موضوع حلو
العلمانية متل المحشي.. في محشي فليفلة و في محشي بطاطا و في محشي كوسا و في محشي بيذنجان... كلو محشي لكن في تشكيلة واسعة من أنواع المحشي و هاد يقتضي شغلتين:
- مشان تعتبر حالك ما تحب المحشي مانك مجبور تحب كل الانواع الموجودة
- حتى لو تحب نوع محدد كمان في بهارات و درجة ملح و الخ من هالقصص بتأثر يعني
- كونك ما تحب نوع محدد من المحشي و بتعتبر حالك انك من أنصار المحشي مافيك تنفي انو هالنوع هاد من المحشي هو محشي كمان, عجبك أو ما عجبك
لا حدا يتمسخر على مثالي
أي خيو... نجي عالعلمانية.. يعني ماني حدا مشان قول أنا شو العلمانية بشكل مطلق.. فيني قلك كيف أنا بشوف العلمانية:
العلمانية هي فصل الدين عن ادارة الدولة و عن انظمة حكم الدولة (الدين كمنظومة عمل اداري) لكن ما اعتقد انو من الحتمي فصل الدين عن الحياة السياسية .. يعني مانو من المزعج انو يكون في أحزاب ذات طابع ديني طالما موافقة على دستور و مجموعة قوانين تضمن حقوق و حريات باقي فئات الشعب.. هون انا اعتبر الدين ايديولوجيا.
حكيت انو العلمانية هي فصل الدين عن ادارة الدولة و انظمة الحكم... لكن في قضية. الدين حتى تاريخه هو أطول مرحلة من مراحل تطور تاريخ الفكر الاجتماعي الانساني, و انكاره تماما يعني شطب تاريخ طويل جدا من تاريخ التطور الانساني و هو طبعا تفكير خاطئ.. و محاولة تعديله و تغيير لا يعني انكاره أبدا....
على اعتبار أخونا المحارب ركز على جوانب اعتقد انها خاصة بالاحوال الشخصية.. راح بلش بتعدد الزوجات:
ما فينا نسقط التجربة الفرنسية على التجربة السورية مثلا.. مو لأنو احسن أو أسوء, انما لأنو تطورنا الاجتماعي كان مختلف. يعني لما تعدد الزوجات كان بالنسبة النا جزء من التراث الاجتماعي الناتج عن المرحلة الدينية من الادارة (هالمرحلة طبعا مازالت موجودة ) بينما بفرنسا ما فينا نقول هالشي لأنو تعدد الزوجات غريب على التطور الاجتماعي الفرنسي, و ما اعتقد انو عدم ادخال عادة اجتماعية غريبة عن منظومتهم القانونية يطعن بعلمانيتهم
بما يخص الأحوال الشخصية, يعني الدولة العلمانية مانها الدولة اللي تفرض أحوال شخصية "علمانية"... يكفي انو يكون في خيار الأحوال الشخصية المدنية من الخيار الديني الموجود و الناتج عن التطور الاجتماعي لهالمجتمع, يعني كمان اعتقد انو وجود احوال شخصية مسيحية بسوريا ليس توازيا مع ضرورة وجود أحوال شخصية اسلامية في فرنسا لأنو الوجود المسيحي في سوريا راسخ اجتماعيا و أقدم بكثير من الوجود الاسلامي في فرنسا, و حتى فيك تقول مختلف جدا
--------------------------------------------------------
عالهامش: بخصوص أخوية.. بقول عالهامش لأنو مو هاد مكان و لا أنا الشخص المؤهل لحتى اتحدث عنو و اطلب انو ما يتحول الموضوع الى كلام عن هوية أخوية
أخوية مانو موقع علماني سوري.. أخوية موقع سوري. نقطة انتهى, أو هذا ما نحاول أن يكون.. وجود اللاهوت المسيحي هو نتيجة تطور منتدى أخوية من منتدى مسيحي سوري الى منتدى سوري, و اللاهوت الو وضع خاص راح يتكلم عنو و يتصرّف ازائو المشرف العام عند مقدرته.. ماني مؤهل احكي عنو
يعني مشرفين هالموقع لا هنن علماء اجتماع و لا هم يحزنون.. عنا فكرة محدد بدنا نطبقها.. ننجح ما ننجح ما بعرف.. المهم نحاول, ما يغلط الا اللي ما يشتغل, مو هيك؟
أكيد أكيد لي عودة
الله يسعدكون
