[yass]

أي؟؟؟!!! شو قررتو يا با شو كانت الديمقراطية؟

الديمقراطية هي بكل بساطة مجموعة الانظمة التي تضمن الدور الفعّال للشعب في المشاركة في الحياة السياسية و اتخاذ القرار, و هي تحويل مفهوم الحكم من مفهوم الولاية (انت الفهيم و نحنا هبل تعا انت احكمنا) الى مفهوم التمثيل (حاطينك لحتى تمثل رأينا و قرارانا)

الديمقراطية لا تعني فقط اختيار الحاكم (بمعنى شخص رئيس الدولة) انما هي مجموعة ضخمة جدا من الاجراءات تبدء من الحرية النقابية الى شفافية الادارة المحلية للاحياء و تنتهي على مستوى رئيس الدولة..

الديمقراطية دستورية.. شو يعني؟ الشغلة مو سلطة... السلطة محدودة جدا بدستور واضح و صريح و غير قابل للتعديل الا باجراءات معقدة و طويلة جدا

الديمقراطية هي استقلالية السلطات التشريعية و التنفيذية و القضائية... الخ

الحكي عن الديمقراطية و أبعاد الديمقراطية على مستوى الحريات...لاحظ أبعاد, الديمقراطية مو انو تكون حر بالرأي... الديمقراطية أكبر بكتير

هل كل الديمقراطيات نفس بعض؟؟ مو شرط, بالاحرى الـ"أسانس" تبعها واحد و هو سيادة الشعب... تختلف اساليب ترجمة هالسيادة الى سلطة فعلية لكن هذه قضية اخرى خاصة بخصوصيات كل مجتمع

هل الديمقراطية وليدة تطور خاص بكل دولة ام انها نموذج ينقل بحرفيته؟ طيب لا هاي و لا هاي بحرفيتهون, شي بالنص ... راح حط مثال مبتذل.. انت عندك تلفزيون بخصائص معينة و اجاك هدية من اليابان جهاز ديفيدي .... و طلع انو باليابان نظام المآخذ الكهربائية و نظام التوصيل عالتلفزيون مختلف.. ياترى تدوّر على طريقة عن طريق وصلة أو كابل مشان تقدر تأقلم هالديفيدي على أنظمة الكهربا عندك و على تلفزيونك و للا ترميه و تقعد تخترع ديفيدي من أول و جديد


هل نحن كـ سوريين جاهزين للديمقراطية؟ طبعا لأ... الديمقراطية ما بتفوت متل العراق.. الديمقراطية بدها فترة تحويل ديمقراطي قد تطور لسنوات و حتى عقد أو أكثر لحتى يكون في ديمقراطية مؤسسة... أعتقد انو بسوريا جاهزين للتجهيز للخطوة الأولى (لاحظ مو جاهزين للخطوة الاولى, انما جاهزين للتجهيز الها), و أكيد الطريق طويل جدا و صعب جدا لكن النتيجة تستحق فعلا... مالازم نرجع نخترع الديمقراطية من جديد, لأ , انما لازم ناخد تجارب الدول و تجربتنا الذاتية السابقة و نعيد صياغة نظام يضمن خصوصيتنا و يقدّر ظروفنا الخاصة

أما بما يتعلق بالتخلف و الجهل الذي يتم التحجج به... طيب عنا صح ما بقول لأ... بس يا ترى مشان شعب يكون ديمقراطي لازم يكون شعب المدينة الفاضلة؟ يا سادة الى اليوم بالولايات المتحدة في ناس ما عندها كهربا بالبيت و لا تركب سيارة لأنو أجدادهون ما كان عندهون هيك قصص (الآميش), باسبانيا لليوم في ناس متأثرة بالحرب الاهلية و تروح تصوت مشان ما يطلعو "الحمر" (الاشتراكيين و الشيوعيين بمنطق الحرب الاهلية), ببريطانيا حتى فرق الفوتبول باسكتلندا و ايرلندا مقسومة ع أساس كاثوليك و بروتستانت

كل الشعوب عندها مشاكلها و أحيانا حتى أكثرها ديمقراطية يكون عندها مشاكل أكبر حتى من مشاكلنا.. و هذا أمر طبيعي و ليس عيبا... طبعا في مشاكل و اللي ما يجوز انو ندفن رؤوسنا بهالمشاكل و نتحجج فيها مشان نقول انو الديمقراطية ما تلبقلنا...



عذرا للاطالة