هلا و غلا بفينيكس بيرد
مع ام ضد
1- المساكنة قبل الزواج
مع اذا كان الطرفين على درجة من الوعي, و التفاهم
2- انفصال الاولاد عن اهلون عال18 سنة
مع كمان, لازم كل انسان يعتمد على حالو, و يحاول يشق طريقو بنفسو.
3- عمليات التجميل
كلنا منتجمل بطريقة أو بأخرى, يعني لما الصبية تحط مكياج أو الشب يحلق دقنو , لما منهتم بمظهرنا بأي ناحية من النواحي نحنا ببساطة عم نحاول نعمل شي يخلينا نرتاح لمظهرنا أكتر, و ها الشي رح يحسسنا بالرضى, فإذا عملية التجميل رح تحسس أي حدا بالرضى عن نفسو فما بلاقي في أي مشكلة.
4- ان تشن سوريا حرب على اسرائيل لاسترجاع الجولان
مع , القوة وسيلة من الوسائل المشروعة لنرجع حقوقنا, بصراحة أنا بالظروف اللي مرت فيها منطقتنا, و تاريخ صراعنا مع ها العدو بلاقي أنو القوة هيي الوسيلة الوحيدة للتعامل مع العدو, مع أنو ما بتمنى الحرب و بفضل الديبلوماسية لحل أي صراع
5- حظر موقع الفيس بوك
ضد حظر أي موقع شو ما كان توجهو, محتواه, أو أعضاءو
6- منع هيفا من الغناء في سوريا
ليش مين منعا,ههههههه أكيد ضد, اذا إلها جمهور بسوريا , فليش يحرموهن 
7- خصخصة قطاعات حكومية
مع, و اذا السؤال عن سوريا تحديدا , فلازم الدولة تتخلص من المنشآت عديمة الربحية اللي عم تشكل ضغط كبير عا الميزانية العامة و ما عم تقدم الخدمات ولا الأرباح المطلوبة منها.
8- الزواج المدني
مع للعضم
9- قيام المحكمة الدولية
مع , نحنا بدنا الحقيقة كمان, لأنو فلقونا 
10- ولا قلك بلاها
مع , بغض النظر
سؤال ثاني
كلمة ميت خسة اللي بتختم فيها لشو بتعني
الخسة يا سيدي تقوم مقام الوردة, بس الخسة أفضل بكتير , و الخسة كانت شعار كتائب الشهيد ديموزي الجناح المسلح للحزب الأخوي القومي الأممي الحمصي للمصطفلين بالأرض , أول حزب وقف بوجه حزب المشرفين الملكي و حزب الناعمات العميل
سؤال ثالث
من فترة حضرتك كتبت موضوع بالمنبر عن الاخر
برايك هل تعتقد ان ما قامت به عدد من الصحف في اوربا في نشر كاريكترز عن النبي محمد ينتج الى عدم تقبل الاخر ؟
لاء, بتخيل انشرت ها الكاريكاتيرات بسياق عادي جدا, و لما صارت كل ها المشاكل عليهن, إعادة النشر كانت " من وجهة نظر اللي عملوها " تأكيد على حق التعبير اللي لازم يكون مقدس
اليوم الكل يتحدث عن قبول الاخر طيب هل ترى ان الجيل الشباب السوري الحالي متقبل للاخر ؟
للأسف لنوصل لمرحلة تقبل الآخر, لازم نتعرف عا الآخر بالأول, نحنا لسا ما منعرف مين الآخر, وبتخيل ما منعرف مين نحنا كمان
بغض النظر عن مين الاخر ( ريف مدينة دين رجل وامراة اتجاه فكري او سياسي او الخخخخخخخخخخخ)
مالخطوات التي تراها ملائمة برايك لقيام حرية اعلام في سوريا
لنحكي عن حرية إعلام لازم نحكي عن حرية بالأول, مهيك
سؤالي الاخير
لو تركتكلك هالمساحة فاضية وقلتلك احكيلي احكيلي شو بتحكيلي
بتركا فاضية والله, جايني كتير حكي عا الطريق
يا عبد متى رأيتني في الضدين رؤية واحدة, اصطفيتك لنفسي.