المشكلة أنو العلمانيين العرب نزعو طبخة المحشي عا الأجيال التانية لما تحولت المناداة بالعلمانية إلى معاداة للدين.
يعني اللادينية العربية اكتسبت عداء شرائح واسعة من المجتمع بدون ما تعمل أي مكسب للعلمانية.
لنفرض أنو نزلنا على السوق بحمص, و دخلنا لعند تاجر, ختيار كبير بالعمر,وثقافتو على قدو, و لنفرض أنو مسلم , و بلشنا نحكيه عن العلمانية , و أنو هدفنا نعمل تغيير بالمجتمع لنحقق مساواة بين جميع أفرادو, رح يعجبو الحكي و يقول الله يوفق, اذا فهمناه انو طريقنا اللي ماشين عليه يمكن يبعد الدين عن طريقة ادارة الدولة , يعني فهمناه انو بها الشي رح يصير المسيحي متل المسلم متل عباد النار متل عباد الطريق متل اللي ما بيعبد حدا قدام القانون, رح يفكر شوي بعدين رح يتذكر جارو المسيحي اللي صرلون عمر عايشين مع بعض الحيط عا الحيط و الطبخة من الطبخة, و يقول الله يوفق, بتصور نفس الشي اذا انتقلنا لعند جارو اللي بنفس المواصفات بس مسيحي, بس نجي نقول للجوز أنو تعو لهون يلعن ربك على ربو , لا حجاب ولا صليب و لا طلاق و لا تعدد زوجات و بالكندرة, و الأدان اللي بيعلا بالمكبر منرفع عليه دعوة و منزل الجرس عن الكنيسة, الجوز رح يقلعونا من المحل و يلمو السوق علينا , ويا غيرةالإسلام و يا أمة محمد و يا يسوع الارتوذوكس دير بالك عا الكاتوليك , وطاب الموت يا عرب.
هاد اللي عملوه العلمانيين العرب, شنو حرب غير مطلوبة عا الدين و صار هم الملحد انو يسفه الدين و يشوهو و يضحك عليه.
ما المطلوب هاد الشي بتاتاً, المطلوب الناس تفهم أنو العلمانية بتحمي الجميع و بتحمي حريات الجميع و خاصة الدينية, ما يعني اذا بأوروبا عم يحاربو الرموز الدينية يعني علمانيتنا رح تكون متلون , بس هنن عندن علمانية أصلا و عندون مساواة و حرية, نحنا ما وصلنا لسا , لنوصل و على الجميع السلام.
أول شي لازم نصحح النظرة للعلمانية بمجتمعاتنا, و نصحح العلمانيين , بعدين نصحح المجتمع اللي من الطبيعي جدا يتجه نحو التطرف ضد العلمانية أذا رأيو أنو العلمانية هيي أنو يشلحو بنتو الحجاب غصب عنها و يطلقو مرت أبنو التانية غصب و يمشوه موطي راسو اذا فايت عا الكنيسة .
العلمانية من العالم
العلمانية تعني المساواة
العمانية تعني أداء أفضل للإدارة الحكومية
العلمانية تعني حماية الحريات جميعا و من ضمنها الدينية
العلمانية هي الحل
العلمانية لا تساوي اللادينية
و أسلموا متساوين
يا عبد متى رأيتني في الضدين رؤية واحدة, اصطفيتك لنفسي.