروم من الحقوق المدنية... الخ الخ الخ... و ماني مشكلجي و لا من وسط مشكلجي

نجي عالمثال... كان في واحد بصفي اسمو دلدار.. ابن حارتي و رفيقي.. الله يفك أسرو اذا لساتو أسير و يوفقو اذا طلع... زلمة كردي.. أبوه متعهد بسيط و أخواتو متعلمين كلهم بسوريا و لا الهم علاقة بشي اسمو سياسة.. بالعكس هاد دلدار كان يرسم و شغلتو عملتو قاعد برابطة الشبيبة و اجتماعات و روحات و جييات وعضو عامل و عضو قيادة وحدة و من هالحكي... و كردي الأخ.. بالبيت يحكي كردي و مع قرايبو يحكي كردي و كل شي..

دلدار بالفصل الأول من الحادي عشر.. يعني نهاية الألفين.. تجوز أخوه و عملو العرس بالحارة ببيتهون (بيتهون كبير حوش صاير) و اجو قرايبهون و أهل الحارة و رفقات العيلة.. من كلو شوي... منيح؟ أخواتو البنات لدلدار و بنات عمو الله يستر عليهون حلوين كتير و بتعرف عرس و رقص و هيك... المهم في شلة (للتحديد بدو) طلعو على سطوح الجيران ممحونين عم يتفرجو عالبنات و يعني يوسخو شوي (زعران!!) راحو قالولهون انو يا عمي خلص روحو بئا هاد عرس ما بدنا مشاكل و ما بدنا قصص.. خيو كلمة على كلمة كلمة ورا كلمة اشتغل الضرب و انتزع العرس... اجت الجنائية و وقفت الكل.. دلدار أكل شنتيانة بساعدو (الشنتيانة متل السيف بس مرن جدا و ينلف عالخصر) و توقف بقسم المستشفى تبع الشرطة انو مشاجرة عادية.. و ع أساس مافي مشكلة خلص تنحل ..

واحد من الزعران بالتحقيق قال انو المشكلة صارت لأنو الكراد صارو يسبو عالرئيس و صارو يحرقو أعلام... و كل أهل الحارة شهدو العكس و مع عيلتو لدلدار انو عشرة عمر و ما صار هالشي بنوب! و أجت دورية المخابرات الجوية من الطبقة و شالت دلدار و أخوه و ابن خالو...

قدمنا حادي عشر, و قدمنا بكلوريا.. و طلعت البكلوريا و طلعت من البلد و دلدار ما بيعرفو غير انو "بالشام"... يعني تخيل الظلم.. لأنو كردي صدقو الازعر السافل و ما ردو ع كل أهل الحارة اللي شهدو معهم... و من هالحالات كتير تلاقي.. و لاحظ عم احكيلك عن كردي مجنس... يعني كردي عندو "نوعا ما" حقوق تعليم و توظيف و هيك قصص.. فتخيل اللي منزوعي الجنسية (اللي سبق و حكيت.. للأمانة انو نزع الجنسية عنهم تم أيام الوحدة و ليس على أيام البعث...)

هاي حالة صارت قدام عيوني.. بحارتي و جيراني... هلأ بدي اسألك لو العرس لأرمن بيستجرو الزعران هدول يعملو اللي عملوه؟ يا سيدي أكيد لأ...


سلامات

هلأ أول شي.. أنا رح وضحلكـ فكرة بسيطة ..

نحن اتفقنا بنقاش بيني وبينكـ أنو مصطلح انسانية ما عم يتراعى بأي دولة .. بالعالم

يعني متل ما الانسان عم ينتهكـ سياسيا ً بالدول العربية .. عم ينتهكـ من قبل الدولار واليورو .. و أسواق المال .. والقراصنة ورؤوس الأموال الضخمة والبنوكـ .. والقروض ..

واتفقنا ع مبدأ .. أنو أي انتخابات بتصير برا . بترتكز عالمصالح والمصالح المتبادلة .. يعني مافي شي انساني أساسا ً .. نحن بزمن المادة صديقي .. هي معلومة مهمة كتير ..

وبالنسبة للمعلومة اللي سمعتا عن صديقكـ.. أنا ما أنكرت أنو في خلل بهالقصص . وما أنكرت .. أنو في كتير ممارسات خاطئة .. وتعاطي خاطئ ..

هلأ أخوه لرفيقي رحنحكي بأسماء هو من الجزيرة واسمو ياسر العمر .. فات بتهمة الانضمام لجماعة اسلامية محظورة ... وبعد 5 شهور حاكموه .. 5 سنين طلع بعد نص المدة بالعفو اللي طالعو السيد الرئيس من سنتين ..

حكا حكي .. حولني .. عن سجن صيدنايا .. وأنو ما حدا ضربو كف .. وأنو كان يطلع ويفوت عالتنفس .. وأكل عادي .. وشرب عادي ..

في منفردات اي .. بس ما ضل شي اسمو تعذيب . .. مالو الترجمان المحلف .. بالسجون السورية ..بس هو جرب .. وحكالي .
مالي عم جمل الصورة .. لأنو أكيد أنا ما برضا لحدا يفوت السجن .. بس .. الاصلاحات الي صارت رغم أنها بطيئة .. بس أنو بتعطيكـ أمل انو بصعود الخط البياني رح نوصل لمرحلة ما يضل فيه ولا سجين ..


تحياتي ..