فصعون هو ولد عمرو بحوالي الـعشر سنين بـصير معو كل مقلب
.. يا لـطيف !! احيانا بحـط حالو بمواااقف بــاييخه... لدرجه بتفكرو عايش بالكاميرا الخفيه ..
هوايات فصعون : متنوعه حـسب المزاج .. و اليوم هوايتو هي كره القدم
المغامره الاولى ..
من كم شهر فصـعون كان عندو مباراه و خسّر الفريق خساره فادحه .. و بناء عليه تمّ فصلو من الفريق و تـشوهت سـمعتو و تاريخو الكروي ..
كان فـصعون يحب لعب كره القدم منذ نعومه اظفاره .. و كان يلعبها مع رفقاتو بالحاره .. و لما نجح باخر السنه بالمدرسه و جاب الجلاء تبعو كلو عشرات .. الا تسعه بالخط لانو خطو مفشكل
.. بس اهلو تغاضو عن هالموضوع و قررو يكافئون بشي مكافئه صيفيه ام الخمس نجوم , لذلك سـجلوه بنادي الفصاعين للرياضه
.. هالنادي هاد كان على مستوى كتير و شي فاخر عالاخر و فصعون طاااار عقلو فيه وكـيّف .. و زادت فرحتو بعد اول اجتماع للفريق .. لانو اكتشف انو اعزّ رفقاتو من بالمدرسه مسجلين بنفس النادي
.. و يومها رجع فصعون عالبيت و خبا فرحتو بصندوق الكراكيب اللي مخبيه تحت التخت لانو ما قادر يعطيها لحدا .. و صار من يوم ليوم يشق عليها و يشوف اذا لازمها شي و هالفرحه تكبر و تترعرع
و تم فـصعون يتدرب ويلعب مع هالفريق كل الصـيفيه .. و باخر الموسـم .. كان في مباراه وديه بين فريق نادي الفصاعين و بين فريق تاني بالمنطقه .. و كان الكل متـحمّس و فصـعون كان الحـماس عم يشع من عيونو و كان يتـوعد الفريق الخصم بالخساره الفادحه
.. خـصـا انو اللعبه كانت رح بتصير على ارض ملعب نادي الفصاعين .. الملعب اللي فـصعون حفـظانو سانتيمتر سانتيمتر و عندو فكره و صوره ملزقها جنب تختو عن كل زواياه و ممراتو الـسرّيه .. و تم الحال هيك و ضل فـصعون يلقي الحكم و الوعود للفريق الى ان دقت ساعه الـصفر و نزلو الاطافيل عالملعب .. و اجى الحكم ليصفر صفاره البدايه ولا بيلاقي المدرب فـصعون عم يحكي مع الحكم و بعدين عم يركض لعندو ..
المدرب : خير شوفي فصعون واجعك شي ؟؟
فـصعون : استاذ معلش ما العب بهي المباراه ؟ معلش اطلع احطياط ؟؟
المدرب: لــــك فــــصــعووووون
..
فصعون: الله يخليك استاذ
..
المدرب : ليش بدك تطلع احطياط .. مافيّ طلعك احطياط و انت بتعرف هالشي ما في حدا يغطي محلك بالعبه ..
فـصعون : استاذ , هدول رفقاتي اللي كنت العب معهم من زمان قبل ما سجل هون بنادي الفصاعين مافيّ العب ضدهم هلئ
هدول رفقاتي !!
المدرب : يا فـصعون هـي رياضه و هنن اكيد رح يتقبلو الموضوع بروح رياضيه و اذا كنت حابب تصير رياضي كبير فرح تنحط كتير بمتل هي المواقف فيلا معتمدين على همتك نحنا ارجع للفريق ..
هـون فـصعون حس انو المدرب ما عم يفهم عليه و لا رح يفهم عليه لذلك رجع عارض الملعب و لعب المباراه و خسّر فيها الفريق خساره فادحه و تم طردو من النادي بتهمه الخيانه
و انقضى على مستـقبلو الرياضي ..
طبعا اهلو لفصعون كمان عيطو عليه و خانقوه و حرموه مصروفو لمده شهرين كرمال يعوض جزء من اقساط اللي دفعوها للنادي ..
و نراكم في مغامرات قادمه