هلأ الموضوع جميل فعلا بس كنت اتمنى يكون أكثر تخصصا.. يعني 3 قضايا بوقت واحد ما بلحق
أي... هلأ كنقطة أولى (و كمان اتمنى ما يقلب الموضوع الى نقاش حول سياسة أخوية تجاه المواضيع الدينية)... ماني موافق على انو "مافي وعي كافي" لحتى ينطرح مواضيع دينية بالمنبر.... أساسا مين هاد الجرئ اللي يقدر يقيّم وعي الناس.. ببساطة مافي مواضيع دينية لأنو مالنا مصلحة.. لا عنا لا كادر و لا قاعدة عمل و لا حتى رغبة نشتغل بمواضيع دينية... و على اعتبار النت ملئ جدا بالمواقع التي توفر هذه الساحة من السجال فنحنا أخي مالنا مصلحة (هاي بما يخصني كمشرف منبر... و اتمنى النقطة هاي تنتهي هنا, ما بقا نحكي عنها بهالموضوع)
دين سياسة جنس... ايو منهون تابوه؟... أو ايو منهون تابوه صرف؟
الدين مانو تابوه... الدين دوغما تتحول عند البعض الى تابوه.. الدين حالة روحانية مبنية على الايمان بغيبيات لا يمكن للمؤمن بها اثبات وجودها (اثبات وجودها بحسب منطق الديالكتيك) لأنو بالنسبة الو مجرد الايمان به هو دليل وجود... في دوغما ايمانية, و الدوغما و الديالكتيك ما بيجتمعو لذلك دائما اعتبر أي نوع من النقاش الديني-اللاديني الخاص بالامور الروحانية (يعني تعا اثبتلك انو الله مو موجود لأ تعا انا اثبتلك انو موجود و راح ينتقم منك و من امثالك...الخ) هو اضاعة و هدر للوقت و الجهد و دائما بلا نتيجة... أو بنتيجة معاكسة لأنو طريقة التفكير النظري مختلفة, طريقة الاثبات مختلفة و حتى اسلوب الاقتناع مختلف.. يعني تخيّل قاعد تناقش شخص متدين (و لنفترض مسلم) و المسلم عم يقلك يا عمي شوف الشمس و القمر و الكواكب شلون ماشيه متل الليرة و محسوبة تماما و هذا دليل قوة الله عز و جل, تجي انت تقلو لك لأ يا عمي هاي هيك لأنو في مجموعة قوانين فيزيائية خاصة بالجاذبية و الطرد المركزي و هالقصص (ينط البعثي يقلك ألله يخليلنا سيادة الرئيس على هالقوانين
)... المهم... راح تظلو ساعات طوال تناقشو و ما راح توصلو لشي الا لتضييع وقت بعض.. ما تتكلمو نفس اللغة و لا تستعملو نفس المنطق...
السياسة تابوه قمعي او خوفي... و تابوه الخوف هو أحد أكثر المسائل المثير للاهتمام بالنسبة الي بعلم الاجتماع... يعني المستبد يكفي انو يزرع بذرة الخوف.. المجتمع يتكفّل بالباقي, يعني بعرف المجتمع بالدول المحكومة "بوليسيا" اللي يتجرأ و يحكي يا أما مجنون يا متفزلك يا مستهتر و ولد... انو بيقولولك يا زلمة حط راسك بين هالروس و قول يا قطاع الروس... و بلالك وجع الراس لا لألك و لا لغيرك (فيك تقول ثقافة القطيع.. هالثقافة عايشة فينا كلياتنا حتى نحنا اللي نحاول نكون "أحرار")
أما الجنس... هاد أقرب المصطلحات الى التابوه, و كمان تابوه اجتماعي كبير... بس هاد بدي خلي غيري يحكي فيه....لأنو ما عم اعرف اعبّر منيح و الكلام لمجرد الكلام مو حلو... نرجعلو بعدين
