ليش حمص أحلى من الشام ؟
1- أول ما بتوصل على كراج البولمان بالشام بيسلقوك شوفيرية التكاسي "و معظمهم من العواطلية اللي مو آخدين شهادة غير شهادة السواقة" و بيقولولك العبارة الشهيرة "تكسي عالمطار .. عالبرامكة .. عالمزة .. عأبو رمانة ..... " و بس تطلع بيبلش يستفسر بطرق لف دوران شو جاي تعمل بالشام بلكي بيكتشف إنك جديد و غشيم مشان يفتلك نص الشام قبل ما يوصلك لمطرحك .. و بيبلش يسألك إطلع من هون ولا من هون ؟؟ وأنا الحمدالله بعرف منيح وين روح بقى ما بنفعن كتير بس الله يعين الغشيم .
بينما بحمص بيوصلك و ما بيفتح تمو بكلمة و ما بيدورك و عطول بيوصلك عالمحل من أقرب طريق من دون أسئلة ... يمكن لساتن عالبساطة و بيجي يوم بيصيروا متل تبع الشام ... بيجوز !!
2- بتطلع بالسرفيس بالشام بيكون الشوفير في خضم حرب طاحنة و معركة مصيرية مع شوفير تاني ع نفس الخط ممكن يسبقو على راكب مشان هيك و إنت عم تطلع بيشفط و بيشلفك بأرض السرفيس من دون ما يسأل ... و بعد 10 ثواني إذا ما دفعت بيقول العبارة الشهيرة "اللي ما حاسب يا شباب ؟" ... و غالباً بيكون معلي صوت المسجلة عالآخر و غالباً بيكون عم يسمع قرآن بس هاد ما بيمنعو يقول لشوفير تاني طحش عليه " +س إختك يا أخو الشر++طة " .
أما بحمص أنا ياما نسيان "والله العظيم نسوة" إني إدفع و بتزكر إني ما دفعت يا أما و أنا نازل أو بعد ما إنزل و بحياتي ما سمعت بحمص العبارة الشهيرة "اللي ما حاسب يا شباب ؟"
3- بالشام بتسأل شي واحد بالشارع "بالله وين المحل الفلاني فبيجاوبك بأحد الردود التالية:
* و الله بعيدة شوي ..ليك خود تكسي أحسنلك !!! مع إنو بتكون بتعرف إنو قريب و إنك بالمنطقة و على بعد كم شارع فقط لا غير ؟!
* أو بيقلك بلا نفس "طووول و عاليمين" و بتتفاجأ إنك بتمشي و بتمشي و ما بتعرف إيمتا بيخلص الطوول لحتى يجي العاليمين !!
* أو بيسألك إنت لوين رايح بالضبط و هاد بيكون واحد غليييييظ و كتير غلبة و أنا غالباً بقلو يسلمو عزبتك مشان إفتح سيرة مع واحد دايقة خلاقو من قلة الشغل ..
بينما بحمص بتسأل بيقوم لولا شوي بدو يوصلك بإيدو أو عالأقل بيدلك متل الخلق و العالم .
4- بتروح على شؤون الطلاب المركزي بالبرامكة لحتى تطلع شهادة الجامعة -ريتك بلاها- بتلاقي كرتونة على باب غرفة تقديم الطلبات مكتوب عليها "يبدأ الدوام من الساعة 10.30 و حتى 1 " !!! و العالم بتكون صارت أمم عالباب و إنت و الله تخلين يفتحوا قبل 5 دقايق .. أبداً إلا عالنص تماماً ؟! و لما بيفتحوا بتلاقي شبين أشبه بالجحاش و كل واحد قالب خلقتو كأنو شامم خر+ة تحت إنفو أو كأنو عم نسرقو ؟؟ بتقدم الطلب و بتاكلك كم بهدلة و بيقولولك رجاع بعد شهرين !!! سوبر سبيد !!!
بينما بحمص ما عنا شؤون طلاب مركزي من أساسو .
5- بتفوت على نقابة صيادلة سوريا تطلع شي ورقة بيستقبلوك كأنك شحاد مو صيدلي و بتتنرفز منك الآنسات و المدامات لكتر أسئلتك اللي بلا طعمة متل "من وين لو سمحتي بطلع هالورقة أو فيي قابل النقيب بعد إزنك ... " و بتخلين يدخنوا بزيادة و يطلبوا فنجان قهوة يروقن بعد قرفك و أسئلتك السئيلة ؟!
بينما بحمص دخيل عينو أبو الخل سكرة و النقيبة أحلى و أحلى .
6- بتخلص شغلك و بدك ترجع بوقت الضهر عالكراج بتحفى على سرفيس أو تكسي فاضية ما بتلاقي و لما بتطلع بتعلق بالزحمة و بيجيك نوبة ربو عالإشارة من كتر دخنة السيارات و بيصيبك إنهيار عصبي لما بتفتح الإشارة و بتبلش السيارات من على بعد كيلومتر تزمر مشان أول سيارة تمشي
بينما بحمص الزحمة أخف و الدخنة مقبولة و الزمامير أهدا .
7- بتفوت على الكراج بالشام بيستقبلوك الشباب بعبارة " عوين عحلب ؟ عحمص ؟ عاللادقية ؟ الباص ماشي هه .. و بتوصل لنص مكتب الأهلية و هاد الدب لاحقك مشان يطلعك بشركتو الجربانة
بينما بحمص بيطلعلك عالباب كم واحد من هدول و بس ما رديت عليهن بيتركوك .
8- بتقلو للموظف بمكتب الحجز "بالله إيمتا في باص عالشام-زلة لسان يعني- قصدي عحمص " بيقوم بيفضحك و بيقلك "صحي إنك حمصي.. إي نحنا بالشام"
بينما بحمص بتخربط و بتقلو " إيمتا في حجز عحمص .. قصدي عالشام " فيبتفهمك و بيجاوبك من تعليق لأنو أخوية 
أعـشق عـمري لأنـي إذا مـتُّ أخجل من دمـع حـبـيـبـتـي ... و أمـي
______
في حضرة الإمبراطور اليوفي و الأسطروة دل بييرو .. يركع الملكي المدريدي
______
احذروا قناة العربية
لأنها قناة حريرية عبرية أميريكية سعودية قذرة
همها الأوحد تشويه صورة سوريا العظيمة
|