[oliver68]

والله يا شباب الواحد ما بيعرف شو بدو يقول، أكيد بدي سجل تضامني مع هالشباب الحر، والحرية بتكون حرية الفكر والقلب قبل ما تكون حرية الجسد، ويا نيالو يللي بضحي بحرية الجسد مشان حرية الفكر والقلب!!!! أنا برأيي هي الحرية على أصولها.

بتمنى من نظامنا إنو يكون شوي منفتح أكتر، وبتمنى من رئيسنا المتعلم ويللي بيعرف تماما شو هيي الحرية، بتمنى منو يوقف هالمهزلة، ويعرف إنو كل شباب سوريا مستحيل يشتغلوا ضدها، نحنا كلنا مع سوريا ومع وحدة العرب، ومستحيل نوقف ضد بلدنا أو قوميتنا، والتعبير عن الرأيي بحرية وصراحة وبدون مجاملة بكون لمصلحة البلد وأهل البلد والنظام الحاكم بالبلد، مو ضدهن، وأنا بستغرب كيف بلدنا وحكومتنا ونظامنا مفكرين التعبير عن حرية الرأي بيهدف للفرقة والعنصرية!!!!

بعدين نحنا ليش بصراع مع أميركا وأغلب المجتمع الدولي؟؟ مو لأن سوريا عمبتعبر عن مواقفها بكل حرية وحيادية وعدل؟؟؟ مو رئيسنا والمتحدثين باسم حكومتنا واقفين بوجه أميركا وظلم أميركا لأن هنن بآمنوا بالعدالة وحرية الشعوب والمقاومة ضد الظلم؟؟؟ طيب كيف حكومتنا بتعمل بشعبها نفس يللي بتعملو أميركا فيها؟؟؟!!!! كيف نظامنا عميعزل الناس يللي بتعبر عن رأيها بحرية وبالمقابل نظامنا عمينعزل عن المجتمع الدولي لنفس السبب؟؟؟ يللي بحللي هالمعادلة بكون فيثاغوروس زمانو، وأكيد أكيد من أحفاد الخوارزمي!!!!!!

أنا كتييييييييييييير متأسف لأني ما بعرف الشباب بعمق، لأن انحبسوا بعد ما فتت على أخوية(بيتي التاني) بفترة قصيرة، بس حاسس حالي بعرفهن من زمان، الله يرجعهن بالسلامة، والحمد لله إنو عميلعبوا رياضة بالأسر، بركي بيطلعوا أقوى من قبل.
الله يكون معهن ويصبرهن ويصبر أهلن.

كلنا منحب بلدنا وشعبنا وبدنا مصلحتن، وكلنا منحب رئيسنا وحكومتنا وبدنا مصلحتن، بس يا ريت الحكومة والجهاز الأمني عنا يفهموا هالشي!!!